ຫ້ອງການສາທາລະນະສຸກ ເມືອງຊະນະຄາມ ແຂວງວຽງຈັນສະຫຼຸບຜົນງານ ປະຈໍາ 2020 ແລະ ທິດທາງແຜນການ ປະຈໍາປີ 2021 ໄດ້ຈັດຂຶ້ນໃນຕອນເຊົ້າຂອງວັນທີ 31 ທັນວາ 2020 ທີ່ຜ່ານມາ, ໂດຍພາຍໃຕ້ການເປັນປະທານ ຂອງທ່ານ ໂພຄໍາ ແສງລະດີ ກໍາມະການພັກເມືອງ ຫົວໜ້າຫ້ອງການສາທາລະນະສຸກເມືອງ ແລະ ໃນພິທີທີ່ມີຄວາມໝາຍ-ຄວາມສໍາຄັນດັ່ງກ່າວ ຍັງໄດ້ເປັນກຽດຕ້ອນຮັບການເຂົ້າຮ່ວມເປັນປະທານຂອງທ່ານ ແກ້ວ ພິມມະວົງ ຮອງເລຂາພັກເມືອງ ຜູ້ຊີ້ນໍາວຽກພັກ-ພະນັກງານ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ອາດີດການນໍາອາວຸໂສບໍານານ, ບັນດາຫົວໜ້າ-ຮອງຫົວໜ້າຫ້ອງການ, ແຂກຖືກເຊີນ, ພະນັກງານແພດໝໍ, ໂຮງໝໍຊຸມຊົນ ແລະ ໂຮງໝໍນ້ອຍ ພາຍໃນເມືອງ  ເຂົ້າຮ່ວມຢ່າງພ້ອມພຽງ.

ດຣ ລໍາພົງ ປະຖໍາມະວາດ ຮອງຫົວໜ້າຫ້ອງການສາທາລະນະສຸກເມືອງ, ໄດ້ຂຶ້ນຜ່ານບົດສະຫຼຸບການເຄື່ອນ ໄຫວວຽກງານຂອງຫ້ອງການສາທາລະນະສຸກ ປະຈໍາປີ 2020, ໃນ 1 ປີ ຜ່ານມາ ຫ້ອງການສາທາລະນະສຸກເມືອງ ໄດ້ເອົາໃຈໃສ່ຈັດຕັ້ງປະຕິບັດທາງດ້ານວຽກງານສົ່ງເສີມສຸຂະພາບແມ່ ແລະ ເດັກ,​ ຈັດຕັ້ງການສັກຢາປ້ອງກັນພະຍາດ, ວຽກແຜນງານອະນາໄມ ແລະ ສົ່ງເສີມສຸຂະພາບເປັນປົກກະຕິ, ປຸກລະດົມ ແລະ ສົ່ງເສີມໃຫ້ປະຊາຊົນໃນການຊົມໃຊ້ນໍ້າສະອາດໄດ້ 98% ແລະ ການຊົມໃຊ້ວິດຖ່າຍໄດ້ 99%, ຈັດຕັ້ງໂຄສະນາປຸກ ລະດົມ ແລະ ລົງເຄື່ອນໄຫວຕົວຈິງວຽກງານປ້ອງກັນພະຍາດໄຂ້ຍຸງລາຍ ແລະ ພະຍາດຕ່າງໆຕາມລະດູການ, ເປັນເຈົ້າການໃນການປະສານສົມທົບກັບຄະນະກໍາມະການຂັ້ນເມືອງທາງດ້ານວຽກງານໂພສະນາການ, ເອົາໃຈໃສ່ປັບປຸງ ແລະ ຍົກລະດັບການໃຫ້ການບໍລິການ, ການກວດ ແລະ ການປິ່ນປົວໃຫ້ມີຄຸນນະພາບໂດຍນໍາໃຊ້ອຸປະກອນການແພດທີ່ທັນສະໃຫມ ເຂົ້າໃນການບົ່ງມະຕິພະຍາດ ແລະ ປິ່ນປົວຮັກສາສຸຂະພາບຢ່າງກວ້າງຂວາງ, ( ອັນພິເສດໂຮງໝໍເມືອງຊະນະຄາມ ໄດ້ເປີດບໍລິການຫ້ອງຜ່າຕັດໃນລະດັບກາງນັບແຕ່ເດືອນ 11 ປີ 2020 ທີ່ຜ່ານມາ ແລະ ເປັນເຈົ້າການໂດຍສົມທົບກັບຄະນະສະເພາະກິດຂັ້ນເມືອງເອົາໃຈໃສ່ໃນການຄວບຄຸມ, ປ້ອງກັນ ແລະ ສະກັດກັ້ນການລະບາດຂອງພະຍາດ covid-19 ເປັນແຕ່ລະໄລຍະ).     ນອກຈາກນີ້ ດຣ ລໍາພົງ ປະຖໍາມະວາດ ຍັງໄດ້ຍົກໃຫ້ເຫັນດ້ານອ່ອນທີ່ເປັນຄົງຄ້າງ, ພ້ອມທັງໄດ້ກໍານົດທິດທາງແຜນການໃນຕໍ່ໜ້າເປັນຕົ້ນແມ່ນ ຈະຕ້ອງໄດ້ເອົາໃຈໃສ່ໃນການສຶກສາອົບຮົມທາງການການເມືອງແນວຄິດໃຫ້ແກ່ພະນັກງານ ໃຫ້ມີຄຸນທາດການເມືອງທີ່ໜັກແໜ້ນ, ມີຄວາມສາມັກຄີ, ມີຄວາມຊື່ສັດຕໍ່ໜ້າທີ່ວຽກງານທີ່ໄດ້ຮັບມອບໝາຍ, ສືບຕໍ່ແຜນການກໍ່ສ້າງ ແລະ ສ້ອມແປງອາຄານ ເພື່ອຮອງຮັບຄົນເຈັບທີ່ເຂົ້າມາປິ່ນປົວໃຫ້ໄດ້ຢ່າງທົ່ວເຖິງ, ຍົກລະດັບອຸປະກອນການແພດໃຫ້ທັນສະໄໝ, ສືບຕໍ່ຍົກລະດັບຄວາມຮູ້-ຄວາມສາມາດຂອງພະນັກງານ ແລະ ເອົາໃຈໃສ່ວຽກງານປ້ອງກັນ ແລະ ສະກັດກັ້ນພະຍາດ covid-19 ແລະ ພະຍາດຕ່າງໆ ໃຫ້ມີປະສິດທິພາບ.

