ຕອນບ່າຍ ວັນທີ 25 ພະຈິກ 2020 ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ໄດ້ຈັດພິທີລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ໃນຍຸກການແຜ່ລະບາດຂອງ COVID 19 ທີ່ ສູນຝຶກອົບຮົມ ແລະ ຮ່ວມມືສາກົນ (ICTC) ພາຍໃຕ້ການເປັນປະທານຂອງ ດຣ ນາງ ອິນລາວັນ ແກ້ວບຸນພັນ, ປະທານສະຫະພັນແມ່ຍິງ, ຮອງປະທານຜູ້ປະຈຳການ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ. ມີບັນດາທ່ານຮອງລັດຖະມົນຕີ, ທີເປັນປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງກະຊວງ, ອົງການ, ຮອງເຈົ້າແຂວງ ທີເປັນປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແຂວງ. ນອກຈາກນີ້, ຍັງບັນດາສະຖານທູດ, ຄູ່ຮ່ວມພັດທະນາ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ, ສະມາຄົມ, ເສນາທິການຊ່ວຍວຽກ ຄກມດ ກະຊວງ, ອົງການ, ແຂວງ, ນັກສຶກສາ ແລະ ອຳນາດການປົກຄອງບ້ານ ເຂົ້າຮ່ວມທັງໝົດ 200 ກວ່າຄົນ.

          ເພື່ອເປັນການລະລຶກເຖິງ ວິລະກຳຂອງສາມເອື້ອຍນ້ອງ ຕະກູນ ມີຣາບານ (Mirabal) ຈາກສາທາລະນະລັດໂດມີນີແກນ ທີ່ຖືກ ຄາດຕະກຳຢ່າງໂຫດຮ້າຍປ່າເຖື່ອນໃນປີ 1960 ໃນລະບອບຜະເດັດການຂອງ ຣາຟາເອລ ທຣູກີໂລ (Rafael Trujillo 1930-1961) ຈຶ່ງພາໃຫ້ມີການເຄື່ອນໄຫວ ຕ້ານຄວາມຮຸນແຮງບົນພື້ນຖານທາງເພດ ເຊິ່ງມີຕົ້ນກຳເນີດມາຈາກຂະບວນການໃນທົ່ວໂລກທີ່ເຄື່ອນໄຫວຕໍ່ສູ້ເພື່ອສິດທິມະນຸດຂອງແມ່ຍິງ, ຂະບວນການໄດ້ເນັ້ນຫນັກເຖິງ ສາຍກ່ຽວພັນລະຫວ່າງແມ່ຍິງ, ຄວາມຮຸນແຮງ ແລະ ສິດທິມະນຸດ ໂດຍເລີ່ມແຕ່ວັນທີ 25 ພະຈິກ ເຖິງວັນທີ 10 ທັນວາ 1991 ເຊິ່ງໄລຍະດັ່ງກ່າວ ກວມເອົາ 4 ວັນສຳຄັນ ຄື: ວັນສາກົນຕ້ານການໃຊ້ຄວາມຮຸນແຮງຕໍ່ແມ່ຍິງ, ວັນຕ້ານເອດສ໌ ໃນທົ່ວໂລກ, ວັນຄົບຮອບການສັງຫານໝູ່ນັກສຶກສາວິສະວະກຳຍິງ 14 ຄົນ ຢູ່ນະຄອນຫລວງ ມົງເຕຼອານລ໌ ປະເທດ ການາດາ ແລະ ວັນສິດທິມະນຸດ; ວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ຖືກຮັບຮອງເອົາຢູ່ກອງປະຊຸມສະມັດຊາໃຫຍ່ ສປຊ ໃນປີ 1993 ຜ່ານຖະແຫລງການວ່າດ້ວຍການລຶບລ້າງຄວາມຮຸນແຮງຕໍ່ແມ່ຍິງ.

         ນອກຈາກນີ້, ກໍເປັນການເຜີຍແຜ່ຜົນສຳເລັດ ຂໍ້ຄົງຄ້າງ ແລະ ສິ່ງທ້າທາຍໃນການ ປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ປີ 2014-2020 ແລະ ແລະ ທິດທາງໃນຕໍ່ໜ້າ ປີ 2021-2025 ຢູ່ ສປປ ລາວ ແລະ ໃນກອບຂອງສາກົນ; ສົນທະນາແລກປ່ຽນ ກ່ຽວກັບທິດທາງຂອງການຈັດຕັ້ງພາກລັດ, ພາກເອກະຊົນ ແລະ ຄູ່ຮ່ວມພັດທະນາ ແລະ ເປັນການລະດົມທຶນການຈັດຕັ້ງປະຕິບັດວຽກການປ້ອງກັນ ແລະ ລຶບລ້າງຄວາມຮຸນແຮງຕໍ່
ແມ່ຍິງໃນຕໍ່ໜ້າ ຈາກທຸກພາກສ່ວນທີ່ກ່ຽວຂ້ອງ.
Loading...