ພິທີເປີດປີທ່ອງທ່ຽວລາວ 2024 ພາຍໃຕ້ຄໍາຂັວນ ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ທຳມະຊາດ ເເລະ ປະຫວັດສາດ, ບຸນນະມັດສະການພະທາດຫລວງວຽງຈັນ ແລະງານວາງສະແດງສິນ ຄ້າປະຈໍາປີ 2023 ໄຂຂື້ນຢ່າງເປັນທາງການໃນວັນທີ 23 ພະຈິກ 2023 ນີ້, ທີ່ເດີນພະທາດຫລວງວຽງຈັນ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ, ມີການນໍາພັກ-ລັດ, ບັນດາ ທູດຕານຸທູດ, ຜູ້ຕາງໜ້າຈາກອົງການຈັດຕັ້ງສາກົນ ແລະມວນຊົນຊາວນະຄອນຫລວງວຽງຈັນ.
ໃນພິທີທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຮອງປະທານຄະນະຮັບຜິດຊອບຊີ້ນຳລະດັບຊາດໃນການຈັດປີທ່ອງທ່ຽວລາວ 2024 ມີຄໍາເຫັນວ່າ: ພັກ ເເລະ ລັດຖະບານລາວ ໄດ້ຖືເອົາການທ່ອງທ່ຽວເປັນຂະເເໜງການເສດຖະ ກິດໜຶ່ງທີ່ປາດສະຈາກຄວັນ, ເປັນກຳລັງເເຮງຂັບເຄື່ອນເຂົ້າໃນການພັດທະນາເສດຖະກິດ-ສັງຄົມ ເເຫ່ງຊາດ, ເປັນຂະແໜງການໜຶ່ງທີ່ພາໃຫ້ມີການສະສົມເງິນຕາ, ມີການໝູນວຽນເງິນຕາພາຍໃນປະເທດເປັນຢ່າງດີ, ສ້າງວຽກເຮັດງານທຳໃຫ້ແກ່ປະຊາຊົນໃນຂົງເຂດວຽກງານບໍລິການ, ການຜະລິດ, ເປັນຕົ້ນການຜະລິດກະສິກຳ ແລະ ຫັດຖະກຳ ໂດຍຖືເປັນການສົ່ງອອກກັບທີ່, ທັງເປັນການກະຈາຍລາຍໄດ້ໄປສູ່ທ້ອງຖິ່ນ ກໍຄືເຂດຊົນນະບົດຫ່າງໄກສອກຫຼີກ ເເລະ ຍັງຖືເອົາວຽກງານການພັດທະນາ ເເລະ ສົ່ງເສີມການທ່ອງທ່ຽວ ເປັນການຂະຫຍາຍຕົວ ແລະ ເປີດກວ້າງການພົວພັນຮ່ວມມືກັບພາຍ ນອກອີກດ້ວຍ. ພິທີເປີດປີທ່ອງທ່ຽວລາວ ເເມ່ນຈັດຂື້ນພ້ອມກັນງານສະເຫຼີມສະຫຼອງບຸນນະມັດສະ ການພຣະທາດຫຼວງ ປະຈຳປີ 2023 ທີ່ມີຄວາມໝາຍຄວາມສຳຄັນ ຊຶ່ງເປັນບຸນປະເພນີໜຶ່ງທີ່ຍິ່ງໃຫຍ່ ຂອງປວງຊົນລາວ.
ພາຍຫລັງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ສໍາເລັດການລາຍງານກ່ຽວກັບການຈັດປີທ່ອງທ່ຽວລາວ 2024 ແລ້ວ ຈາກນັ້ນທ່ານ ສອນໄຊ ສີພັນດອນ ນາຍົກລັດຖະ ມົນຕີ ໄດ້ກ່າວເປີດປີທ່ອງທ່ຽວລາວ 2024 ຢ່າງເປັນທາງການ.
