ຕອນເຊົ້າວັນທີ 26 ມີນາ 2021 ສະຫະພັນແມ່ຍິງເມືອງຮົ່ມໄດ້ຈັດພິທີເປີດສູນອົບຮົມວິຊາຊີບແມ່ຍິງ ເມືອງຮົ່ມ ໂດຍໃຫ້ກຽດເປັນປະທານຂອງທ່ານ ນາງ ບົວຈັນ ສີຫາລາດ ຮອງປະທານສູນກາງສະຫະພັນແມ່ຍິງລາວ, ການນໍາຂັ້ນແຂວງ, ຂັ້ນເມືອງ ແລະ ບັນດາຫົວໜ້າ ຄະນະຫ້ອງການ, ນາຍບ້ານຜາລະແວກ ພ້ອມດ້ວຍສະມາຊິກສະພັນແມ່ຍິງເມືອງ, ບ້ານເຂົ້າຮ່ວມທັງໝົດ 30 ທ່ານ, ຊາຍ 16 ທ່ານ.

ໃນພິທີທ່ານ ນາງ ມະນີວັນ ຢ່າທໍ່ຕູ້ ກໍາມະການພັກເມືອງ, ປະທານສະຫະພັນແມ່ຍິງເມືອງໄດ້ຜ່ານບົດສະຫຼຸບກ່ຽວກັບການສ້ອມແປງສູນວິຊາຊີບໃນໄລຍະ 6 ເດືອນຜ່ານມາ ໃນບົດສະຫຼຸບຊີ້ໃຫ້ເຫັນເຖິງຄວາມເອົາໃຈໃສ່ຂອງຄະນະສະຫະພັນແມ່ຍິງເມືອງ ເຊິ່ງໄດ້ນໍາພາໜ່ວຍສະຫະພັນແມ່ຍິງບ້ານຜາລະແວກ ອະນາໄມອ້ອມສະຖານທີ່ສູນວິຊາຊີບໄດ້ 2 ຄັ້ງ, ຂໍແຮງງານໜ່ວຍຊາວໜຸ່ມຮາກຖານກຸ່ມການເມືອງຊ່ວຍຍ້າຍໂຕະຕັ່ງເກົ່າຢູ່ໃນຫ້ອງອອກໃຫ້ທາງບ້ານຜາລະແວກ 1 ຄັ້ງ, ການສ້ອມແປງສູນວິຊາຊີບຫຼັງນີ້ໂຄງຫຼັງຄາມຸງດ້ວຍກະເບື້ອງ, ພື້ນປູກະໂລ, ກໍ່ເຄິ່ງໜື່ງດ້ວຍກ້ອນຫີນ ແລະ ເຄິ່ງໜື່ງດ້ວຍຊາຍປ໋ອກ, ຕີເພດານ ແລະ ໄດ້ດຶງສາຍໄຟຟ້າເຂົ້າສໍາເລັດສູນອົບຮົມວິຊາຊີບປະກອບດ້ວຍເຄື່ອງຈັກຫຍິບ 8 ເຄື່ອງ, ເຕົາລິກ 1 ໜ່ວຍ, ຈັກແຊັກ 2 ເຄື່ອງ ແລະ ອຸປະກອບຮັບໃຊ້ຕັດຫຍິບຈໍານວນໜື່ງ ທຶນສ້ອມແປງສູນອົບຮົມວິຊາຊີບ ແລະ ຊື້ຈັກຫຍິບທັງໝົດໄດ້ຈາກການສະໜັບສະໜູນຈາກອົງການສະຫະປະຊາຊາດຈໍານວນ 99,389,000 ກີບ (ຂຽນຕົວໜັງສຶເກົ້າສິບເກົ້າລ້ານສາມຮ້ອຍແປດສິບເກົ້າພັນກີບ).

ພ້ອມນີ້ຈະໄດ້ແຕ່ງຕັ້ງຄະນະຮັບຜິດຊອບຄຸ້ມຄອງສູນວິຊາຊີບໃຫ້ມີຄວາມເປັນລະບຽບ ແລະ ຈະກຽມອົບຮົມການຕັດຫຍິບໄລຍະ 3 ເດືອນໃຫ້ສະມາຊິກສະຫະພັນແມ່ຍິງໃຫ້ໄດ້ 2 ຊຸດຕໍ່ປີ.

ຕອນທ້າຍທ່ານ ນາງ ບົວຈັນ ສີຫາລາດ ຮອງປະທານສູນກາງສະຫະພັນແມ່ຍິງລາວມີຄໍາເຫັນໂອ້ລົມທ່ານໄດ້ຊີ້ໃຫ້ເຫັນເຖິງຄວາມສໍາຄັນໃນການສ້າງສູນອົບຮົມວິຊາຊີນການຕັດຫຍິບວ່າ: ເພື່ອສ້າງຄວາມເຂັ້ມແຂງໃຫ້ແກ່ເອື້ອຍນ້ອງແມ່ຍິງ, ມີວຽກເຮັດງານທໍາເປັນການສ້າງລາຍຮັບໃຫ້ແກ່ຄອບຄົວ ແລະ ຂໍໃຫ້ສູນອົບຮົມວິຊາຊີບແຫ່ງນີ້ກາຍເປັນສູນບໍລິການວິຊາຊີບທີ່ເຂັ້ມແຂງ, ເປັນແບບຢ່າງໃຫ້ສູນອົບຮົມວິຊາຊີບແຫ່ງຕໍ່ໆໄປ.

Loading...