ພິທີ ມອບ-ຮັບໜ້າທີ່ ລະຫວ່າງ ຄະນະປະຈຳສະພາປະຊາຊົນແຂວງຄຳມ່ວນ ຊຸດທີ I ແລະ ຊຸດທີ II

 ພິທີ ມອບ-ຮັບ ໜ້າທີ່ຂອງຄະນະປະຈຳສະພາປະຊາຊົນແຂວງຄຳມ່ວນ ຊຸດທີ I ແລະ ຊຸດທີ II ໄດ້ຈັດຂຶ້ນ ໃນວັນທີ 25 ພຶດສະພາ 2021 ທີ່ເຮືອນຮັບແຂກເລກ 1 ແຂວງຄຳມ່ວນ ໂດຍມີທ່ານ ວັນໄຊ ພອງສະຫວັນ ກຳມະການ ສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 12 ແຂວງຄຳມ່ວນ, ສະມາຊິກສະພາປະຊາຊົນແຂວງ ແລະ ບັນດາຫົວໜ້າພະແນກການອ້ອມຂ້າງແຂວງເຂົ້າຮ່ວມ.

 ທ່ານ ບຸນທອມ ແສງອາລຸນ ເລຂາທິການສະພາປະຊາຊົນແຂວງ ຊຸດທີ I ໄດ້ຜ່ານບົດບັນທຶກການ ມອບ-ຮັບ ໜ້າທີ່ຂອງຄະນະປະຈຳສະພາປະຊາຊົນແຂວງ ໃນນັ້ນແມ່ນໄດ້ຍົກໃຫ້ເຫັນຜົນສຳເລັດໃນການຊີ້ນຳໆພາ ຈັດຕັ້ງປະຕິບັດ ວຽກງານໃນໄລຍະ 05 ປີຂອງສະພາປະຊາຊົນແຂວງ ຊຸດທີ I ຜ່ານມາ. ໂດຍສະເພາະແມ່ນການຊີ້ນຳບັນດາ ຄະນະ ກຳມະການ ແລະ ເລຂາທິການສະພາປະຊາຊົນແຂວງ ຄົ້ນຄວ້າ, ພິຈາລະນາຮ່າງນິຕິກຳທີ່ອົງການປົກຄອງແຂວງສະເໜີມາໄດ້ 09 ສະບັບ, ນຳພາສ້າງນິຕິກຳພາຍໃນສະພາປະຊາຊົນແຂວງໄດ້ 14 ສະບັບ, ພິຈາລະນາບັນຫາສຳຄັນ ຂອງທ້ອງຖິ່ນ ເປັນຕົ້ນແມ່ນ ໄດ້ລົງມະຕິຮັບຮອງການສະເໜີຂອງທ່ານເຈົ້າແຂວງ ກ່ຽວກັບບົດສະຫຼຸບການຈັດຕັ້ງ ປະຕິບັດ ແລະ ທິດທາງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ແຕ່ປີ 2016-2021, ການສະເໜີແຕ່ງຕັ້ງ, ເລືອກຕັ້ງບຸກຄະລາກອນທີ່ດຳລົງຕຳແໜ່ງໃນອົງການປົກຄອງແຂວງ, ອົງການໄອຍະການ ປະຊາຊົນ-ສານປະຊາຊົນແຂວງ, ພິຈາລະນາ ແລະ ຮັບຮອງເອົາແຜນດັດແກ້ດ້ານງົບປະມານຂອງລັດ, ດັດແກ້ມູນຄ່າ ການລົງທຶນຂອງລັດ, ການຕິດຕາມ, ກວດກາການຈັດຕັ້ງປະຕິບັດວຽກງານຂອງອົງການປົກຄອງແຂວງ, ການພັດທະນາ ຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ການຍົກຍ້າຍຈັດສັນພູມລຳເນົາ, ຕິດຕາມ, ກວດກາຄຸນນະພາບໂຄງການກໍ່ສ້າງຕ່າງໆ ດ້ວຍງົບປະມານຂອງລັດ, ລົງພົບປະກັບພໍ່ແມ່ປະຊາຊົນຜູ້ມີສິດປ່ອນບັດເລືອກຕັ້ງໄດ້ 654 ຈຸດ, ມີຜູ້ເຂົ້າຮ່ວມຮັບຟັງ 102.546 ຄົນ, ໄດ້ປະສານສົມທົບກັບພະແນກການກ່ຽວຂ້ອງ ພິຈາລະນາດຳເນີນ ການແກ້ໄຂຄະດີໄດ້ 744 ເລື່ອງ, ຍັງສືບຕໍ່ແກ້ໄຂ 01 ເລື່ອງ ແລະ ບັນດາວຽກງານອື່ນໆທີ່ມີຜົນສຳເລັດໃນຫຼາຍດ້ານ. ໂອກາດດຽວກັນກໍ່ໄດ້ມີການເຊັນ ມອບ-ຮັບ ໜ້າທີ່ ລະຫວ່າງ ຄະນະປະຈຳສະພາປະຊາຊົນຂັ້ນແຂວງ ຊຸດທີ I ເຊິ່ງຕາງໜ້າໂດຍທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ ຊຸດທີ I ກັບ ຄະນະປະຈຳສະພາປະຊາຊົນ ຂັ້ນແຂວງ ຊຸດທີ II ຕາງໜ້າໂດຍທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ ຊຸດທີ່ II.

