ພິທີໄດ້ຈັດຂຶ້ນໃນຕອນບ່າຍວັນທີ 16 ທັນວາ 2020 ເຂົ້າຮ່ວມເປັນປະທານຂອງທ່ານ ສີເຮັ່ງ ຫອມສົມບັດ ຮອງເລຂາຄະນະບໍລິຫານງານພັກແຂວງ-ປະທານສະພາປະຊາຊົນແຂວງສາລະວັນ ມີຄະນະປະຈຳພັກແຂວງ-
,ກຳມະການພັກແຂວງ,ຄະນະປະຈຳພັກເມືອງ,ກຳມະການພັກເມືອງ ພັກນັກງານຫຼັກແຫຼ່ງ ພະນັກງານອາວຸໂສບຳນານແລະແຂກຖືກເຊີນເຂົ້າຮ່ວມ.
ໃນພິທີທ່ານ ເພັດສະໝອໜ ດວງລາສີ ຮອງຫົວໜ້າຄະນະຈັດຕັ້ງແຂວງ ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ເລກທີ 951/ຄຈພຂ.ສວ, ລົງວັນທີ 15 ທັນວາ 2020 ວ່າດ້ວຍ: ການແບ່ງງານຄະນະບໍລິຫານງານພັກແຂວງສາລະວັນຄັ້ງທີ IX,ຖັດຈາກນັ້ນ ທ່ານ ສົມໃຈ ອຸ່ນຈິດ ຄະນະປະຈຳພັກແຂວງ ເລຂາພັກເຈົ້າເມືອງລະຄອນເພັງ ກໍໄດ້ຂຶ້ນຜ່ານແຜນການເຄື່ອນໄຫວໄລຍະທີ່ທ່ານໄດ້ມາຮັບຕຳແໜ່ງເປັນເຈົ້າເມືອງລະຄອນເພັງ ເຊິ່ງມີຫຼາຍໜ້າວຽກທີ່ສຳເລັດເຊັ່ນ: ສຳເລັດການນຳພາກະກຽມແລະດຳເນີນກອງປະຊຸມໃຫຍ່ຂອງອົງຄະນະພັກເມືອງລະຄອນເພັງ ປະສານສົບທົບກັບໜ່ວຍງານກ່ຽວຂ້ອງເຮັດໃຫ້ເມືອງມີຄວາມສະຫງົບໂດຍພຶ້ນຖານ, ໄດ້ເອົາໃຈໃສ່ພັດທະນາວຽກງານເສດຖະກິດເຫັນວ່າເສດຖະກິດສາມາດຈະເລີນເຕີບໂຕຢ່າງຕໍ່ເນື່ອງ, ດ້ານວັດທະນະທຳສັງຄົມ ສຸມໃສ່ພັດທະນາວຽກງານການສຶກສາ ເອົາໃຈໃສ່ເຝົ້າລະວັງການແຜ່ລະບາດພະຍາດໂຄວິດ ແລະຕອບໂຕ້ການແຜ່ລະບາດຂອງພະຍາດຕາມລະດູການໄດ້ເປັນຢ່າງດີ ພ້ອມນີ້ກໍຍັງມີຂໍ້ຄົງຄ້າງຫຼາຍດ້ານທີ່ຈະໄດ້ມອບໃຫ້ຄະນະບໍລິຫານງານພັກເມືອງຕ້ອງໄດ້ສືບຕໍ່ໃນການແກ້ໄຂຄື: ວຽກງານສຶກສາອົບຮົບການເມືອງແນວຄິດ,ສືບຕໍ່ວຽກງານປ້ອງກັນຊາດປ້ອງກັນຄວາມສະຫງົບ,ສືບຕໍ່ພັດທະນາວຽກງານກະສິກຳຊົນລະປະທານໃຫ້ທົ່ວເຖິງ,ເອົາໃຈໃສ່ພັດທະນາພຶ້ນຖານໂຄງລ່າງ,ສົ່ງເສີມຜະລິດຕະພັນພູມປັນຍາທ້ອງຖິ່ນ.
ຈາກນັ້ນທ່ານກໍໄດ້ກ່າວອຳລາແລະມອບໜ້າທີ່ຢ່າງເປັນທາງການ.
ຄະນະດຽວກັນນັ້ນ ທ່ານ ທອງດີ ຈັນທະວົງ ກຳມະການພັກແຂວງ ກໍໄດ້ຂຶ້ນກ່າວຮັບໜ້າທີ່ເລຂາພັກ-ເຈົ້າເມືອງລະຄອນເພັງ ໂດຍເບື້ອງຕົ້ນທ່ານໄດ້ສະແດງຄວາມຮູ້ບຸນຄຸນຕໍ່ຄະນະພັກຂັ້ນເທິງ ທີ່ໄດ້ໃຫ້ຄວາມໄວ້ວາງໃຈມອບໜ້າທີ່ອັນສູງສົ່ງໃຫ້ ແລະທ່ານໄດ້ສະແດງຄວາມດີໃຈຕໍ່ບົດລາຍງານມອບໜ້າທີ່ຈາກເລຂາພັກເຈົ້າເມືອງຜູ້ເກົ່າທີ່ສະແດງໃຫ້ເຫັນຫຼາຍໜ້າວຽກທີ່ພົ້ນເດັ່ນແລະສຳເລັດເຮັດໃຫ້ເມືອງລະຄອນເພັງມີໃບໜ້າອັນໃໝ່ ພ້ອມນີ້ທ່ານກໍພ້ອມທີ່ຈະເຮັດໜ້າທີ່ແກ້ໄຂຈຸດຄົງຄ້າງໃນຫຼາຍອັນທີ່ອະດີດເຈົ້າເມືອງໄດ້ຝາກໄວ້ໃຫ້ສຳເລັດຕາມລະດັບຄາດໝາຍ.
ພ້ອມນີ້ກໍໄດ້ເຊັນບົດບັນທຶກມອບ-ຮັບ ພ້ອມທັງຖ່າຍພັບຮ່ວມກັນເພື່ອເປັນສັກຂີພະຍານ ພ້ອມທັງມອບກະຕ່າດອກໄມ້ ເພື່ອເປັນຂອງຂວັນ ແລະ ກຳລັງໃຈໃນການສືບຕໍ່ປະຕິບັດໜ້າທີ່.
ເພື່ອເຮັດໃຫ້ພິທີມີຄວາມໝາຍແລະສົມກຽດ ແລະ ສືບຕໍ່ປະຕິບັດໜ້າທີ່ ທ່ານ ສີເຮັ່ງ ຫອມສົມບັດ ຮອງເລຂາຄະນະບໍລິຫານງານພັກແຂວງ ໄດ້ໃຫ້ກຽດຂຶ້ນໂອ້ລົມແລະຊີ້ທິດເຍືອງທາງໃນການປະຕິບັດໃນຕໍ່ໜ້າ ເຊິ່ງທ່ານໄດ້ຍົກໃຫ້ເຫັນຄືນຜົນສຳເລັດອັນພົ້ນເດັ່ນທີ່ເລຂາພັກ-ເຈົ້າເມືອງຜູ້ເກົ່າໄດ້ນຳພາທີ່ຜ່ານມາ ພ້ອມທັງສະແດງຄວາມຊົມເຊີຍຢ່າງສຸດໃຈ.
Loading...