ພິທີລົງນາມບົດບັນທຶກຄວາມເຂົ້າໃຈ ຫລື MOU ເປັນຄູ່ຮ່ວມສະໜັບສະໜູນງານວາງສະແດງຜະລິດຕະພັນລາວ ຫລື Made in Laos ລະຫວ່າງສະພາການຄ້າ ແລະ ອຸດສາຫະກໍາແຫ່ງຊາດລາວກັບບໍລິສັດ ປີໂຕຼລ້ຽມ ເທຼດດິ້ງລາວ ມະຫາຊົນ ຈັດຂຶ້ນໃນວັນທີ 26 ມັງກອນນີ້ ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ ອາລຸນແກ້ວ ກິດຕິຄຸນ ປະທານກໍາມະການຍຸດທະສາດ ແລະ ການວາງແຜນບໍລິສັດ ພີທີແອວໂຮນດີງຈໍາກັດ, ທ່ານ ມາກ ລູວັນ ຜູ້ຈັດການທົ່ວໄປ ບໍລິສັດ ປີໂຕຼລ້ຽມ ເທຼດດິ້ງລາວ ມະຫາຊົນ ພ້ອມດ້ວຍຜູ້ຕາງໜ້າຈາກກຸ່ມ, ສະມາຄົມ ຫົວໜ່ວຍທຸລະກິດ ແລະ ແຂກຮັບເຊີນ
ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວມີຄໍາເຫັນວ່າ: ຈຸດປະສົງການລົງນາມບົດບັນທຶກຄວາມເຂົ້າໃຈລະຫວ່າງສະພາການຄ້າ ແລະ ອຸດສາຫະກໍາແຫ່ງຊາດລາວກັບບໍລິສັດ ປີໂຕຼລ້ຽມ ເທຼດດິ້ງລາວ ມະຫາຊົນຄັ້ງນີ້ ເພື່ອຊຸກຍູ້ສົ່ງເສີມຜະລິດຕະພັນລາວທີ່ຜະລິດຢູ່ພາຍໃນໃຫ້ໄດ້ຄຸນນະພາບທຽບເທົ່າກັບສາກົນ ໂດຍສະເພາະຜະລິດຕະພັນທ້ອງຖິ່ນທີ່ຄົນລາວຜະລິດເອງໃຫ້ກາຍເປັນວິນຄ້າທີ່ໄດ້ມາດຕະຖານ, ສາມາດເປັນທີ່ຍອມຮັບຂອງສັງຄົມທົ່ວໄປ, ເປັນການປະກອບສ່ວນຊ່ວຍເຫລືອຜູ້ປະກອບການ ຫົວໜ່ວຍທຸລະກິດຕ່າງໆ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ 19.
ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວມີຄໍາເຫັນຕື່ມວ່າ: ບໍລິສັດປີໂຕຼລ້ຽມ ເທຼດດີ້ງລາວມະຫາຊົນຈະເປັນຄູ່ຮ່ວມມືທາງຍຸດທະສາດສະໜັບສະໜູນງານວາງສະແດງສິນຄ້າຜະລິດຕະພັນລາວ ຫລື Made in Laos ເປັນໄລຍະ 3 ປີ ເລີ່ມແຕ່ປີ 2020 ຫາ 2022 ໂດຍຈະສະໜັບສະໜູນມູນຄ່າ 200 ລ້ານກີບຕໍ່ປີ. ງານວາງສະແດງສິນຄ້າຜະລິດຕະພັນລາວ ຫລື Made in Laos ຈັດຂຶ້ນເປັນປະຈໍາທຸກໆ ປີ ເພື່ອຊຸກຍູ້ສົ່ງເສີມໃຫ້ບັນດາສະພາການຄ້າແຂວງໃນທົ່ວປະເທດໄດ້ມີສ່ວນຮ່ວມນໍາເອົາສິນຄ້າທີ່ມີຊື່ສຽງຂອງທ້ອງຖິ່ນ, ສິນຄ້າໜຶ່ງເມືອງໜຶ່ງຜະລິດຕະພັນ ຫລື ໂອດັອບມາວງາສະແດງໃຫ້ຫລາຍກວ່າເກົ່າ.%
 
Loading...