ກອງປະຊຸມຈັດຂື້ນໃນຕອນເຊົ້າ ວັນທີ 22 ພະຈິກ 2023 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີທ່ານ ນາງ ດຣ ເພຍ ເຣເບີໂລ ບຣິດໂຕຫົວໜ້າອົງການ ອຸຍນີເຊັບ ປະຈຳ ສປປ ລາວ; ລັດຖະມົນຕີ, ຮອງລັດຖະມົນຕີ ເອກອັກຄະລັດຖະທູດ ປະເທດເພື່ອນມິດ ປະຈຳ ສປປ ລາວ;ເຈົ້າແຂວງ, ຮອງເຈົ້າແຂວງ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ແຂກຮັບເຊີນ ເຂົ້າຮ່ວມ.
ທ່ານ ສອນໄຊ ສີພັນດອນ ນາຍົກລັດຖະມົນຕີກ່າວໄຂກອງປະຊຸມວ່າ :
” ການຈັດຕັ້ງປະຕິບັດ ຂອບການຮ່ວມມື ລະຫວ່າງ ລັດຖະບານ ສປປ ລາວ ແລະອົງການ ອຸຍນີເຊັບ ໄລຍະ ຜ່ານມາ ໄດ້ປະກອບສ່ວນສໍາຄັນ ເຂົ້າໃນການພັດທະນາ ຂອງ ສປປ ລາວ, ໃນນັ້ນ ການລິເລີ່ມໂຄງການປົກປ້ອງເດັກ ໄດ້ຍົກລະດັບຄວາມເຂົ້າໃຈ ກ່ຽວກັບບັນຫາການປົກປ້ອງເດັກ ເພີ່ມຂຶ້ນ ແລະ ເຮັດໃຫ້ການແກ້ໄຂບັນຫາທີ່ສໍາຄັນມີຄວາມຄຶບໜ້າດີຂຶ້ນເຊັ່ນ: ການໃຊ້ຄວາມຮຸນແຮງຕໍ່ເດັກ, ໄດ້ມີການສໍາຫຼວດການໃຊ້ຄວາມຮຸນແຮງຕໍ່ເດັກນ້ອຍ ລະດັບຊາດ ແລະໄດ້ອອກນິຕິກໍາ ເພື່ອກຳນົດຂອບກົດຫມາຍທີ່ເຂັ້ມແຂງເພື່ອປົກປ້ອງເດັກ. ການເປີດໂຕ ແຜນຈັດຕັ້ງປະຕິບັດແຫ່ງຊາດ ຄັ້ງທຳອິດ ເພື່ອເສີມສ້າງຄວາມເຂັ້ມແຂງໃຫ້ເເກ່ລະບົບປົກປ້ອງເດັກ ໃນເດືອນມັງກອນ ປີ 2023 ນີ້ ໄດ້ເຮັດໃຫ້ ສປປ ລາວ ກາຍເປັນປະເທດໜຶ່ງໃນພາກພື້ນ ທີ່ມີການວາງແຜນປົກປ້ອງເດັກຢ່າງຮອບດ້ານ.
