ໃນຕອນເຊົ້າຂອງ ວັນທີ 10 ຕຸລາ 2022 ທີ່ຫ້ອງວ່າການແຂວງອຸດົມໄຊ ທະນາຄານການຄ້າຕ່າງປະເທດ ມະ ຫາຊົນ (ທຄຕລ) ຕາງໜ້າໃຫ້ແກ່ສັງຄົມຜູ້ໃຈບຸນ ມອບ – ຮັບ ເງິນບໍລິຈາກຂອງສັງຄົມທີ່ໄດ້ຮ່ວມບໍລິຈາກຜ່ານລະບົບ BCEL OneHeart ໃນໂຄງການລະດົມທຶນຊ່ວຍເຫຼືອ, ຟື້ນຟູຜົນກະທົບຈາກໄພພິບັດ ນ້ຳຖ້ວມ ຢູ່ເມືອງໄຊ, ເມືອງຫຼາ ແລະ ເມືອງນາໝໍ້ ແຂວງອຸດົມໄຊ ຕາງໜ້າ ມອບໂດຍ ທ່ານ ກົງສັກ ສຸພອນສີ ຮອງຜູ້ອໍານວຍການ ທຄຕລ ແລະ ຕາງໜ້າຮັບໂດຍ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ ເຂົ້າ ຮ່ວມເປັນສັກຂີພະຍານ ມີຄະນະກໍາມະການຮັບ BCEL OneHeart, ຕາງໜ້າ 3 ອົງການຈັດຕັ້ງມະຫາຊົນ ທຄຕລ ສາຂາອຸດົມໄຊ ແລະ ພາກສ່ວນທີ່ກ່ຽວຂ້ອງ.
ໂຄງການດັ່ງກ່າວ ເປັນໂຄງການທີ່ລະ ດົມທຶນເພື່ອນຳໄປສົມທົບທຶນຊ່ວຍເຫຼືອບັນເທົ່າທຸກໃຫ້ກັບຄອບຄົວທີ່ຖືກຜົນກະທົບ ທີ່ມີຄວາມຈໍາເປັນເຊັ່ນ: ເຄື່ອງອຸປະໂພກ – ບໍລິໂພກຂັ້ນພື້ນຖານ, ເຂົ້າ ສານ, ນ້ຳດື່ມ – ນ້ຳໃຊ້, ຢາປົວພະຍາດ, ທີ່ພັກອາໄສຊົ່ວຄາວ, ເຄື່ອງນຸ່ງຮົ່ມ ແລະ ອື່ນໆ. ໄລຍະເວລາໂຄງການ: ເລີ່ມແຕ່ວັນທີ່ 1 – 30 ກັນຍາ 2022 ໂດຍສາມາດລະດົມໄດ້ທັງໝົດ 141.000.000 ກວ່າກີບ, ມີຜູ້ຮ່ວມບໍລິຈາກທັງໝົດ 274 ຄັ້ງ. BCEL OneHeart ເປັນຜະລິດຕະພັນ ທີ່ ທຄຕລ ມີຄວາມຕັ້ງໃຈ ນໍາໃຊ້ເທັກໂນໂລຢີທີ່ໄດ້ມີຄວາມທັນສະໄໝ ເຂົ້າໃນວຽກງານຊ່ວຍເຫຼືອສັງຄົມໂດຍບໍ່ຫວັງຜົນກຳໄລ ແລະ ບໍ່ມີຄ່າທຳນຽມ ການບໍລິຈາກກໍ່ງ່າຍ, ເຊິ່ງຈະຊ່ວຍໃຫ້ຜູ້ທີ່ມີຄວາມຫຍຸ້ງຍາກໄດ້ຮັບການຊ່ວຍເຫຼືອຕາມຄວາມເໝາະສົມ, ຜູ້ທີ່ບໍລິຈາກກໍ່ມີຄວາມໝັ້ນໃຈໄດ້ວ່າ ການບໍລິຈາກຂອງຕົນຈະເຖິງມືຜູ້ຕ້ອງການຄວາມຊ່ວຍເຫຼືອແທ້.
ຂ່າວ;ພາບ: ແສງອາທິດ
