ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພິທີມອບ-ຮັບເຂົ້າຊ່ວຍເຫຼືອຈາກກະຊວງ ແຮງງານ ແລະ ສະຫວັດດີການສັງຄົມ ໃຫ້ຜູ້ປະສົບໄພແຫ້ງແລ້ງ ໃນປີ 2019 ທົ່ວແຂວງໄຊຍະບູລີ.

ຕອນບ່າຍວັນທີ 10 ມິຖຸນາ 2020 ນີ້ ແຂວງໄຊຍະບູລີ ໄດ້ຈັດພິທີມອບ-ຮັບເຂົ້າຊ່ວຍເຫຼືອຈາກກະຊວງແຮງງານ ແລະ ສະຫວັດດີການສັງຄົມໃຫ້ຜູ້ປະສົບໄພແຫ້ງແລ້ງໃນປີ 2019 ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານຂອງທ່ານ ນາງ ບຸນພັກ ອີນທະປັນຍາ ຮອງເຈົ້າແຂວງໄຊຍະບູລີ ປະທານຄວບຄຸມໄພພິບັດຂັ້ນແຂວງ, ມີທ່ານນາງ ແພງຈັນ ແກ້ວມະນີວົງ ກຳມະການພັກແຂວງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ມີທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງ ໄຊຍະບູລີ, ມີຄະນະປະຈຳພັກເມືອງ, ຫົວໜ້າ, ຮອງຫົວໜ້າພະແນກການຂອງແຂວງ, ຫົວໜ້າ, ຮອງຫົວໜ້າຫ້ອງການຂອງເມືອງ, ພະນັກງານວິຊາການ ພ້ອມດ້ວຍປະຊາຊົນໃນຂອບເຂດບ້ານທີ່ປະສົບໄພພິບັດເຂົ້າຮ່ວມ.

