ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ງານພົບປະແລກປ່ຽນມິດຕະພາບ ລະຫວ່າງສອງສະ ຖານທູດລາວ ແລະ ຫວຽດນາມ ປະຈໍາ ສປ ຈີນ ເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ລາວ- ຫວຽດນາມ, ຫວຽດນາມ-ລາວ ປີ 2022 ກໍຄື ການສະ ເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ- ຫວຽດນາມ ຄົບຮອບ 60 ປີ (5/9/1962- 5/9/ 2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/ 1977- 18/7/ 2022) ຈັດຂຶ້ນໃນຕອນຄໍ່າວັນທີ 13 ສິງຫາ 2022 ຢູ່ສະ ຖານທູດຫວຽດນາມ ທີ່ນະຄອນຫລວງປັກກິ່ງ ແຫ່ງ ສປ ຈີນ, ໂດຍມີ ສະຫາຍ ນາງ ຄໍາເພົາ ເອີນທະວັນ, ເອກອັກ ຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ, ສະຫາຍ Pham Sao Mai, ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປ ຈີນ, ພ້ອມດ້ວຍພະນັກງານຈາກສະຖານທູດລາວ ແລະ ຫວຽດນາມ ເຂົ້າຮ່ວມ.
ໃນໂອກາດນີ້, ສະຫາຍເອກອັກຄະລັດຖະທູດລາວ ແລະ ຫວຽດນາມ ໄດ້ຜັດປ່ຽນກັນຂຶ້ນມີຄໍາເຫັນ ເຊີ່ງທັງ ສອງສະຫາຍໄດ້ຍົກໃຫ້ເຫັນເຖີງມູນເຊື້ອແຫ່ງຄວາມສາ ມັກຄີຮັກແພງຊ່ວຍເຫຼືອເຊີ່ງກັນ ແລະ ກັນລະຫວ່າງສອງຊາດລາວ-ຫວຽດນາມ ທີ່ມີມາແຕ່ດົນນານ, ໂດຍສະເພາະໃນໄລຍະແຫ່ງການຕໍ່ສູ້ຕ້ານການຮຸກຮານ, ການຍຶດຄອງ ແລະ ການປົກຄອງຂອງພວກຈັກກະພັດຕ່າງດ້າວ ແລະ ລະບອບເຈົ້າສັກດີນາໃນເມື່ອກ່ອນ ພາຍໃຕ້ການນຳພາອັນສະຫລາດສ່ອງໃສຂອງພັກກອມມຸຍນິດອິນດູຈີນ ໃນເວລານັ້ນ ກໍຄື ພັກປະຊາຊົນ ປະຕິວັດລາວ ແລະ ພັກກອມມຸຍນິດຫວຽດນາມໃນປັດຈຸບັນ, ປະຊາຊົນສອງຊາດ ລາວ – ຫວຽດນາມ ໄດ້ຄຽງບ່າຄຽງໄຫລ່ຮ່ວມສະໜາມຮົບ ແລະ ຂຸມຄອງດຽວກັນຕໍ່ສູ້ຕີຕ້ານສັດຕູຜູ້ຮຸກຮາກໂຕດຽວກັນຢ່າງຍືດເຍື້ອຍາວນານ, ອົງອາດກ້າແກ່ນ, ບໍ່ຍອມຈໍານົນ ແລະ ສຸດແສນລະອິດລະອ້ຽວຂ້ຽວຂາດ, ຊ່ວຍເຫຼືອເຊີ່ງກັນ ແລະ ກັນຖານສະຫາຍອ້າຍນ້ອງບົນຈິດໃຈສາກົນອັນຜ່ອງໃສ ແລະ ໝົດຈິດໝົດໃຈ, ຍອມເສຍສະຫລະເພື່ອກັນ ແລະ ຮ່ວມເປັນຮ່ວມຕາຍນຳກັນ ຈົນສາມາດຍາດເອົາສິດເປັນເຈົ້າອອກຈາກແອກຄອບຄອງຂອງລະບອບລ່າເມືອງຂຶ້ນ ແລະ ສັກດີນາຂຸນເສິກໄດ້ ກໍຄື ຍາດເອົາເອກະ ລາດ, ອຳນາດອະທິປະໄຕມາໃຫ້ແກ່ປະຊາຊົນຂອງໃຜລາວໄດ້ຢ່າງສະຫງ່າງາມ ແລະ ອົງອາດທີ່ສຸດ.
ນອກຈາກນີ້, ທັງສອງສະຫາຍ ຍັງໄດ້ຍົກໃຫ້ເຫັນພາຍ ຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ປະທານ ໂຮ່ຈິ ມິນ, ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກຮ່ວມກັນກໍ່ຕັ້ງຂຶ້ນໃນເມື່ອກ່ອນ ໄດ້ຮັບການເພີ່ມພູນຄູນສ້າງ, ປົກປັກຮັກສາດ້ວຍເລືອດເນື້ອເຫື່ອແຮງຂອງນັກຮົບ ແລະ ປະຊາ ຊົນສອງປະເທດມາຫຼາຍຮຸ່ນຄົນ, ນັບມື້ໄດ້ຮັບການເສີມຂະ ຫຍາຍເຂົ້າສູ່ລວງກວ້າງ ແລະ ລວງເລິກໃນທຸກຂົງເຂດວຽກງານ ບົນພື້ນຖານການເສີມຂະຫຍາຍຈິດໃຈຄວາມເປັນເອກະລາດ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຫວຽດນາມນັບມື້ເພີ່ມຂຶ້ນຢ່າງບໍ່ຢຸດຢັ້ງ, ຈົນກາຍເປັນຊັບສົມບັດອັນລໍ້າຄ່າ ແລະ ເປັນສາຍພົວພັນ “ມີໜື່ງ ບໍ່ມີສອງ” ໃນປະຫວັດສາດໂລກ.
