ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພິທີມອບ-ຮັບ ສິ່ງເສດເຫຼືອຂອງທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ລາວ

ໃນວັນທີ 4 ທັນວາ 2019, ທີ່ສະໜາມບິນສາກົນວັດໄຕ, ນະຄອນຫຼວງວຽງຈັນ, ໄດ້ມີການຈັດພິທີມອບ-ຮັບສິ່ງເສດເຫຼືອຂອງທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ລາວ, ຊຶ່ງສິ່ງເສດເຫຼືອດັ່ງກ່າວແມ່ນຜົນສໍາເລັດ ທີ່ໄດ້ຮັບຈາກການປະຕິບັດງານຮ່ວມຢູ່ພາກສະໜາມຂອງຄະນະວິຊາການລາວ-ອາເມຣິກາ ໃນການສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ລາວ ຄັ້ງທີ 01 ປະຈໍາສົກປີ 2019-2020 ຢູ່ເຂດບ້ານກົກໝາກ, ເມືອງວິລະບູລີ, ແຂວງສະຫວັນນະເຂດ ແລະ ເຂດບ້ານວັກໃຕ້, ເມືອງກະລືມ, ແຂວງເຊກອງ.

ໂດຍຕາງໜ້າໃຫ້ແກ່ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວແມ່ນ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ເປັນຜູ້ກ່າວມອບ, ສ່ວນຕາງໜ້າໃຫ້ແກ່ລັດຖະບານ ສະຫະລັດ ອາເມຣິກາ ແມ່ນ ທ່ານ Colin Crosby,  ອຸປະທູດຊົ່ວຄາວຂອງ ສະຫະລັດ ອາເມຣິກາ ປະຈໍາ ສປປ ລາວ ເປັນຜູ້ກ່າວຮັບ. ນອກນີ້, ຍັງມີເຈົ້າໜ້າທີ່ຂັ້ນສູງຈາກກະຊວງການຕ່າງປະເທດ, ກະຊວງປ້ອງກັນປະເທດ, ຫ້ອງວ່າການນະຄອນຫຼວງວຽງຈັນ ແລະ ຄະນະພະແນກການຕ່າງປະເທດນະຄອນຫຼວງວຽງຈັນ ກໍ່ໄດ້ເປັນກຽດເຂົ້າຮ່ວມ, ມີບັນດາພະນັກງານວິຊາການສອງຝ່າຍ ລາວ-ອາເມຣິກາ ທີ່ເຮັດວຽກຕົວຈິງຢູ່ພາກສະໜາມຈໍານວນໝຶ່ງກໍໄດ້ເຂົ້າຮ່ວມ, ຈໍານວນຜູ້ທີ່ເຂົ້າຮ່ວມທັງໝົດ 150 ຄົນ. ການສໍາຫຼວດ ແລະ ຂຸດຄົ້ນຄັ້ງນີ້ໄດ້ຄົ້ນພົບສິ່ງເສດເຫຼືອຂອງທະຫານອາເມຣິກາຢູ່ເຂດບ້ານກົກໝາກ, ເມືອງວິລະບູລີ, ແຂວງສະຫວັນນະເຂດ ແລະ  ຢູ່ເຂດບ້ານວັກໃຕ້, ເມືອງກະລືມ, ແຂວງເຊກອງ.

ນັບແຕ່ມື້ເລີ່ມຕົ້ນຂອງການຮ່ວມມືມາຮອດປະຈຸບັນ, ສອງຝ່າຍໄດ້ຂຸດຄົ້ນພົບສິ່ງເສດເຫຼືອຂອງທະຫານອາເມຣິກາ ແລະ ຈັດສົ່ງແລ້ວຈຳນວນ 287 ຄົນ ໃນຈໍານວນຜູ້ຫາຍສາບສູນທັງໝົດ 573 ຄົນ ຫຼືຫຼາຍກວ່າ 50% ແລະ ຍັງອີກ 286ຄົນ ທີ່ຝ່າຍອາເມຣິກາຈໍາເປັນ ແລະ ຕ້ອງການການຮ່ວມມືຈາກຝ່າຍລາວໃນການສືບຕໍ່ຄົ້ນຫາ, ຊຶ່ງລັດຖະບານ ລາວເຫັນດີຈະສືບຕໍ່ໃຫ້ການຮ່ວມມືກັບອາເມຣິກາບົນພື້ນຖານຄວາມອາດສາມາດ ແລະ ເງື່ອນໄຂຕົວຈິງຂອງຕົນ ກໍ່ຄືອີງໃສ່ບັນຍາກາດການພົວພັນຮ່ວມມື ລະຫວ່າງ ສອງປະເທດ ລາວ-ອາເມຣິກາ ໃນອະນາຄົດ.