ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດປີທ່ອງທ່ຽວ 2024 ຂອງແຂວງຊຽງຂວາງ ໄດ້ຈັດຂຶ້ນໃນຕອນແລງ ວັນທີ 26 ມັງກອນ 2024 ຢູ່ເຂດພັດທະນາຂອງກຸ່ມບໍລິສັດລາວສຳພັນຈຳກັດ ໂດຍການເປັນປະທານຂອງທ່ານ ບຸນຈັນ ສີວົງພັນ ເລຂາພັກແຂວງ ເຈົ້າແຂວງຊຽງຂວາງ.
ທ່ານ ສີວິໄລ ແສງຈະເລີນ ຮອງເຈົ້າແຂວງ ປະທານຄະນະກຳມະການຈັດງານເປີດປີທ່ອງທ່ຽວຂັ້ນແຂວງ ໄດ້ໃຫ້ກຽດຂຶ້ນລາຍງານກ່ຽວກັບການພັດທະນາ ແລະແຜນການສົ່ງເສີມກິດຈະກຳຕ່າງໆ ທີ່ຕິດພັນກັບການທ່ອງທ່ຽວໃນລະດັບຕ່າງໆ ໃນທົ່ວແຂວງ ໂດຍເນື້ອໃນສຳຄັນບາງຕອນທ່ານໄດ້ກ່າວວ່າ: ເພື່ອເຮັດໃຫ້ປີທ່ອງທ່ຽວ 2024 ຢູ່ແຂວງຊວງຂວາງ ມີບັນຍາກາດຟົດຟື້ນມີຄວາມປະທັບໃຈ ຊຽງຂວາງໄດ້ກຳນົດເອົາ 11 ກິດຈະ ກຳ ໃນນັ້ນລະດັບຊາດ 1 ກິດຈະກຳ ຂັ້ນແຂວງ 3 ກິດຈະກຳ ແລະຂັ້ນເມືອງ 7 ກິດຈະກຳ ເຊັ່ນ: ບຸນເຂົ້າໄກ່ນ້ອຍ ບຸນປີໃໝ່ລາວ ບຸນຖ້ຳປິວ ບຸນກິນຈຽງ ເທດສະການດອກຄາຍບານເມືອງໜອງແຮດ ເທດສະການປະກວດງົວງາມເມືອງໝອກ ບຸນພະທາດແປດຫລ່ຽມມິ່ງຂວັນເມືອງພວນເມືອງຄູນ ບຸນແຂ່ງມ້າເມືອງຜາໄຊ ງານສະເຫລີມສະຫລອງໄຫຫີນເຂົ້າເປັນມໍລະດົກໂລກ ແລະ ອື່ນໆ ໂດຍຈະໄດ້ຜັດປ່ຽນກັນຈັດຢູ່ແຕ່ລະເມືອງ ຕາມວາລະທີ່ໄດ້ກຳນົດໄວ້ໃນປະຕິທິນທ່ອງທ່ຽວຂອງແຂວງ.