ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 9 ກຸມພາ 2024 ນີ້ ຢູ່ທີ່ບ້ານໜອງເທົາ ເມືອງລະຄອນເພັງ ແຂວງສາລະວັນ ໄດ້ຈັດພິທີມອບ-ຮັບ ຜົນສຳເລັດໂຄງການສົມທົບທຶນກໍ່ສ້າງຝາຍນ້ຳລົ້ນຫ້ວຍຊາຍ ລະຫວ່າງຫ້ອງການກະສິກຳ-ປ່າໄມ້ເມືອງ ແລະ ອົງການປົກຄອງບ້ານໜອງເທົາ ໂດຍການເປັນປະທານຂອງ ທ່ານ ທອງດີ ຈັນທະວົງ, ເຈົ້າເມືອງລະຄອນເພັງ, ມີບັນດາການນໍາເມືອງ ແລະ ປະຊາຊົນເຂົ້າຮ່ວມ.
ພິທີໄດ້ຮັບການຜ່ານບົດລາຍງານພາກສະໜາມ ການຈັດຕັ້ງປະຕິບັດໂຄງການກໍ່ສ້າງຝາຍນ້ຳລົ້ນຫ້ວຍຊາຍ ບ້ານໜອງເທົາ ໄດ້ຮັບການກໍ່ສ້າງຂື້ນດ້ວຍທຶນສົມທົບປະຊາຊົນ ເຊີ່ງໄດ້ເລີ່ມຈັດຕັ້ງປະຕິບັດແຕ່ວັນທີ 23 ທັນວາ 2023 ມາຮອດວັນທີ 2 ກຸມພາ 2024 ແມ່ນສຳເລັດ 100% ໂດຍແມ່ນແຮງງານຂອງປະຊາຊົນພາຍໃນບ້ານໜອງເທົາ ແລະການຕິດຕາມຈາກຂະແໜງ ການກ່ຽວຂ້ອງຂອງເມືອງ ລວມມູນຄ່າການກໍ່ສ້າງທັງໝົດ 170 ລ້ານກວ່າກີບ,ໃນນີ້ທຶນງົບປະມານຂອງລັດ 70 ລ້ານກວ່າກີບ ແລະທຶນສົມທົບຂອງປະຊາຊົນ 100 ລ້ານກວ່າກີບ, ຝາຍນ້ຳລົ້ນ ມີຄວາມຍາວຄັນຝາຍກັ້ນນ້ຳ 8 ແມັດ, ຝາກັ້ນດິນ ຂ້າງລະ 2 ແມັດ(ລວມຍາວ 12 ແມັດ), ສູງ 2 ແມັດ, ຄວາມໜາ 30 ຊັງຕີແມັດ, ມີ 4 ປະຕູນ້ຳ, ໂຄງສ້າງ ແມ່ນໄຊ້ເບຕົງເສີມເຫຼັກ ແລະໄມ້ຕັນປະຕູນ້ຳ ເພື່ອກັກເກັບນ້ຳ ຕ້ານລະດູແລ້ງ ເພື່ອຕອບສະ ໜອງແກ່ການຜະລິດດ້ານກະສິກຳ ໂດຍສະເພາະແມ່ນການປູກຝັງຕາມລະດູການ ເພື່ອພັດທະນາຊິວິດການເປັນຢູ່ຂອງປະຊາຊົນ.
ຈາກນັ້ນກໍມີພິທີລົງນາມບົດບັນທຶກມອບ-ຮັບ ເຊັນມອບໂດຍທ່ານ ຄຳກອນ ວິໄລສັກ ກຳມະການພັກເມືອງ ຫົວໜ້າຫ້ອງ ການກະສິກຳ-ປ່າໄມ້ເມືອງ ເຊັນຮັບໂດຍທ່ານ ຄຳມະນີ ແສນວິໄລ ເລຂາພັກ-ນາຍບ້ານໜອງເທົາ ຊ່ອງໜ້າທ່ານ ທອງດີ ຈັນທະວົງ ກຳມະການພັກແຂວງ ເລຂາພັກເມືອງ ເຈົ້າເມືອງລະຄອນເພັັງ ແລະຜູ້ເຂົ້າຮ່ວມທັງໝົດເປັນສັກສີພະຍານ.
ໃນໂອກາດນີ້ ທ່ານ ທອງດີ ຈັນທະວົງ ເຈົ້າເມືອງລະຄອນເພັັງ ໃຫ້ກຽດມີຄຳເຫັນ ໂດຍທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ການຈັດຕັ້ງທຸກຂັ້ນ ຕະຫຼອດຮອດພໍ່ແມ່ປະຊາຊົນຊາວບ້ານໜອງເທົາ ທີ່ໄດ້ຊອກແຫຼ່ງທຶນ, ສົມທົບທຶນ ທັງປະກອບສ່ວນແຮງງານໃນການກໍ່ສ້າງຝາຍນ້ຳລົ້ນແຫ່ງນີ້ ຈົນມີຜົນສຳເລັດ ສະ ແດງໃຫ້ເຫັນເຖິງຄວາມເສຍສະຫຼະເພື່ຶອສ່ວນລວມ ຄວາມເປັນເອກະພາບ ຄວາມສາມັກຄີກັນ ພ້ອມນີ້ທ່ານຍັງຮຽກຮ້ອງເຖິິງຫ້ອງການກ່ຽວຂ້ອງ, ການຈັດຕັ້ງບ້ານຕະຫຼອດຮອດພໍແມ່ປະຊາຊົນ ໃຫ້ເລັງເຫັນຄວາມສຳຄັນຂອງໂຄງການ, ຕ້ອງໄດ້ຈັດສັນຂອບເຂດສະຫງວນ-ເຂດນຳໃຊ້, ສ້າງກົດລະບຽບ-ຂໍ້ຫ້າມ ແລະມາດຕະການລະອຽດ, ທັງຊ່ວຍກັນປົກປັກຮັກສາ ຄຸ້ມຄອງ-ນຳໃຊ້ ໃຫ້ເກີດປະໂຫຍດສູງສຸດ ແລະຍາວນານ.
ພິທີທ່ານປະທານຍັງໃຫ້ກຽດມອບໃບຍ້ອງຍໍໃຫ້ການຈັດຕັ້ງ ແລະບຸກຄົນ ທີ່ມີຜົນງານໃນໄລຍະການຈັດຕັ້ງປະຕິບັດໂຄງການດັ່ງກ່າວ ພ້ອມໃຫ້ກຽດຮ່ວມເປີດປ້າຍ ເພື່ອເປັນສິລິມຸງຄຸນຕໍ່ພີທີໃນການມອບຝາຍນ້ຳລົ້ນໃຫ້ອົງການປົກຄອງບ້ານໜອງເທົາຄັ້ງນີ້ອີກດ້ວຍ.