ວັນທີ 13 ສິງຫາ 2024 ນີ້, ພະແນກ ຍທຂ ແຂວງສະຫວັນນະເຂດ ຮ່ວມກັບຫ້ອງການ ຍທຂ ເມືອງໄຊພູທອງໄດ້ຈັດກອງປະຊຸມມອບ-ຮັບແຜນຜັງບ້ານໂພນທາດ ເມືອງໄຊພູທອງ ແຂວງສະຫວັນເຂດ ຂຶ້ນຢ່າງເປັນທາງການທີ່ຫ້ອງການສົງບ້ານໂພນທາດ ໂດຍການເຂົ້າຮ່ວມເປັນປະທານຂອງ ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ ຊີ້ນໍາວຽກງານວັດທະນະທໍາ-ສັງຄົມເມືອງ, ມີທ່ານ ສຸກທະນູສອນ ອິນທິສອນ ຫົວໜ້າຂະແໜງເຄຫະຜັງເມືອງ ພະແນກ ຍທຂ ແຂວງ, ມີພະອາຈານ ສອນເພັດ ໂງນລາຊະສິງ ເຈົ້າອະທິການວັດພະທາດໂຜ່ນ ພ້ອມທີມງານ ພ້ອມດ້ວຍການນໍາຂອງເມືອງ ແລະ ເລຂາພັກ-ນາຍບ້ານໂພນທາດ ແລະ ຫ້ອງການທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້, ທ່ານ ພົມມາ ສົງວິໄລ ຮອງເຈົ້າເມືອງ ກໍ່ໄດ້ນໍາພາຄົ້ນຄ້ວາປະກອບຄໍາຄິດຄໍາເຫັນຢ່າງກົງໄປກົງມາ ເພື່ອເຮັດໃຫ້ການຮັບຮອງເອົາແຜນຜັງບ້ານໂພນທາດ ເປັນຕົ້ນແມ່ນການເກັບຂໍ້ມູນທາງດ້ານນະໂຍບາຍ ແລະ ພັດທະນາທາງດ້ານຕ່າງໆ ໂດຍສະເພາະທາງດ້ານເສດຖະກິດ-ສັງຄົມ ທີ່ເປັນຂໍ້ມູນພື້ນຖານໃຫ້ແກ່ການວາງແຜນຜັງເມືອງດັ່ງກ່າວ ແລະ ໄດ້ສໍາຫຼວດຄືນໂຄງລ່າງພື້ນຖານ ບ້ານໂພນທາດເປັນຕົ້ນ: ລະບົບສຸຂະພິບານ ແລະ ສິ່ງແວດລ້ອມຂອງຊຸມຊຸນ ນະໂຍບາຍການພັດທະນາບ້ານໂພນທາດ ຂອງອົງການປົກຄອງເມືອງ, ການນໍາໃຊ້ທີ່ດິນໃນສະພາບປະຈຸບັນ, ສະພາບພູມີສາດ ແລະ ສະພາບແວດລ້ອມທໍາມະຊາດ, ໂຄງລ່າງພື້ນຖານທາງດ້ານເຕັກນິກ ແລະ ໂຄງລ່າງພື້ນຖານທາງດ້ານສັງຄົມ, ຈຸດປະສົງກໍ່ເພື່ອຮັບຮອງການເພີ່ມຂຶ້ນຂອງປະຊາກອນ, ເສດຖະກິດ-ສັງຄົມຂອງບ້ານໂພນທາດ, ເພື່ອຈັດສັນຄວາມເປັນລະບຽບຮຽບຮ້ອຍໃນບໍລິເວນເດີ່ນພະທາດໂຜ່ນ, ໂຄງລ່າງພື້ນຖານທາງດ້ານສັງຄົມ ເພື່ອໃຫ້ການພັດທະນາເປັນໄປຢ່າງມີລະບົບ ແລະ ສອດຄ່ອງກັບການພັດທະນາດ້ານຕ່າງໆ. ທົບທວນຄືນການຄຸ້ມຄອງໃນການນໍາໃຊ້ທີ່ດິນແຜນຜັງເມືອງ ແລະ ປັບປຸງກົດລະບຽບ ເພື່ອການຄຸ້ມຄອງໃນການປຸກສ້າງ ເປັນບ່ອນອີງໃນການພັດທະນາ ແລະ ຄຸ້ມຄອງຕົວເມືອງໃຫ້ມີປະສິດທິຜົນ ສອດຄ່ອງກັບສະພາບແວດລ້ອມ. ເພື່ອສົ່ງເສີມເສດຖະກິດຂອງຕົວເມືອງ ໂດຍໄດ້ກໍານົດມີເຂດການຄ້າ-ການບໍລິການໃຫ້ມີຄວາມສະດວກ ໃນການເດີນທາງ ແລະ ຂົນສົ່ງ ເພື່ອເຂົ້າເຖິງ ແລະ ນໍາໃຊ້ຢ່າງມີປະສິດທິພາບ. ໄປຄຽງຄູ່ກັບການສົ່ງເສີມມາດຖານຄວາມເປັນຢູ່ໃຫ້ດີຂຶ້ນ ມີສຸຂະອະນາໄມ, ຄວາມເປັນລະບຽບ, ສວຍງາມ, ປອດໄພຕະຫຼອດການຄຸ້ມຄອງສິ່ງແວດລ້ອມໃຫ້ມີຄວາມເໝາະສົມ ແລະ ມີປະສິດທິພາບ, ການຮັກສາສະພາບທິວທັດທີ່ສວຍງາມທາງດ້ານທໍາມະຊາດ ຮັກສາສຖານທີ່ທາງທໍາມະຊາດ, ປະຫວັດສາດ ແລະ ວັດທະນະທໍາໃຫ້ມີຄວາມຍືນຍົງ ທາງດ້ານການທາງທ່ຽວພາຍໃນເມືອງໄຊພູທອງ.
ຈາກນັ້ນ, ກອງປະຊຸມກໍ່ໄດ້ຮ່ວມກັນເຊັນບົດບັນທຶກມອບ-ຮັບແຜນຜັງບ້ານໂພນທາດ ລະຫວ່າງ ທ່ານ ສຸກທະນູສອນ ອິນທິສອນ ຫົວໜ້າຂະແໜງເຄຫະຜັງເມືອງ ພະແນກ ຍທຂ ແຂວງ ແລະ ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ ແລະ ພ້ອມດ້ວຍເລຂາພັກ-ນາຍບ້ານ, ຫ້ອງການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ, ພ້ອມນັ້ນຄະນະນໍາຂອງເມືອງ ກໍ່ໄດ້ຮ່ວມກັນລົງສໍາຫຼວດວັດແທກ ແລະ ສໍາຫຼວດເຂດບໍລິເວນເດີ່ນພະທາດໂຜ່ນຕື່ມອີກ ເພື່ອອີງໃສ່ໃນການພັດທະນາໃນຂັ້ນຕອນຕໍ່ໄປ.
ທີ່ມາ: ມີເດຍລາວ
