ວິທະຍຸກະຈາຍສຽງແຫ່ງຊາດຫວຽດນາມ, ລາຍງານວ່າ: ເມື່ອບໍ່ດົນມານີ້, ທ່ານ ໂຕເລິມ, ເລຂາທິການໃຫຍ່, ປະທານ ປະເທດຫວຽດນາມ ພ້ອມດ້ວຍພັນລະຍາ ໄດ້ເປັນປະທານຈັດພິທີສະເຫລີມສະຫລອງວັນຊາດ ສສ. ຫວຽດນາມ ຄົບຮອບ 79 ປີ (02 ກັນຍາ 1945–02 ກັນຍາ 2024) ຢູ່ໂຮງລະຄອນໂຮ່ເກືອມ ຮ່າໂນ້ຍ ໂດຍມີ ທ່ານ ຟ້າມມິງຈິງ, ນາຍົກລັດຖະມົນຕີ, ທ່ານ ເຈິນແທັງເໝີ້ນ, ປະທານສະພາແຫ່ງຊາດ, ພ້ອມດ້ວຍບັນດາການນຳ, ອະດີດການນຳພັກ, ລັດ, ຜູ້ຕາງໜ້ານັກປະຕິວັດຜູ້ອາ ວຸດໂສ, ຜູ້ຊົງຄຸນວຸດທິ, ນັກປັນຍາຊົນ, ຊາວໜຸ່ມດີເດັ່ນໃນທົ່ວປະເທດ ແລະ ແຂກຖືກເຊີນເຂົ້າຮ່ວມ.
ໃນໂອກາດນີ້ ທ່ານ ໂຕເລິມ ເລຂາທິການໃຫຍ່, ປະທານປະເທດ ຫວຽດນາມ ໄດ້ກ່າວຢືນຢັນວ່າ: 79 ປີຜ່ານມາ, ພາຍໃຕ້ ການນຳພາ ຂອງພັກກອມມູນິດຫວຽດ ນາມ, ທົ່ວທັງຊາດ ຫວຽດນາມ ໄດ້ສາມັກຄີກັນ, ຮ່ວມແຮງຮ່ວມໃຈ, ພ້ອມກັບ ນ້ຳໃຈສາມັກຄີສາກົນ ໂປ່ງໃສ, ນຳການປະຕິວັດຫວຽດນາມ ຍາດເອົາໄຊຊະນະ, ປົດປ່ອຍຊາດ, ໂຮມປະເທດຊາດ ເປັນເອກະພາບ, ບັນລຸຜົນສຳເລັດ ໃນພາລະກິດແຫ່ງການປ່ຽນແປງໃໝ່, ກ້າວຂຶ້ນສັງຄົມນິຍົມ. ສສ ຫວຽດນາມ ໄດ້ກາຍເປັນສັນຍາລັກຂອງສັນຕິພາບ, ສະຖຽນລະພາບ, ຮັກແພງແຂກຄົນ, ແມ່ນສະຖານທີ່ຂອງບັນດານັກລົງທຶນ ແລະ ແຂກທ່ອງທ່ຽວສາກົນ.
ຫວນຄືນ 79 ປີຜ່ານມາ. ພ້ອມທັງສະແດງຄວາມຮູ້ບຸນຄຸນຕໍ່ຄຸນງາມຄວາມດີ ຂອງປະທານ ໂຮ່ຈີມິນ, ບັນດາການນໍາຮຸ່ນກ່ອນທີ່ໄດ້ເສຍຊີວິດ,ໃນນັ້ນ,ມີທ່ານ ອະດີດ ເລຂາທິການໃຫຍ່ ຫງວຽນ ຝູຈ້ອງ, ບັນດານັກຮົບເສຍສະຫລະຊີວິດເພື່ອຊາດ, ປະຊາ ຊົນໃນທົ່ວປະເທດ; ການສະໜັບສະໜູນ, ໜູນຊ່ວຍທີ່ລ້ຳຄ່າຂອງເພື່ອນມິດສາກົນ, ປະຊາຊົນໃນໂລກໃຫ້ແກ່ ສສ ຫວຽດນາມ. ປັດຈຸບັນ ພັກ, ລັດ ແລະ ປະຊາຊົນ ຫວຽດນາມ ພວມສູ້ຊົນປະຕິບັດມະຕິກອງປະຊຸມໃຫຍ່ ຄັ້ງທີ 13 ຂອງພັກຢ່າງມີໄຊ; ນຳ ສສ ຫວຽດນາມ ກາຍເປັນປະເທດພັດທະນາ, ມີລາຍຮັບສູງ, ປະຊາຊົນມີຊີວິດ ການເປັນຢູ່ທີ່ອີ່ມໜຳສຳລານ, ສົມບູນພູນສຸກ.
ນອກນີ້ ພັກ, ລັດ ແລະ ປະຊາຊົນ ຫວຽດນາມ ປາດຖະໜາຢາກສືບຕໍ່ໄດ້ຮັບການສະໜັບສະໜູນ, ການຮ່ວມມືຢ່າງແໜ້ນແຟ້ນຂອງເພື່ອນມິດສາກົນ, ຄູ່ຮ່ວມມື ແລະ ປະຊາຊົນຜູ້ຮັກຫອມສັນຕິພາບໃນທົ່ວໂລກ, ດ້ວຍບົດບາດເປັນຂົວຕໍ່, ການຊຸກຍູ້ຂອງບັນດານັກການທູດ, ຫົວໜ້າ, ຜູ້ຕາງໜ້າບັນດາອົງການຈັດຕັ້ງສາກົນ ປະຈຳ ສສ ຫວຽດນາມ, ບັນດານັກລົງທຶນຕ່າງປະເທດທີ່ປະກອບສ່ວນໃນພາລະກິດການສ້າງສາ ແລະ ພັດທະນາປະເທດຊາດ./.