ໃນໂອກາດດັ່ງກ່າວ, ສະຫາຍ ນາງ ຄໍາເພົາ ເອີນທະວັນ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນການພັດທະນາເສດຖະກິດ-ສັງຄົມຂອງຫວຽດນາມທີ່ຍາດມາໄດ້ໃນປີຜ່ານມາ ເຖີງວ່າພົບກັບຄວາມຫຍຸ້ງຍາກຫລາຍຢ່າງ ໂດຍສະເພາະການລະບາດຂອງພະຍາດໂຄວິດ-19 ແຕ່ເສດຖະກິດຂອງຫວຽດນາມ ຍັງຂະຫຍາຍຕົວໃນລະດັບທີ່ແນ່ນອນ, ພ້ອມນີ້ ຍັງໄດ້ສະແດງຄວາມເຊີຍຕໍ່ຜົນສໍາເລັດໃນການເປັນເຈົ້າພາບຈັດງານມະຫາກໍາກິລາຊີເກມ ຄັ້ງທີ 31 ຂອງຫວຽດນາມໃນເດືອນພຶດສະພາ 2022 ຜ່ານມາແລະ ຂອບໃຈຕໍ່ຫວຽດນາມທີ່ໄດ້ຊ່ວຍເຫຼືອນັກກິລາລາວໃນການເຂົ້າຮ່ວມການແຂ່ງຂັນກິລາຊີເກມຄັ້ງນີ້. ນອກຈາກ ສະຫາຍຍັງໄດ້ຕາງໜ້າໃຫ້ພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈຢ່າງຈິງໃຈຕໍ່ການຊ່ວຍ ເຫລືອອັນລໍ້າຄ່າລະຫວ່າງສອງປະເທດລາວ-ຫວຽດນາມ ທີ່ມອບໃຫ້ກັນ ແລະ ກັນຢ່າງໝົດຈິດໝົດໃຈ ຕະຫລອດໄລຍະການຕໍ່ສູ້ກູ້ຊາດໃນເມື່ອກ່ອນ ກໍຄື ໃນໄລຍະສ້າງສາ ແລະ ພັດທະນາປະເທດໃນປັດຈຸບັນ ຢ່າງສະເໝີຕົ້ນສະ ເໝີປາຍຕະຫລອດມາ ໂດຍສະເພາະໃນໄລຍະຕໍ່ສູ້ກັບພະຍາດໂຄວິດ-19 ສອງສະຖານທູດລາວ ແລະ ຫວຽດນາມ ທີ່ນະຄອນຫລວງປັກກິ່ງ ໄດ້ພົວພັນຮ່ວມມື, ໄປມາຫາສູ່ ແລະ ຊ່ວຍເຫລືອເຊີ່ງກັນ ແລະ ກັນ ຢ່າງຕໍ່ເນື່ອງ ເຮັດໃຫ້ຄວາມສາມັກຄີລະຫວ່າງສອງສະຖານທູດນັບມື້ໄດ້ຮັບການເພີ່ມພູນຄູນສ້າງ, ພະນັກງານຂອງສອງສະຖານທູດມີຄວາມເຂົ້າອົກເຂົ້າໃຈ ແລະ ຮັກແພງເຊີ່ງກັນແລະ ກັນ ເຊີ່ງເປັນການປະກອບສ່ວນສໍາຄັນເຮັດໃຫ້ການເຄື່ອນໄຫວວຽກງານການທູດຂອງສອງສະຖານທູດລາວ-ຫວຽດນາມ ນັບມື້ສະດວກສະບາຍ ແລະ ໄດ້ຮັບຜົນສໍາເລັດເປັນຢ່າງດີ.
ໃນໂອກາດຈັດງານພົບປະແລກປ່ຽນມິດຕະພາບຂອງສອງສະຖານທູດລາວ ແລະ ຫວຽດນາມ ປະຈໍາ ສປ ຈີນ ໃນຄັ້ງນີ້ ຍັງໄດ້ຈັດໃຫ້ມີການສະແດງສິລະປະຂອງລາວ ແລະ ຫວຽດນາມ ຈໍານວນ 4 ລາຍການ. ນອກຈາກນີ້ ຍັງມີການມອບລາງວັນໃຫ້ຜູ້ຊະນະເລີດການແຂ່ງຂັນກິລາ 3 ປະເພດ ຄື: ກ໊ອຟ, ປິງປ໋ອງ ແລະ ດອກປີກໄກ່ ທີ່ທັງສອງສະຖານທູດຮ່ວມກັນຈັດຂຶ້ນ ເພື່ອສ້າງບັນຍາກາດໃຫ້ງານພົບປະຄັ້ງນີ້ມີຄວາມເບິກບານມ່ວນຊື່ນ ແລະ ເຕັມໄປດ້ວຍຄວາມໝາຍທີ່ເລິກເຊີ່ງ.
Cr: ບຸນຕຽງ ຈັນທະວົງ
May be an image of 12 people, people standing and indoor