ພູຫວງຊ່ານ ໄດ້ຖືກຂະໜານນາມວ່າ ເປັນພູມະຫັດສະຈັນອັນດັບໜຶ່ງຂອງຈີນ, ພູຫວງຊ່ານ ຫລື ພູເຫລືອງມີເນື້ອທີ່ທັງໝົດ 1200 ກວ່າກິໂລຕາແມັດ ຕັ້ງຢູ່ທາງທິດຕາເວັນຕົກສຽງເໜືອ ຂອງເມືອງເຊີ້ຊ່ຽນ ນະຄອນຫວງຊ່ານ ແຂວງ ອ່ານຮຸ່ຍ ສປ ຈີນ. ໂດຍມີພື້ນທີ່ປ່າປົກຫຸ້ມ 56 %, ພື້ນທີ່ພັນພືດຈຳນວນໜຶ່ງ ແລະເປັນແຫລ່ງອາໄສຂອງສັດປ່າ 1.452 ຊະນິດແລະ ບາງຊະນິດຢູ່ໃນລາຍຊື່ການຄຸ້ມຄອງສັດປ່າຂອງຈີນ.
ຕາມການລາຍງານຂອງຜູ້ນຳທ່ຽວໃຫ້ຮູ້ວ່າ: ພູຫວງຊ່ານ ມີ ອາຍຸຫລາຍກວ່າ 800 ລ້ານປີ, ມີຄວາມຍາວແຕ່ເໜືອເຖິງໃຕ້ 40 ກິໂລແມັດ ແລະກວ້າງປະມານ 30 ກິໂລແມັດ, ມີພື້ນທີ່ຊົມທິວທັດ 160 ກວ່າກິໂລແມັດ, ມີຈອມພູສູງ 1.000 ແມັດ 72 ຈອມພູ, ມີຈອມພູໃຫ່ຍ 36 ຈອມ, ຈອມພູນອ້ຍ 36 ຈອມ ແລະຈອມພູຫລຽນຮົ່ວ ຫລືຈອມພູດອກບົວສູງເຖິງ 1.864 ກວ່າແມັດ ຈາກໜ້ານໍ້າທະເລ ເຊິ່ງເປັນຈອມພູສູງສຸດໃນຈຳນວນຈອມພູທັງໝົດຂອງພູຫວງຊ່ານ ອຸ່ນຫະພູມສະເລ່ຍໝົດປີ 7,9 ອົງສາ ແລະໄດ້ຮັບການຈັດອັນດັບໃຫ້ເປັນແຫລ່ງທອ່ງທ່ຽວລະດັບ 5 A ຂອງຈີນອີກດ້ວຍ.
ນອກຈາກນີ້, ພູຫວງຊ່ານຍັງເປັນສູນລວມຂອງວັດທະນະທຳ, ສິນລະປະ, ຮູບແຕ້ມ ວັນນະຄະດີ ຕຳນານ ແລະ ບຸກຄົນທີ່ມີຊື່ສຽງທີ່ເຄີຍມາຢ້ຽມຢາມພູແຫ່ງນີ້. ເນື່ອງຈາກວ່າ ສາດສະໜາພຸດໄດ້ເຂົ້າມາສູ່ດິນແດນພູຫວງຊ່ານ ໃນສະໄໝລາດຊະວົງຕ້າຍ ລະຫວ່າງປີ 420-589 ໂດຍໄດ້ສ້າງວັດພຸດ 100 ກວ່າແຫ່ງໃນເຂດນີ້ ແລະອົງ ການ ການສຶກສາ,ວິທະຍາ ສາດແລະວັດທະນະທຳແຫ່ງ ສະຫະປະຊາຊາດຫລື UNESCO ໄດ້ຮັບຮອງເປັນມໍລະດົກໂລກທາງວັດທະ ນະທຳແລະທຳມະຊາດຂອງໂລກ ໃນປີ 2004.
ພູຫວງຊ່ານມີຊື່ເດີມວ່າ ອີ້ຊ່ານ ຫລື ພູດຳ ເນື່ອງຈາກຈອມພູມີສີຄາມ ປົນກັບສີດຳ ທີ່ຕັ້ງຢູ່ທ່າມກາງທະເລໝອກ, ພາຍຫລັງລາດຊະວົງຖັງ ໃນສະໄໝຖັງທ່ຽນເປົ່າ ປີທີ 6 ຄສ 747 ວັນທີ 16 ມິຖຸນາ ໄດ້ປ່ຽນຊື່ມາເປັນຫວງຊ່ານ ແປວ່າ ພູເຫລືອງ ຕາມຕຳນານຂອງກະສັດເຫລືອງ ທີ່ມາປະທັບເທິງພູແຫ່ງນີ້ເພື່ອບຳເພັນກຸສົນໃຫ້ກາຍເປັນຊຽນ ແລະຈຶ່ງເຮັດໃຫ້ມື້ນີ້ເປັນວັນເກີດຂອງພູຫວງຊ່ານ ຈົນເຖິງປະຈຸບັນ ແລະ ກາຍເປັນແຫລ່ງທ່ອງທ່ຽວຍອດນິຍົມຂອງນັກທ່ອງທ່ຽວທັງຊາວຈີນ ແລະ ຕ່າງປະເທດ, ສະເລ່ຍມື້ໜຶ່ງມີນັກທ່ອງທ່ຽວມາທ່ຽວຊົມພູຫວງຊ່ານ ມື້ລະ 35.000 ຄົນ ຫລື ປະມານ 4 ລ້ານຄົນຕໍ່ປີ , ສາມາດສ້າງລາຍຮັບໄດ້ ຫລາຍກວ່າ 1 ຕື້ຢວນຕໍ່ປີ.
Cr: ເພັດສະໝອນ
