ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພິທີແຫ່ຜາສາດເຜິ້ງ ບຸນນະມັດສະການພະທາດຫລວງປະຈໍາປີ 2019 ຈັດຂຶ້ນຢ່າງຍິ່ງໃຫ່ຍແລະຄຶກຄື້ນ

ພິທີແຫ່ຜາສາດເຜິ້ງ ໃນບຸນນະມັດສະການພະທາດຫລວງປະຈໍາປີ ­2019 ຈັດຂຶ້ນຢ່າງຍິ່ງໃຫ່ຍແລະຄຶກຄື້ນ ໃນຕອນບ່າຍ ວັນທີ 10 ພະຈິກ2019 ໂດຍການເຂົ້າຮ່ວມຂອງທ່ານ ສີລາວົງ ຄຸດໄພທູນເຈົ້າຄອງນະຄອນຫລວງວຽງຈັນ, ມີການນໍາຂັ້ນສູນກາງ, ນະຄອນຫລວງວຽງຈັນ, ເມືອງຕ່າງໆພ້ອມດ້ວຍມວນຊົນຊາວນະຄອນຫລວງວຽງຈັນ, ແຂກພາຍໃນແລະຕ່າງປະເທດເຂົ້າຮ່ວມຢ່າງຫລວງຫລາຍ.

ພິທີແຫ່ຜາສາດເຜິ້ງເລີ່ມຈາກສວນ 23 ສິງຫາ ບ້ານໜອງບອນ ເມືອງໄຊເຊດຖາ ນະຄອນຫລວງວຽງຈັນ ເວລາ 13.30 ໂມງ ເຖິງພະທາດຫລວງເວລາ 14ໂມງ.

ການແຫ່ຜາສາດເຜິ້ງ ເປັນປະເພນີກ່ຽວພັນກັບພິທີທາງສາສະໜາ ແມ່ນວັດທະນະທໍາອັນດີງາມ ສະແດງເຖິງຄວາມພາກພຽນ ການປະດິດສ້າງ ພ້ອມທັງເປັນການເຕົ້າໂຮມຄວາມສາມັກຄີລະຫວ່າງຄອບຄົວ, ບ້ານແລະເມືອງ ໂດຍຈັດຂຶ້ນທຸກໆປີໃນມື້ທີສອງຂອງການສະເຫລີມສະຫລອງບຸນນະມັດສະການພະທາດຫລວງ ກົງກັບມື້ຂຶ້ນ14ຄໍ່າ ເດືອນສິບສອງຂອງລາວ, ເຊິ່ງປີນີ້ກົງກັບວັນທີ 10 ພະຈິກ ­2019 .

ໂດຍຊາວນະຄອນຫລວງວຽງຈັນ ໄດ້ພ້ອມຈິດໃຈກັນເຮັດຕົ້ນເຜິ້ງຂອງໃຜຂອງລາວ ບາງບ້ານ, ບາງເມືອງເຮັດຕົ້ນເຜິ້ງໃຫ່ຍຕາມສັດທາຂອງຕົນ, ໃນຂະບວນແຫ່ມີຫລາຍສີສັນແຕກຕ່າງກັນ ຄື: ມີຂະບວນທັ່ງບັ້ງ, ຂະບວນຊຸດຊົນເຜົ່າ, ຕໍາເຂົ້າ,ເປົ່າແຄນ ພ້ອມທັງຕີກອງ, ຕີແຊ່ງລໍາເຊີ້ງ, ມີຂະບວນນັກຮຽນ, ຂະບວນປະເພນີລາວ, ຍິງສາວນຸ່ງຊຸດໄໝເກົ້າຜົມບ່ຽງແພ, ຜູ້ຊາຍນຸ່ງເສື້ອຂາວມັດແພກັດຕ່ຽວ, ຂະບວນເຖົ້າແກ່ແນວໂຮມ ນໍາໜ້າໂດຍຂະບວນພະສົງແລະຜູ້ນໍາພັກ,ລັດເຂົ້າສູ່ພະທາດຫລວງ ແລະແຫ່ອ້ອມກົມມະລຽນ 3ຮອບ ໝາຍເຖິງຄຸນພະພຸດ, ພະທໍາ ແລະພະສົງ.