ມາຮອດປັດຈຸບັນ, ເຄືອຂ່າຍກ່ຽວກັບການປົກປ້ອງເດັກ ໄດ້ຖືກສ້າງຕັ້ງຂຶ້ນ ຈຳນວນ 3,004 ເຄືອຄ່າຍ, ຄະນະກໍາມະການປະສານງານ ດ້ານຄວາມຍຸຕິທໍາຂອງເດັກນ້ອຍໄດ້ຖືກສ້າງຕັ້ງຂຶ້ນ ແລະການຊ່ວຍເຫຼືອທາງດ້ານກົດຫມາຍ ແລະການບໍລິການຄວາມຫຼາກຫຼາຍຂອງຊຸມຊົນໄດ້ຮັບການຂະຫຍາຍກວ້າງຂວາງອອກ,
ຄວາມພະຍາຍາມເຫຼົ່ານີ້ ບໍ່ພຽງແຕ່ເປັນຕົວເລກເທົ່ານັ້ນ, ແຕ່ເປັນການຊີ້ໃຫ້ເຫັນເຖິງຄວາມມຸ່ງໝັ້ນທີ່ຍືນຍົງ ຂອງລັດຖະບານ ແຫ່ງ ສປປ ລາວ ໃນການສ້າງສະພາບແວດລ້ອມທີ່ເອື້້ອຍອໍານວຍໃນການປົກປ້ອງເດັກທຸກໆຄົນ ໃນ ສປປ ລາວ. ການຮ່ວມມືກັບອົງການ ອຸຍນີເຊັບ ແລະບັນດາຄູ່ຮ່ວມພັດທະນາ ແມ່ນເປັນໂອກາດທີ່ລ້ຳຄ່າ ໃນການຊຸກຍູ້ການລິເລີ່ມເຫຼົ່ານີ້, ເຊິ່ງສະແດງໃຫ້ເຫັນວ່າການຈັດຕັ້ງປະຕິບັດການຮ່ວມມືກັນ ໃນໄລຍະ 50 ປີ ຜ່ານມາ ແມ່ນໄດ້ຮັບໝາກຜົນ ຢ່າງຮອບດ້ານ “
ທ່ານ ນາງ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າ ອົງການຢູນິເຊັບ ປະຈໍາ ສປປ ລາວ, ໄດ້ກ່າວວ່າ ຕະຫຼອດໄລຍະ 5 ທົດສະວັດທີ່ຜ່ານມານີ້, ພວກເຮົາໄດ້ສ້າງຄວາມຄືບໜ້າຢ່າງໂດດເດັ່ນ ໃນການປັບປຸງຊີວິດການເປັນຢູ່ຂອງເດັກນ້ອຍ ແລະ ໄວໜຸ່ມລາວ ເຖີງວ່າຍັງມີສີ່ງທ້າທາຍຫຼົງເຫຼືອຢູ່, ຄວາມພະຍາຍາມຮ່ວມຂອງພວກເຮົານັ້ນກໍໄດ້ນຳໄປສູ່ຄວາມກ້າວໜ້າອັນສຳຄັນໃນວຽກງານການປົກປ້ອງ ແລະ ສົ່ງເສີມສິດທິເດັກ ບໍ່ວ່າຈະເປັນສິດທິຕໍ່ສຸຂະພາບທີ່ດີ, ການເຂົ້າເຖີງການສຶກສາ, ຄວາມສຸກ, ສິດໃນການຮັບການປົກປ້ອງ, ໂພຊະນາການທີ່ດີ, ສິດໃນການເຂົ້າເຖີງນ້ຳສະອາດ ແລະ ສຸຂາພິບານ, ແລະ ສິດທິໃນການມີສ່ວນຮ່ວມ.
ການສະເຫຼີມສະຫຼອງຄັ້ງນີ້ ບໍ່ພຽງແຕ່ເປັນການສະເຫຼີມສະຫຼອງຜົນສຳເລັດໃນອະດີດເທົ່ານັ້ນ ແຕ່ຍັງເປັນການຢັ້ງຢືນຄືນເຖີງຄຳໝັ້ນສັນຍາຂອງພວກເຮົາທີ່ມີຕໍ່ລູກຫຼານຂອງ ສປປ ລາວ ທຸກຄົນ ດ້ວຍເຫດນີ້, ມັນຈື່ງເປັນສິ່ງສຳຄັນທີ່ພວກເຮົາຕ້ອງເອົາໃຈໃສ່ຈັດເອົາ ເເລະ ໄວໜຸ່ມເປັນຈຸດໃຈກາງຂອງນະໂຍບາຍ ເເລະ ການລົງທຶນໃນປະເທດ ເພາະການລົງທຶນໃນເດັກ ເເມ່ນມີຄວາມສຳຄັນທີ່ສຸດເພື່ອບັນລຸເປົ້າໝາຍພັດທະນາຂອງພວກເຮົາ ແລະ ປະເທດ.