ປີ 2024 ຈະມາເຖິງ ເປັນອີກປີໜຶ່ງທີ່ ສປປ ລາວ ໄດ້ກຳນົດເປັນປີທ່ອງທ່ຽວລາວ ຊຶ່ງແມ່ນຄັ້ງ ທີ 4 ນັບແຕ່ປີ 1999 ເປັນຕົ້ນມາ, ລັດຖະບານຖືເອົາການເປີດປີທ່ອງທ່ຽວລາວ 2024 ພາຍໃຕ້ຄໍາຂວັນ “ ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ” ແລະ ສັນຍາລັກ “ຊ້າງເຜືອກງວງກ້ຽວແຄນລາວ” ເປັນເຫດການໜຶ່ງ ທີ່ມີຄວາມໝາຍຄວາມສຳຄັນ ພາຍຫຼັງທີ່ຊຸມປີຜ່ານມາຂະແໜງທ່ອງທ່ຽວໄດ້ຖືກຜົນກະທົບຢ່າງໜັກໜ່ວງຈາກການລະບາດຂອງພະຍາດໂຄວິດ-19. ເພື່ອກະກຽມໃຫ້ເປີດປີທ່ອງທ່ຽວລາວ ປີ 2024, ລັດຖະບານໄດ້ແຕ່ງຕັ້ງຄະນະຮັບຜິດຊອບລະ ດັບຊາດຂຶ້ນ ແລະ ຢູ່ຂັ້ນແຂວງກໍມີຄະນະຮັບຜິດຊອບເຊັ່ນກັນ, ແນວໃດກໍຕາມວຽກງານທ່ອງທ່ຽວເປັນວຽກທີ່ກວມເອົາຂົງເຂດວຽກງານ ແລະ ຕິດພັນກັບທຸກພາກສ່ວນໃນສັງຄົມ. ສະນັ້ນຈຶ່ງຮຽກຮ້ອງໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ, ຜູ້ປະກອບການຕ່າງໆ ແລະ ປະຊາຊົນລາວບັນດາເຜົ່າທັງຊາດ ຈົ່ງພ້ອມກັນຫ້າງຫາກະກຽມການເປັນເຈົ້າພາບທີ່ດີ, ອຳນວຍຄວາມສະດວກ ແລະ ບໍລິການດ້ວຍໄມຕີຈິດມິດຕະພາບດ້ວຍຮອຍຍິ້ມ, ດ້ວຍສຽງຫົວຈາກໃຈຈິງ ຂອງຄົນລາວ ເພື່ອຕ້ອນຮັບນັກທ່ອງທ່ຽວທີ່ມາຈາກທົ່ວທຸກມູມໂລກ. ຖືເອົາການເປີດປີທ່ອງທ່ຽວລາວ ປີ 2024 ນີ້ ເປັນບັ້ນໂຄສະ ນາວັດທະນະທຳ, ຮີດຄອງປະເພນີອັນດີງາມຂອງຊາດໃຫ້ຊາວໂລກໄດ້ຮັບຮູ້, ໄດ້ສຳພັດຢ່າງກວ້າງຂວາງ, ປະທັບໃຈ ແລະ ສະບາຍອົກສະບາຍໃຈຄືກັນກັບຢູ່ບ້ານເມືອງຂອງເພີ່ນເອງ ເພື່ອໃຫ້ນັກທ່ອງທ່ຽວທີ່ໄດ້ມາ ສປປ ລາວ ແລ້ວຮູ້ສຶກຄິດຮອດ ແລະ ຢາກກັບມາທ່ຽວ ສປປ ລາວ ອີກ.
ສໍາລັບບຸນນະມັດສະການພະທາດຫຼວງວຽງຈັນ ແລະງານວາງສະແດງສິນ ຄ້າປະຈໍາປີ 2023 ຈະດຳ ເນີນໄປເປັນເວລາ 5 ວັນ ນັບແຕ່ວັນທີ 23-27 ພະຈິກນີ້ ໂດຍມີຮ້ານວາງສະແດງ ແລະຂາຍສິນຄ້າຫລາຍກວ່າ 1.200 ຮ້ານ, ພິທີທາງສາສະໜາ ແລະ ບັນດາກິດຈະກໍາປິ່ນອ້ອມ ພົ້ນເດັ່ນແມ່ນການສະແດງສິລະປະວັນນະຄະດີ (ຢູ່ເວທີກາງ) ຈາກຫຼາຍພາກສ່ວນ ເພື່ອໂຄສະນາເຜີຍແຜ່ວັດທະນະທໍາອັນດີງາມຂອງຊາດລາວ ໃຫ້ນັກທ່ອງທ່ຽວທັງພາຍໃນ ແລະຕ່າງປະ ເທດໄດ້ສຳພັດ ແລະ ຮ່ວມມ່ວນຊື່ນ; ນອກຈາກກິດຈະກຳທີ່ຈັດຂື້ນຢູ່ສະໜາມຫຼວງແລ້ວ, ຍັງມີການວາງສະແດງ ແລະຂາຍສິນ ຄ້າ ຢູ່ສູນການຄ້າ ລາວ-ໄອເຕັກ ຊຶ່ງເນັ້ນໃສ່ຜະລິດຕະພັນສິນຄ້າພາຍໃນເປັນ ຕົ້ນຕໍ ເຊັ່ນ: ຜະລິດຕະພັນສິນຄ້າກະສິກຳ; ຫັດຖະກຳ ແລະຜະລິດຕະພັນວັດທະນະທຳ; ຜະລິດຕະພັນອຸດສາຫະກຳໂຮງຈັກ, ໂຮງງານຂະໜາດໃຫຍ່, ກາງ ແລະ ຂະໜາດນ້ອຍ ຊຶ່ງນອກຈາກເປັນການ ສ້າງໂອກາດໃຫ້ມີການແລກປ່ຽນຊື້ຂາຍສິນຄ້າ ຍັງຖືໂອກາດໃຫ້ທຸລະກິດພາຍໃນ ແລະຕ່າງປະເທດ ໄດ້ພົບພໍ້ ແລະພົວພັນຮ່ວມມືກັນ; ອັນພິເສດໃນປີນີ້ຄະນະຮັບຜິດຊອບໄດ້ເຊີນບັນດານະຄອນເພື່ອນມິດຕ່າງປະເທດເຂົ້າມາຮ່ວມ ແລະ ສ້າງເງື່ອນໄຂໃຫ້ນໍາເອົາຜະລິດຕະພັນສິນຄ້າມາແລກປ່ຽນວາງສະ ແດງ ແລະ ຂາຍໃນງານຕື່ມອີກ.
ຂ່າວ : ຈັນທະສອນ ສີຫານາດ
ພາບ : ອະພິນຍາ ສຸລິຍະວົງ
