ພິທີເຊັນບົດບັນທຶກການຮ່ວມມື ລະຫວ່າງ ແຂວງ ໄຊຍະບູລີ, ແຂວງ ພົວພັນ, ແຂວງ ຫຼວງພະບາງ ສປປ ລາວ ແລະ ແຂວງ ກວາງນິງ ສສຫວຽດນາມ ໄດ້ຈັດຂຶ້ນໃນຕອນບ່າຍຂອງວັນທີ 31 ພຶດສະພາ 2022 ທີ່ຫ້ອງປະຊຸມຂອງແຕ່ລະແຂວງ ໂດຍຜ່ານລະບົບວີດີໂອຄອນເຟັ້ນ, ໂດຍການເປັນປະທານຮ່ວມບັນດາແຂວງຄື: ທ່ານ ພົງສະຫວັນ ສິດທະວົງ, ກໍາມະການສູນກາງພັກ,ເລຂາພັກແຂວງ, ເຈົ້າແຂວງໄຊຍະບູລີ, ທ່ານວັນໄຊແພງຊຸມມາ, ກໍາມະການສູນກາງພັກ, ເລຂາພັກແຂວງ,ເຈົ້າແຂວງຫົວພັນ; ທ່ານ ຄໍາຂັນ ຈັນທະວີສຸກ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງຫຼວງພະບາງ; ທ່ານຫງວຽນຊວນກີ້, ກໍາມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງກວາງນິງ. ເປັນກຽດເຂົ້າຮ່ວມມີ ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດຜູ້ມີອໍານາດເຕັມແຫ່ງ ສປປລາວ ປະຈໍາ ຫວຽດນາມ; ທ່ານ ຫງວຽນເຕື້ອງວັນ, ຮອງເລຂາພັກແຂວງ, ປະທານຄະນະກຳມະການປະຊາຊົນແຂວງກວາງນິງ; ທ່ານ ຫງວຽນດັ້ງຮຸ່ງ, ຫົວໜ້າກົງສຸນໃຫ່ຍຫວຽດນາມທີ່ຫຼວງພະບາງ ພ້ອມຄະນະຜູ້ແທນຂອງທັງ 4 ແຂວງເຂົ້າຮ່ວມ.
ໃນພິທີຄະນະຜູ້ແທນ 4 ແຂວງ ໄດ້ພັດປ່ຽນກັນລາຍງານສະພາບໂດຍຫຍໍ້ ຂອງແຕ່ລະແຂວງໃຫ້ກັນ ແລະ ກັນໄດ້ຮັບຊາບ ແລະ ພ້ອມກັນສະຫຼຸບ, ຕີລາຄາບັນດາໝາກຜົນການຮ່ວມມືທີ່ຍາດມາໄດ້ ໃນບັນດາຂົງເຂດເສດຖະກິດ, ວັດທະນະທໍາ – ສັງຄົມໃນໄລຍະປີ 2017 – 2021, ເພື່ອແນໃສ່ເພີ່ມພູນຄູນສ້າງສາຍພົວພັນຄວາມສາມັກຄີພິເສດ, ມິດຕະພາບ ແລະ ການຮ່ວມມືລະຫວ່າງບັນດາແຂວງ: ຫົວພັນ, ຫຼວງພະບາງ, ໄຊຍະບູລີ ແລະ ແຂວງກວາງນິງ ໃນໄລຍະປີ 2022 – 2026 ບົນພື້ນຖານຄວາມສະເໜີພາບ, ສອດຄ່ອງກັບລະບຽບກົດໝາຍຂອງສອງປະເທດ, ປະກອບສ່ວນເພີ່ມທະວີສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານ, ການຮ່ວມມືຄັ້ງນີ້ໄດ້ພ້ອມກັນເຫັນດີເປັນເອກະພາບກັນບາງເນື້ອໃນຄື: ແຕ່ລະຝ່າຍເຫັນດີຈັດຕັ້ງການຢ້ຽມຢາມມິດຕະພາບ ນໍາໂດຍ ການນໍາແຂວງເປັນຫົວໜ້າຄະນະ 02 ປີ/ 1 ຄັ້ງ ໂດຍພັດປ່ຽນກັນເປັນເຈົ້າພາບລະຫວ່າງສອງຝ່າຍ 3 ແຂວງພາກເໜືອຂອງລາວ ແລະ ແຂວງກວາງນິງ ເພື່ອແນໃສ່ເພີ່ມທະວີຄວາມເຂົ້າໃຈ, ພົບປະຖອດຖອນບົດຮຽນຢູ່ໃນບັນດາຂົງເຂດພັດທະນາເສດຖະກິດ, ວັດທະນະທໍາ – ສັງ ຄົມ ແລະ ວຽກງານກໍ່ສ້າງພັກ, ອົງການປົກຄອງ, ສືບຕໍ່ຊຸກຍູ້ການຮ່ວມມືໃນບັນດາຂົງເຂດການສຶກສາ – ກໍ່ສ້າງ, ວັດທະນະທໍາ, ທ່ອງທ່ຽວ, ເສດຖະກິດ, ການຄ້າ ແລະ ບັນດາຂົງເຂດອື່ນໆທີ່ແຕ່ລະຝ່າຍມີຄວາມສົນໃຈ, ຂະຫຍາຍທ່າແຮງບົ່ມຊ້ອນ ແລະ ຄວາມຕ້ອງການຮ່ວມມືຂອງແຕ່ລະຝ່າຍ, ສືບຕໍ່ຊຸກຍູ້ສົ່ງເສີມ ແລະ ສ້າງເງື່ອນໄຂອໍານວຍຄວາມສະດວກໃຫ້ບັນດາອົງການຈັດຕັ້ງມະຫາຊົນ, ຫົວໜ່ວຍທຸລະກິດຂອງແຕ່ລະຝ່າຍ ຍູ້ແຮງບັນດາການເຄື່ອນໄຫວຮ່ວມມືຕົວຈິງ, ເອົາໃຈໃສ່ເປັນພິເສດເພື່ອຊຸກຍູ້ບັນດາການເຄື່ອນໄຫວຮ່ວມມືທາງດ້ານເສດຖະກິດ, ຈັດບັນດາກິດຈະກໍາເຄື່ອນໄຫວສົ່ງເສີມການລົງທຶນ, ການຄ້າ, ທ່ອງທ່ຽວ ບົນພື້ນຖານຕາມທ່າແຮງບົ່ມຊ້ອນຂອງແຕ່ລະຝ່າຍ, ແຕ່ລະປີ ແຂວງກວາງນິງ ຈະສືບຕໍ່ຊ່ວຍຮັບກໍ່ສ້າງຊັບພະຍາກອນມະນຸດ ໃຫ້ແກ່ບັນດາແຂວງ: ຫົວພັນ, ຫຼວງພະບາງ, ໄຊຍະບູລີ, ແຂວງລະ 20 ທຶນ ໄປຮຽນລະດັບປະລິນຍາຕີ, ຊັ້ນສູງ ຢູ່ບັນດາໂຮງຮຽນມະຫາວິທະຍາໄລ, ວິທະຍາໄລ ຂອງແຂວງກວາງນິງ, ຈາກນັ້ນ ການນໍາທັງ 4 ແຂວງກໍ່ໄດ້ພ້ອມກັນລົງນາມໃສ່ບົດບັນທຶກດັ່ງກ່າວ, ໂດຍມີຜູ້ແທນທັງ 4 ແຂວງເຂົ້າຮ່ວມເປັນສັກຂີພິຍານ.
ຂ່າວ-ພາບ: ອຸ່ນເຮືອນ ໂພທິລັກ
