ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດງານສະຫຼອງຄົບ 30 ປີ ຫັດຖະກໍາແພງໄໝ ຈັດຂຶ້ນໃນຕອນເຊົ້າວັນທີ 26 ມັງກອນ 2024 ຢູ່ບ້ານໂພນຕ້ອງ ຈອມມະນີ, ເມືອງຈັນທະບູລີ, ນະຄອນຫຼວງວຽງຈັນ ເປັນກຽດເຂົ້າຮ່ວມພິທີເປີດງານໂດຍ ທ່ານ ນາງ ນາລີ ສີສຸລິດ ພັນລະຍາ ປະທານປະເທດ ແຫ່ງ ສປປ ລາວ, ປະທານຄະນະທີ່ປຶກສາ ສະມາຄົມ ຫັດຖະກໍາລາວ ມີ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ມີບັນດາ ຕາງໜ້າສູນກາງສະຫະພັນແມ່ຍິງລາວ, ອົງການຈັດຕັ້ງສາກົນ, ຫົວໜ້າກົມ-ຮອງກົມ ຈາກບັນດາກະຊວງຕ່າງໆ ແລະ ພະແນກການກ່ຽວຂ້ອງ ເຂົ້າຮ່ວມ.
ທ່ານ ນາງ ກົງທອງ ນັນທະວົງດວງສີ ອໍານວຍການຫັດຖະກໍາ ແພງໄໝ ຂຶ້ນກ່າວປະຫວັດຄວາມເປັນມາຂອງຫັດຖະກໍາ ແພງໄໝໃຫ້ຮູ້ວ່າ: ຫັດຖະກໍາແພງໄໝ ສ້າງຕັ້ງຂຶ້ນໃນປີ 1993 ໂດຍແມ່ຍິງສິລະປິນ 3 ຄົນ, ນາງແພງ ນັນທະວົງດວງສີ ຜູ້ເປັນແມ່ ສ່ວນລູກ 2 ຄົນ ນາງກົງທອງ ແລະ ນາງວຽງຄໍາ ການຕໍ່າຫູກແບບດັ້ງເດີມ ໄດ້ຮັບການສິດສອນ ແລະ ສືບທອດ ໃນຄອບຄົວ ນັນທະວົງດວງສີ ມາເປັນເວລາຫຼາຍລຸ້ນຄົນ ແລະ ຫັດຖະກໍາແພງໄໝ ໄດ້ອຸທິດຕົນໃນການຜະລິດຕໍ່າຫູກ ແພໄໝ ທີ່ມີຄຸນນະພາບສູງ ໄດ້ມາດຕະຖານສາກົນ ຫັດຖະກໍາ ແພງໄໝ ເປັນໜຶ່ງໃນບໍລິສັດຜູ້ຜະລິດແຜ່ນແພ ທີ່ໄດ້ລົງທະບຽນເພື່ອສົ່ງອອກໃນລາວ ນັບແຕ່ລັດຖະບານລາວໄດ້ວາງອອກ ນະໂຍບາຍເປີດປະຕູສູ່ພາຍນອກ ຫັດຖະກໍາ ແພງໄໝ ໄດ້ມີການເຕີບໂຕຢ່າງຕໍ່ເນື່ອງ ແລະ ປັດຈຸບັນໄດ້ຝຶກອາຊີບໃຫ້ແກ່ຊາວຕໍ່າຫູກ ໄດ້ຫຼາຍ 100 ຄົນ.
ທ່ານ ນາງ ກົງທອງ ນັນທະວົງດວງສີ ອໍານວຍການຫັດຖະກໍາແພງໄໝ ໃຫ້ຮູ້ຕື່ມວ່າ: ຄວາມໝາຍຂອງຊື່ ຫັດຖະກໍາ ແພງໄໝ ແລະ ມີຈຸດປະສົງສ້າງຕັ້ງໃຫ້ເປັນຄັງຜ້າ ທີ່ຫາຍາກ ແພງໄໝແມ່ນມາຈາກແພງ ແມ່ນຊື່ແມ່ ແປວ່າ ຮັກ ແລະ ໄໝ ໝາຍເຖິງເສັ້ນໄໝ. ໃນສະໄໝກ່ອນທີ່ເຮົາຈະຕັ້ງ ຫັດຖະກໍາແພງໄໝ ແຜ່ນແພລາວເກົ່າແກ່ບູຮານ ໄດ້ຖືກຂາຍໄປຕ່າງປະເທດເປັນຈໍານວນຫຼວງຫຼາຍ ສະນັ້ນຈຶ່ງຈະຄິດຮັກສາບັນດາລວດລາຍ, ຮູບແບບຕ່າງໆ ເພື່ອໄວ້ໃຫ້ຄົນລຸ້ນໃໝ່ ໃຫ້ຮູ້ ແລະ ເຫັນສິລະປະອັນດີງານຂອງຊາດເຮົາ.
ໂອກາດທ້າຍນີ້ ທ່ານ ນາງ ນາລີ ສີສຸລິດ ໃຫ້ກຽດຕັດແຖບຜ້າເພື່ອເປັນສິລິມົງຄຸນໃຫ້ແກ່ພິທີເປີດງານ ສະຫລອງຄົບຮອບ 30 ປີຫັດຖະກໍາແພງໄໝ.