ພິທີດັ່ງກ່າວຈັດຂື້ນໃນ ວັນທີ 28 ຕຸລາ 2022 ທີ່ໂຮງແຮມຄຣາວພລາຊ່າ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ສຸຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ອະດູໂຣ ຣອມໂບຣີ ຜູ້ຕາງໜ້າຈາກອົງການຢູນິເຊັບປະຈໍາລາວ, ທ່ານ ເຄວິນ ສະວິດ ຫົວໜ້າຝ່າຍໂຄງການອົງການພັດທະນາສາກົນປະເທດສະຫະລັດອາເມຣິກາ, ມີບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກການ, ຜູ້ອໍານວຍການສະຖາບັນ, ໂຮງຮຽນ, ຄູ-ອາຈານ, ນັກຮຽນ ພ້ອມດ້ວຍພາກສ່ວນກ່ຽວຂ້ອງຈາກກະຊວງສາທາລະນະສຸກ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງສຶກສາທິການ ແລະ ກິລາ ແລະ ແຂກຮັບເຊີນເຂົ້າຮ່ວມ.
ທ່ານ ສຸຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ ມີຄໍາເຫັນກ່າວໂຂກອງປະຊຸມວ່າ: ເດັກໃນວັນນີ້ ຈະເປັນຜູ້ໃຫຍ່ໃນວັນໜ້າ ຖ້າຫາກເດັກໄດ້ຮັບການກະຕຸກຊຸກຍູ້ ແລະ ສົ່ງເສີມຕັ້ງແຕ່ຢູ່ໃນທ້ອງແມ່ເປັນຕົ້ນມາ; ສະນັ້ນ ການສຶກສາກ່ອນ ໄວຮຽນແມ່ນມີຄວາມສໍາຄັນຫຼາຍເພາະເປັນການປູພື້ນ ຖານໃນການພັດທະນາຊັບພະຍາກອນມະນຸດ ໂດຍເລີ່ມຈາກການດູແລເບິ່ງແຍງ, ການປົກປ້ອງ ແລະ ສຶກສາອົບຮົມເດັກ ເພື່ອພັດທະນາ ແລະ ສົ່ງເສີມໃຫ້ເດັກໄດ້ມີການຂະຫຍາຍຕົວທີ່ເໝາະສົມຕາມເກນອາຍຸໃຫ້ໄດ້ຮັບການສົ່ງເສີມພັດທະນາດ້ານຮ່າງກາຍ, ສະຕິປັນຍາ, ອາລົມຈິດໃຈ ແລະ ສັງຄົມ ຕະຫຼອດຮອດການຮຽນຮູ້ປະສົບການຊີວິດເພື່ອກຽມຄວາມພ້ອມເຂົ້າຮຽນຊັ້ນປະຖົມສຶກສາຢ່າງມີຄຸນະພາບ.
ເຊິ່ງລັດຖະບານໄດ້ໃຫ້ຄວາມສໍາຄັນຕໍ່ວຽກງານນີ້ ໂດຍສະເພາະ ກະຊວງສຶກສາທິການ ແລະ ກິລາໄດ້ຈັດເປັນບູລິມະສິດທີ 1 ຂອງແຜນພັດທະນາການສຶກສາຂະແໜງການຍ່ອຍ ເຊິ່ງໄດ້ສົມທົບກັບບັນດາຄູ່ຮ່ວມພັດທະນາໃນການສະໜອງງົບປະມານ, ວັດຖຸ, ອຸປະກອນ, ສື່ການຮຽນການສອນ ແລະ ສິ່ງອໍານວຍຄວາມສະດວກຕ່າງໆເຂົ້າໃສ່ວຽກງານການສຶກສາກ່ອນໄວຮຽນດ້ວຍຄວາມເອົາໃຈໃສ່ສູງ ໂດຍໃຫ້ຄວາມເປັນເອກະພາບກັນໃນການປະຕິບັດກັບລູກລະຫວ່າງຄອ[ຄົວ, ໂຮງຮຽນ, ຊຸມຊົນ ແລະ ສັງຄົມ.