ໃນຕອນທ້າຍຂອງພິທີ ຍັງໄດ້ຮັບຟັງການມີຄໍາເຫັນໂອ້ລົມ ແລະ ມີທິດຊີ້ນໍາຂອງ ທ່ານ ແກ້ວ ພິມມະວົງ ຮອງເລຂາພັກເມືອງ ຜູ້ຊີ້ນໍາວຽກພັກ-ພະນັກງານ ເຊິ່ງເບື້ອງຕົ້ນທ່ານໄດ້ສະແດງຄວາມຍ້ອງຍໍ-ຊົມເຊີຍມາຍັງຄະນະນໍາຫ້ອງການ ຕະຫຼອດເຖິງພະນັກງານແພດໝໍ ທີ່ສາມາດຜ່ານຜ່າອຸປະສັກໃນການປະຕິບັດໜ້າທີ່ວຽກງານ ຈົນສາມາດຍາດໄດ້ຜົນງານທີ່ພົ້ນເດັ່ນຫຼາຍດ້ານ, ພ້ອມນີ້ທ່ານຍັງໄດ້ຮຽກຮ້ອງມາຍັງພະນັກງານແພດໝໍພາຍໃນເມືອງ ຕ້ອງໄດ້ເອົາໃຈໃສ່ເຮັດສໍາເລັດໜ້າທີ່ວຽກງານທີ່ໄດ້ຮັບມອບ    ໝາຍໃຫ້ຖືກຕ້ອງ, ຊັດເຈນ, ເອົາໃຈໃສ່ໃນການບໍລິການຄົນເຈັບດ້ວຍຈັນຍາບັນ,​ ຈັນຍາທໍາ ເພື່ອສ້າງຄວາມເຊື່ອໝັ້ນ ແລະ ຄວາມເພິ່ງພໍໃຈໃນການບໍລິການ, ສືບຕໍ່ການຫັນເອົາພະນັກງານລົງກໍ່ສ້າງຮາກຖານຕາມທິດຊີ້ນໍາຂອງພັກ ແລະ ສືບຕໍ່ໃນການໂຄສະນາສຸຂະສຶກສາໃຫ້ເປັນຂະບວນກວ້າງຂວາງ ແລະ ຕໍ່ເນື່ອງ.

ຂ່າວເມືອງຊະນະຄາມ.

 

Loading...