ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ພົທ ວິໄລ ຫຼ້າຄຳຟອງ ເປັນເລຂາຄະນະພັກກະຊວງປ້ອງກັນຄວາມສະຫງົບ

ກອງປະຊຸມໃຫຍ່ຜູ້ແທນ ຄັ້ງທີ V ຂອງອົງຄະນະພັກກະຊວງປ້ອງກັນຄວາມສະຫງົບ ໄດ້ສຳເລັດໃນວັນທີ 10 ກັນຍາ 2020 ພາຍຫຼັງທີ່ດຳເນີນເປັນເວລາ 1 ວັນເຄິ່ງ ໂດຍການເປັນປະທານຂອງ ສະຫາຍ ພົທ ວິໄລ ຫຼ້າຄຳຟອງ ເລຂາທິການສູນ ກາງພັກ, ເລຂາຄະນະພັກກະຊວງ, ລັດຖະມົນຕີກະຊວງ ປກສ ໂດຍການເປັນກຽດເຂົ້າຮ່ວມໂດຍ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ.

ກອງປະຊຸມໃຫຍ່ຜູ້ແທນ ໄດ້ຜ່ານລາຍງານການເມືອງທັງສອງພາກ ສະເໜີໂດຍສະຫາຍ ພົທ ວິໄລ ຫຼ້າຄຳຟອງ ແລະ ຜ່ານຮ່າງບົດສຳຫຼວດການນຳພາລວມຂອງຄະນະບໍລິຫານງານພັກກະຊວງ ປກສ ສະໄໝທີ IV ສະເໜີໂດຍ ສະຫາຍ ພົຕ ກົງທອງ ພົງວິຈິດ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງປ້ອງກັນຄວາມສະ ຫງົບ; ຫຼັງຈາກນັ້ນ, ປະທານກອງປະຊຸມສະເໜີໃຫ້ຜູ້ຕາງໜ້າໃນຂົງເຂດວຽກງານວິຊາສະເພາະ ຂຶ້ນປະກອບຄຳເຫັນຕໍ່ຮ່າງບົດລາຍງານການເມືອງ ຢ່າງກົງ ໄປ-ກົງມາ ແລະ ມີເນື້ອໃນໜັກແໜ້ນຄົບຖ້ວນ ຈາກນັ້ນ ກອງປະຊຸມໄດ້ເປັນເອກະ ສັນຮັບຮອງເອົາລາຍງານການເມືອງ ແລະ ບົດສຳຫຼວດການນຳພາລວມຂອງຄະນະບໍລິຫານງານພັກກະຊວງ ປກສ ສະໄໝທີ IV ຕໍ່ກອງປະຊຸມໃຫຍ່ ຄັ້ງທີ V.

ກອງປະຊຸມໃຫຍ່ ບັນດາຜູ້ແທນໄດ້ພ້ອມກັນໃຊ້ສິດປະ ຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານພັກກະຊວງປ້ອງກັນຄວາມສະຫງົບຊຸດໃໝ່ ຈຳນວນ 27 ສະຫາຍ ໃນຈຳນວນຜູ້ລົງສະໝັກ 31 ສະຫາຍເພື່ອເປັນຫຼັກແຫຼ່ງນຳພາຈັດຕັ້ງປະຕິບັດມະຕິຂອງກອງປະຊຸມໃຫຍ່ ຄັ້ງທີ V ແລະ ເປັນໃຈກາງແຫ່ງການເຕົ້າ ໂຮມຄວາມສາມັກ ຄີເປັນເອກະພາບພາຍໃນກຳລັງປ້ອງກັນຄວາມສະຫງົບ, ປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ.

ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກກະຊວງປ້ອງກັນຄວາມສະຫງົບ ໄດ້ເປັນເອກະພາບເລືອກເອົາ ສະຫາຍ ພົທ ວິໄລ ຫຼ້າຄຳຟອງ ເປັນເລຂາຄະນະພັກ, ສະຫາຍ ພົຕ ກົງທອງ ພົງວິຈິດ ເປັນຮອງເລຂາຄະນະພັກ, ສະຫາຍ ພົຕ ວັນທອງ ກອງມະນີ ເປັນຮອງເລຂາຄະນະພັກ, ສະຫາຍ ພົຕ ປອ ທອງເຫຼັກ ມັງໜໍ່ເມັກ ເປັນປະທານກວດກາ, ສະຫາຍ ພັອ ຄຳຜາສິດ ບົງມູນທອງ ເປັນຮອງປະທານກວດກາພັກ, ສະຫາຍ ພັອ ພູທອນ ວົງພະໄຕ ເປັນຮອງປະທານກວດກາພັກ, ສະຫາຍ ພັອ ບຸນລຽນ ສີສະອາດ ເປັນຮອງປະທານກວດກາພັກ; ເປັນເອກະສັນເລືອກເອົາຄະນະປະຈຳພັກກະຊວງ 9 ສະຫາຍ; ພ້ອມທັງໄດ້ປ່ອນບັດເລືອກຕັ້ງເອົາຜູ້ແທນສົມບູນ ຈໍານວນ 15 ສະຫາຍ, ສຳຮອງ 3 ສະຫາຍ ໄປຮ່ວມກອງປະຊຸມໃຫຍ່ຜູ້ ແທນທົ່ວປະເທດ ຄັ້ງທີ XI ຂອງສູນກາງພັກ.