ລາຍການໂທລະພາບ “ ເຮືອນຂອງຂ້ອຍ “ ສໍາລັບເດັກກ່ອນໄວຮຽນພາກທີ 1 ຜະລິດຂື້ນມາໃນປີ 2020 ປະກອບມີ 10 ຕອນ, ປີ 2021 ປະກອບມີ 12 ຕອນ ໄດ້ອອກອາກາດຜ່ານໂທລະພາບແຫ່ງຊາດລາວຊ່ອງ 3, ຊ່ອງລາວສະຕາ ແລະ ຊ່ອງລາວແຊັດຂອງກະຊວງສຶກສາທິການ ແລະ ກິລາ, ສໍາລັບປີ 2022 ນີ້, ແມ່ນໄດ້ສືບຕໍ່ຜະລິດລາຍການໂທລະພາບສໍາລັບເດັກກ່ອນໄວຮຽນພາກທີ 3 ປະກອບມີ 12 ຕອນ ມີເນື້ອໃນເນັ້ນເຖິງການສືບຕໍ່ໃຫ້ເດັກໄດ້ຮຽນຮູ້ ພາຍຫຼັງກັບຄືນສູ່ໂຮງຮຽນ ໂດຍສະເພາະສະຖານະການສຶກສາກ່ອນໄວຮຽນ ພາຍຫຼັງທີ່ພະຍາດໂຄວິດ 19 ມີການຜ່ອນຜັນລົງ ເພື່ອສົ່ງເສີມໃຫ້ເດັກໄດ້ຮຽນຮູ້ທາງດ້ານການອ່ານ, ການຂຽນ, ພື້ນຖານດ້ານຄະນິດສາດ, ວິທະຍາສາດທໍາມະຊາດ, ດ້ານສັງຄົມ ແລະ ຄວາມຮູ້ດ້ານສຸຂະສຶກສາ, ການຮັກສາອະນາໄມປ້ອງກັນພະຍາດ, ຂໍ້ຄວາມສໍາຄັນໃຫ້ພໍ່ແມ່ຜູ້ປົກຄອງໄດ້ເອົາໃຈໃສ່ໃນການລ້ຽງດູເດັກຕັ້ງ ແຕ່ຢູ່ໃນທ້ອງແມ່, ການສົ່ງເສີມການຮຽນຮູ້ໃຫ້ແກ່ເດັກໃນຄອບຄົວກໍຄືໂຮງຮຽນ ໂດຍຜ່ານກາຕູນອະນິເມຊັນ, ນິທານ ແລະ ບົດເພງ ຕາມເນື້ອໃນແຕ່ລະຕອນ ພ້ອມທັງປະກອບມີພາສາມືເພື່ອໃຫ້ເດັກທຸກຄົນເຂົ້າເຖິງລາຍການນີ້ໃຫ້ຫຼາຍຂື້ນ.
ການຜະລິດລາຍການໂທລະພາບ “ ເຮືອນຂອງຂ້ອຍ “ ສໍາລັບເດັກກ່ອນໄວຮຽນໄດ້ຮັບການຮ່ວມມືລະຫວ່າງກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ອົງການຢູນິເຊັບປະຈໍາລາວເຊິ່ງຜູ້ຜະລິດແມ່ນບໍລິສັດລາວສະຕາ ແລະ ກາຕູນອະນິເມຊັນ ໂດຍໄດ້ຮັບການສະໜັບສະໜູນຈາກສະຫະພາບເອີຣົບ, ອົງການພັດທະນາສາກົນຂອງປະເທດສະຫະລັດອາເມລິກາ ແລະ ທຸດອົດສະຕາລີປະຈໍາລາວ.
ຂ່າວ : ບັນລັນທອງ ກຽງຄຳຊົນນີ
ພາບ : ພູເງິນ ບົວທອງ