 ໃນໂອກາດທີ່ເຂົ້າຮ່ວມພິທີການ ມອບ-ຮັບ ໜ້າທີ່ດັ່ງກ່າວ ທ່ານເຈົ້າແຂວງຄຳມ່ວນ ກໍ່ໄດ້ກ່າວມີຄຳເຫັນ ແລະ ໄດ້ຮຽກຮ້ອງມາຍັງຄະນະສະພາປະຊາຊົນຂັ້ນແຂວງ ຊຸດທີ II ຈົ່ງໄດ້ສືບຕໍ່ເສີມຂະຫຍາຍມູນເຊື້ອດ້ານດີ ຂອງຄະນະປະຈຳສະພາປະຊາຊົນແຂວງ ຊຸດທີ I ໃຫ້ເຂົ້າສູ່ການຈັດຕັ້ງປະຕິບັດຕົວຈິງ ແລະ ເປັນຮູບປະທຳຫຼາຍຂຶ້ນ, ສືບຕໍ່ເພີ່ມທະວີໃນການປະຕິບັດໜ້າທີ່ຂອງສະພາປະຊາຊົນທ້ອງຖິ່ນ ຕາມພາລະບົດບາດທີ່ສຳຄັນເປັນຕົ້ນແມ່ນ ການຄົ້ນຄວ້າທາງດ້ານນິຕິກຳຕ່າງໆ, ການຄົ້ນຄວ້າບັນຫາສຳຄັນພື້ນຖານຂອງແຂວງ ແລະ ການເຮັດໜ້າທີ່ຕິດຕາມ, ກວດກາການຈັດຕັ້ງປະຕິບັດລະບຽບກົດໝາຍຂອງອົງການປົກຄອງຂັ້ນທ້ອງຖິ່ນ ເພື່ອເຮັດໃຫ້ການບໍລິຫານລັດໃນຂັ້ນທ້ອງຖິ່ນມີຄວາມເຂັ້ມແຂງຂຶ້ນກວ່າເກົ່າ, ສືບຕໍ່ຜັນຂະຫຍາຍມະຕິຂອງກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ກໍ່ຄືມະຕິຂອງກອງປະຊຸມຄັ້ງປະຖົມມະລຶກຂອງສະພາປະຊາຊົນຂັ້ນແຂວງ ຊຸດທີ II ພ້ອມທັງສືບຕໍ່ຄົ້ນຄວ້າສ້າງກົນໄກການປະຊຸມຮ່ວມກັບອົງການປົກຄອງແຂວງ ເພື່ອປຶກສາຫາລື ແລະ ແກ້ໄຂບັນຫາຮີບດ່ວນທີ່ຈຳເປັນ ໂດຍສະເພາະບັນຫາຄຳຮ້ອງຟ້ອງ, ຄຳສະເໜີຂອງທ້ອງຖິ່ນ ເພື່ອແກ້ໄຂບັນຫາໃຫ້ທັນກັບສະພາບການ.