ກອງປະຊຸມໃຫຍ່ຜູ້ແທນ ຄັ້ງທີ V ຂອງອົງຄະນະພັກກະຊວງປ້ອງກັນຄວາມສະຫງົບ ໄດ້ຮັບຟັງການໂອ້ລົມຈາກ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ, ສະຫາຍໄດ້ຍົກຫຼາຍບັນຫາທີ່ມີເນື້ອໃນສຳຄັນເລິກເຊິ່ງ ໂດຍເນັ້ນໃຫ້ຄະນະບໍລິຫານງານພັກກະຊວງ ປກສ ລວມທັງຄະນະພັກແຕ່ລະຂັ້ນ ຈົ່ງເພີ່ມທະວີວຽກງານສຶກສາອົບຮົມແນວຄິດດ້ວຍຫຼາຍຮູບຫຼາຍສີ, ເຮັດໃຫ້ນາຍແລະພົນຕຳຫຼວດໃນກຳລັງປ້ອງກັນຄວາມສະຫງົບຍຶດໝັ້ນອຸດົມການສັງຄົມ ນິຍົມ, ມີຫຼັກໝັ້ນຊົນຊັ້ນໜັກແໜ້ນ, ມີຄວາມຈົ່ງຮັກພັກດີຕໍ່ພັກ, ຕໍ່ການປະຕິວັດ, ຕໍ່ປະເທດຊາດແລະຕໍ່ປະຊາຊົນຢ່າງບໍ່ມີເງື່ອນໄຂ ຄຽງງຄູ່ກັນນັ້ນກໍຕ້ອງເພີ່ມທະວີຄວາມສາມັກຄີກັນພາຍໃນໃຫ້ແໜ້ນແຟ້ນ ປະຕິບັດບັນດາແຜນງານ ແລະ ໂຄງການຕ່າງໆໃຫ້ສຳເລັດຕາມລະດັບຄາດ ໝາຍທີ່ວາງໄວ້ແຕ່ລະໄລຍະ.

ພ້ອມນັ້ນ ສະຫາຍໄດ້ເນັ້ນຫນັກໃຫ້ສືບຕໍ່ອອກແຮງເສີມຂະຫຍາຍມູນເຊື້ອສາມັກຄີເປັນປຶກ ແຜ່ນພາຍໃນ, ເຮັດໃຫ້ອົງຄະນະພັກກາຍເປັນໃຈກາງການຈັດຕັ້ງທີ່ມີຄວາມໜັກແໜ້ນ, ເຂັ້ມແຂງ; ເຊີດຊູສະຕິເປັນເຈົ້າ, ນໍ້າໃຈຮັບຜິດຊອບແລະຄວາມເປັນແບບຢ່າງນໍາໜ້າຢ່າງຮອບດ້ານຂອງຄະນະພັກ-ຄະນະບັນຊາໃຫ້ສູງຂຶ້ນຕິດພັນກັບການກໍ່ສ້າງກຳລັງປ້ອງກັນຄວາມສະຫງົບໃຫ້ເຕີບໃຫຍ່ເຂັ້ມແຂງ ແລະ ຂະຫຍາຍຕົວຂຶ້ນບໍ່ຢຸດຢັ້ງທັງເຮັດໃຫ້ກົມກອງປະຕິບັດໜ້າທີ່ວຽກງານໃຫ້ໄດ້ຮັບປະສິດທິຜົນສູງຂຶ້ນກວ່າເກົ່າ ຕິດພັນກັບການເພີ່ມທະວີການນໍາພາຊີ້ນໍາວຽກງານປ້ອງກັນຄວາມສະຫງົບທົ່ວປວງຊົນຮອບດ້ານໃນເງື່ອນໄຂສະພາບການໃໝ່ໃຫ້ເລິກເຊິ່ງ, ເຖິງຖອງ, ກວ້າງຂວາງ ແລະ ເຂັ້ມງວດຂຶ້ນກວ່າເກົ່າ, ປະເທດຊາດມີສະຖຽນລະພາບ, ສ້າງຄວາມສະຫງົບເປັນລະບຽບຮຽບຮ້ອຍ ເພື່ອສ້າງບັນຍາກາດ ແລະ ເງື່ອນໄຂອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ, ການລົງທຶນ. ໃນນັ້ນ ຕ້ອງສຸມທຸກກໍາລັງໂດຍສົມທົບແໜ້ນ, ເປັນລະບົບກັບຂະແໜງການປ້ອງກັນຊາດ, ຂະແໜງການຕ່າງປະເທດ ແລະ ທຸກພາກສ່ວນທີ່ກ່ຽວຂ້ອງ ສ້າງໃຫ້ໄດ້ກໍາລັງແຮງສັງລວມຂອງທົ່ວປວງຊົນ ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ ໃຫ້ກາຍ ເປັນສະຕິຄວາມຮັບຜິດຊອບຂອງທົ່ວປວງຊົນ.