ໃນພິທີທ່ານນາງ ແພງຈັນ ແກ້ວມະນີວົງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ໃຫ້ກຽດຂື້ນຜ່ານບົດລາຍງານໂດຍຫຍໍ້ກ່ຽວກັບສະພາບໄພພິບັດ ແລະ ຜົນເສຍຫາຍ ທີ່ເກີດຂຶ້ນໃນປີ 2019 ໃນບາງຕອນທ່ານກ່າວວ່າ: ຫຼັງຈາກໄພພິບັດທີ່ເກີດຂຶ້ນພະແນກ ແຮງງານ ແລະ ສະຫວັດດີການສັງຄົມແຂວງ ກໍ່ໄດ້ສັງລວມຂໍ້ມູນເພື່ອສະເໜີຂໍຄວາມຊ່ວຍເຫຼືອສົງເຄາະ ຈາກກະຊວງ ແຮງງານ ແລະ ສະຫວັດດີການສັງຄົມລວມມີ: 160 ບ້ານ, ມີ 5.457 ຄອບຄົວ, 28.856 ຄົນ, ຍິງ 13.815 ຄົນ ລວມມູນຄ່າຜົນເສຍຫາຍ 8 ຕື້ກວ່າກີບ, ໃນປີ 2019 ກໍ່ໄດ້ຮັບຄວາມຊ່ວຍເຫຼືອລວມມີ ເຂົ້າສານຈໍານວນ 148.876 ກິໂລ ເພື່ອນໍາໄປຊ່ວຍເຫຼືອຜູ້ປະສົບໄພ້ນໍ້າຖ້ວມປີ 2018 , ສັງກະສີຈໍານວນ 4.210 ແຜ່ນ, ເຫຼັກຕະປູຈໍານວນ 740 ກິໂລ ເພື່ອຊ່ວຍເຫຼືອຜູ້ປະສົບເຄາະຮ້າຍຈາກລົມພາຍຸພັດ ແລະ ອັກຄີໄພ ໃນປີ 2019 ລວມມູນຄ່າທັງໝົດ 1 ຕື້ກວ່າກີບ ແລະ ພິເສດໃນປີ 2020 ນີ້ກໍ່ໄດ້ຮັບເຂົ້າສານຈໍານວນ 258 ໂຕນ ເພື່ອຊ່ວຍເຫຼືອຜູ້ປະສົບໄພແຫ້ງແລ້ງໃນປີ 2019 ຢູ່ 11 ເມືອງທົ່ວແຂວງ ລວມມູນຄ່າ 2 ຕື້ກວ່າກີບ ໃນນັ້ນເມືອງໄຊຍະບູລີ ໄດ້ຮັບຈໍານວນ 21.000 ກິໂລ ລວມມູນຄ່າ 198 ລ້ານກ່ວາກີບ ສະເພາະ ຕົ້ນປີ 2020 ຜ່ານມາໄດ້ມີໄພພິບັດທີ່ເກີດຂຶ້ນເປັນຕົ້ນແມ່ນ: ອັກຄີໄພ   ( ໄຟໄໝ້ເຮືອນ) ມີ 8 ເມືອງ, ຈໍານວນ 17 ຄັ້ງ ມີ17 ບ້ານ ໄດ້ຮັບຜົນກະທົບ 26 ຄອບຄົວ, ມີ 137 ຄົນ, ຍິງ 69 ຄົນ, ມູນຄ່າເສຍຫາຍທັງໝົດ 2 ຕື້ກວ່າກີບ, ລົມພາຍຸເຮືອນເປ່ເພ 9 ເມືອງ ລວມ 24 ຄັ້ງ, ມີ 43 ບ້ານໄດ້ຮັບຜົນກະທົບ ມີ 438 ຄອບຄົວ, ມີ 2.096 ຄົນ, ຍິງ 1.039 ຄົນ, ໃນນີ້ມີສໍານັກງານຂອງລັດ 10 ແຫ່ງ ມູນຄ່າເສຍຫາຍທັງໝົດ 2 ຕື້ກວ່າກີບ, ເກີດຟ້າຜ່າສັດລ້ຽງ 2 ເມືອງ ຈໍານວນສັດ 13 ໂຕ: ງົວ 8 ໂຕ, ແບ້ 5 ໂຕ, ຟ້າຜ່າປະຊາຊົນ 4 ເມືອງ,ໃນນັ້ນເສຍຊີວິດ 4 ຄົນ ການຊ່ວຍເຫຼືອເບື້ອງຕົ້ນແມ່ນນໍາໃຊ້ເງິນກອງທຶນຂອງເມືອງ ຊ່ວຍເຫຼືອຜູ້ລະ 1,000,000 ກີບ , ບາດເຈັບ 4 ຄົນ ການຊ່ວຍເຫຼືອເບື້ອງຕົ້ນແມ່ນໄດ້ນໍາເງິນກອງທຶນຂອງແຂວງຂອງເມືອງເປັນມູນຄ່າ 1,400,000 ກີບ, ນໍ້າໄຫຼຊຸ 1 ເມືອງ ເຮັດໃຫ້ມີຜູ້ເສຍຊີວິດ 1 ຄົນ ຈາກສະພາບໄພພິບັດທີ່ເກີດຂຶ້ນ ພະແນກແຮງງານ ແລະ ສະຫວັດດີການສັງຄົມ ແຂວງ ກໍ່ໄດ້ສັງລວມຂໍ້ມູນເພື່ອສະເໜີ ຂໍການຊ່ວຍເຫຼືອສັງເຄາະຈາກກະຊວງແຮງງານ ແລະ ສະຫວັດດີການສັງຄົມ ລວມມີ 20 ບ້ານ,​ 46 ຄອບຄົວ, 253 ຄົນ, ຍິງ 129 ຄົນ ລວມເປັນມູນຄ່າເສຍຫາຍທັງໝົດ 2 ຕື້ກວ່າກີບ.

ຈາກນັ້ນໃນພິທີກໍ່ໄດ້ມອບ-ຮັບເຂົ້າສານຈໍານວນ 21,000 ກິໂລ ລວມມູນຄ່າ 198 ລ້ານກ່ວາກີບໃຫ້ເມືອງໄຊຍະບູລີ ໃຫ້ກຽດກ່າວມອບໂດຍ ທ່ານ  ນາງ ບຸນພັກ ອີນທະປັນຍາ ຮອງເຈົ້າແຂວງໄຊຍະບູລີ ປະທານຄວບຄຸມໄພພິບັດຂັ້ນແຂວງ ແລະ ກ່າວຮັບໂດຍ ທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງ ໄຊຍະບູລີ ເພື່ອນໍາໄປແຈກຢາຍໃຫ້ປະຊາຊົນທີຖືກໄພພິບັດໃນຄັ້ງນີ້.

 

ພາບ-ຂ່າວ:​ ລັດດາວອນ ແກ້ວໄພທູນ