ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ນະຄອນຫລວງວຽງຈັນ ກໍາລັງປັບປຸງພື້ນທີ່ກະຊວງຍຸຕິທໍາ (ຫຼັງເກົ່າ) ໃຫ້ເປັນສວນສາທາລະນະທີ່ສວຍງາມ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍຈະປັບປຸງໃຫ້ສໍາເລັດພາຍໃນເດືອນ ກັນຍາ ປີ 2024 ນີ້.
ທ່ານ ບຸນຍະວັດ ນີຣະໄຊຍ໌, ຫົວໜ້າພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງວຽງຈັນ, ພ້ອມດ້ວຍຄະນະ ໄດ້ຖະແຫລງຂ່າວຕໍ່ສື່ມວນຊົນໃນຕອນບ່າຍວັນທີ 16 ພຶດສະພາ 2024 ນີ້, ທີ່ພະແນກດັ່ງກ່າວວ່າ: ການສ້າງສວນສາທາລະນະ ປະຕູໄຊ ໄລຍະທີ 1 (ພື້ນທີ່ກະຊວງຍຸຕິທໍາ ຫຼັງເກົ່າ) ມີເນື້ອ ທີ່ 1,5 ເຮັກຕາ ເພື່ອແນໃສ່ເຮັດໃຫ້ໃຈກາງນະຄອນຫຼວງວຽງຈັນ ມີພື້ນທີ່ສາທາລະນະສີຂຽວໃຫ້ຄວາມຮົ່ມເຢັນ, ເປັນບ່ອນພັກຜ່ອນຢ່ອນອາລົມ, ມີສວນຮົ່ມໄມ້, ຮ້ານຂາຍອາຫານເບົາ ແລະ ເຄື່ອງທີ່ລະນຶກ, ມີຫ້ອງນໍ້າສາທາລະນະ, ມີບ່ອນຈອດລົດ, ມີລະບົບໄຟຟ້າ, ນໍ້າປະປາ ແລະ ອື່ນໆ ໂດຍໄດ້ເລີ່ມຈັດຕັ້ງປະຕິບັດໃນເດືອນພຶດສະພານີ້ ແລະ ຈະໃຫ້ສໍາເລັດພາຍໃນເດືອນກັນຍາ ປີ 2024. ພາຍຫຼັງສ້າງສໍາເລັດແລ້ວ, ສວນສາທາລະນະແຫ່ງນີ້ ຈະເພີ່ມສີສັນ ແລະ ສ້າງບັນຍາກາດໃໝ່ໃຫ້ນະຄອນຫຼວງວຽງຈັນ, ໂດຍສະເພາະໃນປີ 2024 ທີ່ ສປປ ລາວ ໄດ້ຮັບກຽດເປັນປະທານອາຊຽນ, ທັງເປັນປີທ່ອງທ່ຽວລາວ ແລະ ນະຄອນຫຼວງວຽງຈັນ ເປັນເຈົ້າພາບຈັດກອງປະຊຸມບັນດາເຈົ້າຄອງນະຄອນຫຼວງອາຊຽນ.
ທ່ານ ບຸນຍະວັດ ນີຣະໄຊຍ໌ ໃຫ້ຮູ້ຕື່ມວ່າ: ສວນສາທາລະນະປະຕູໄຊ ໄລຍະທີ 1 ແມ່ນຖືກອອກແບບໂດຍຄະນະທີ່ປຶກສາສະຖາປະນິກ, ຄະນະອາຈານ ແລະ ນັກສຶກສາ ຈາກມະຫາວິທະຍາໄລແຫ່ງຊາດ, ໂດຍໄດ້ຮັບການສະໜັບສະໜູນດ້ານທຶນຮອນຈາກ ພະແນກການຄ້າ ແຂວງຢຸນນານ ສປ.ຈີນ ຈໍານວນ 3 ແສນໂດລາສະຫະລັດ ແລະ ທຶນຈາກນະຄອນຫຼວງວຽງຈັນ ອີກຈໍານວນໜຶ່ງ, ໂດຍມີ ບໍລິສັດທີ່ປຶກສາ ແລະ ກໍ່ສ້າງ ແຂວງຢຸນນານ ສປ.ຈີນ ເປັນຜູ້ດໍາເນີນການກໍ່ສ້າງຕາມຮູບແບບທີ່ໄດ້ຖືກຮັບຮອງ. ສໍາລັບການປັບປຸງຕຶກອາຄານ ແມ່ນໄດ້ດໍາເນີນຕາມລະບຽບການຈັດຊື້- ຈັດຈ້າງ ເພື່ອຄັດເລືອກເອົາບໍລິສັດພາຍໃນທີ່ມີເງື່ອນໄຂມາຈັດຕັ້ງປະຕິບັດ.
ໃນໂອກາດນີ້, ທ່ານໄດ້ຝາກມາຍັງສັງຄົມ ໃນໄລຍະທີ່ມີການ ກໍ່ສ້າງນີ້ ອາດຈະເຮັດໃຫ້ການສັນຈອນໄປ-ມາ ໃນຂອບເຂດດັ່ງກ່າວ ບໍ່ສະດວກ, ຫາກບັນດາທ່ານຕ້ອງການຂໍ້ມູນເພີ່ມເຕີມສາມາດຕິດຕໍ່ສອບຖາມກັບພະແນກ ຍທຂ ນະຄອນຫຼວງວຽງຈັນ ຕາມເບີໂທລະສັບ 020 5919 2879 ທັງໃນ ແລະ ນອກໂມງລັດຖະການ.
อาจเป็นรูปภาพของ 4 คน
อาจเป็นรูปภาพของ ต้นไม้ และ พื้นหญ้า