ທ່ານໂທນີ ສີຫາປັນຍາ ຄົນເຊື້ອຊາດລາວ ສັນຊາດຝຼັ່ງ ເກີດຢູ່ເມືອງວີທີ ຊັກແຊນ ນະຄອນຫລວງປາຣີ ປະເທດຝຼັ່ງ ເຄີຍມາຢູ່ລາວກັບພໍ່, ແມ່ ທີ່ມາເຮັດທຸລະກິດ ລະຫວ່າງປີ 1993 -1996, ຈາກນັ້ນ ໄດ້ກັບຄືນໄປຢູ່ປະເທດຝຼັ່ງ, ແຕ່ໄດ້ກັບມາຢ້ຽມຢາມ, ທ່ອງທ່ຽວລາວເລື້ອຍໆ ຈົນເຖິງປີ 2010 ໄດ້ມາເຮັດທຸລະກິດຮ້ານກິນດື່ມ ປະເພດ​cocktail ຢູ່ບ້ານບຶງຂະຫຍອງ ເມືອງສີສັດຕະນາກ, ຕໍ່ມາ ປີ 2016 ໄດ້ຍ້າຍໄປຕັ້ງຢູ່ແຄມຂອງ ບ້ານສີຖານເໜືອ, ເມືອງສີໂຄດຕະບອງ ນະຄອນຫລວງວຽງຈັນ, ຈາກນັ້ນໄດ້ຕັ້ງຊື່ຮ້ານອາຫານວ່າ: ເຮືອນາຄາ ບໍລິການອາຫານລາວ ແລະອາຫານຝຼັ່ງ.
ທ່ານໂທນີ ສີຫາປັນຍາ ຜູ້ອໍານວຍການຮ້ານອາຫານ ເຮືອນາຄາ ໃຫ້ສໍາພາດວ່າ: ພາຍຫລັງມາຢ້ຽມຢາມລາວຫລາຍຄັ້ງ ເຮັດໃຫ້ເກີດມີແນວຄິດຢາກມາເຮັດທຸລະກິດຢູ່ລາວ, ຕາມທ່າແຮງ ແລະຄວາມສາມາດຂອງຕົນ ນັ້ນຄືທຸລະກິດຮ້ານອາຫານ. ຍ້ອນພໍ່, ແມ່ ເຄີຍເຮັດຮ້ານອາຫານ ຕໍານັກລາວ ຢູ່ນະຄອນຫລວງວຽງຈັນມາກ່ອນ, ຕົນເອັງຈຶ່ງໃຫ່້ເພິ່ນເຮັດເອກະສານຂໍອະນຸຍາດ ດໍາເນີນທຸລະກິດ ຮ້ານອາຫານນາຄາ, ເຊິ່ງໄດ້ຮັບຄວາມສະດວກສະບາຍທຸກຢ່າງ, ການດໍາເນີນທຸລະກິດມີຜົນກໍາໄລ, ທ່ານໂທນີ ສີຫາປັນຍາ ມີຄວາມພູມໃຈຫລາຍ ທີ່ໄດ້ກັບຄືນມາດໍາລົງຊີວິດຢູ່ບ້ານເກີດເມືອງນອນຂອງພໍ່, ແມ່ ເປັນການປະກອບສ່ວນ ສ້າງສາພັດທະນາເສດຖະກິດລາວ ໃຫ້ຈະເລີນກ້າວໜ້າ.
ທ່ານໂທນີ ສີຫາປັນຍາ, ໃຫ້ຮູ້ຕື່ມວ່າ: ຮ້ານອາຫານ ເຮືອນາຄາ ນອກຈາກບໍລິການອາຫານຢູ່ເທິງເຮືອແລ້ວ ຍັງໄດ້ບໍລິການຢູ່ບໍລິເວນຫາດຊາຍ ເຊິ່ງມີທິວທັດສວຍງາມ ແລະບັນຍາກາດດີ , ໂດຍໄດ້ປັບປຸງດິນຊາຍ, ເອົາໃຈໃສ່ຮັກສາຄວາມສະອາດ ແລະສິ່ງແວດລ້ອມໃນຫາດຊາຍແມ່ນໍ້າຂອງ ພ້ອມທັງມີລະບົບປ້ອງກັນໄຟໄໝ້ໃນລະດູແລ້ງ ແລະຮັບປະກັນການບໍລິການອາຫານຢູ່ເທິງເຮືອໃນລະດູຝົນ.

 
ຂ່າວ: ຍືນຍົງ ແກ້ວເວີນໄຊ
ພາບ: ຄໍາກອງ ກິດຕິຄຸນ

Loading...