ພົບເຫັນຜູ້ລະເມີດລະບຽບຈະລາຈອນຈໍານວນຫລາຍ

ພັຕ ປາດຖະໜາ ລຸຍພານິດ ຮອງຫົວໜ້າກອງທາງຫຼວງ ພະແນກຕຳຫຼວດຈະລາຈອນ ຫ້ອງຕຳຫຼວດ ກອງບັນຊາການ ປກສ ນະຄອນຫຼວງວຽງຈັນ ໄດ້ຕາງໜ້າໃຫ້ຕຳຫຼວດຈະລາຈອນ ປະຈຳດ່ານນາດີ ເມືອງນາຊາຍທອງ ນະຄອນຫຼວງວຽງຈັນ ( ຈຸດກວດກາເສັ້ນທາງ 13 ເໜືອ ) ໃຫ້ສຳພາດໃນວັນທີ 15 ເມສາ 2024 ວ່າ: ການປະຕິບັດໜ້າທີ່ຂອງເຈົ້າໜ້າທີ່ ທີ່ປະຈຳຢູ່ຈຸດນີ້ ແມ່ນໄດ້ເລີ່ມລົງປະຕິບັດໜ້າທີ່ ນັບແຕ່ວັນທີ 5 ເມສາ 2024 ເປັນຕົ້ນມາ; ເຊິ່ງໄດ້ເຮັດໜ້າທີ່ໃນການຄວບຄຸມຄວາມໄວ, ກວດ ກາເອກະສານ, ກວດການັກຂັບຂີ່ ( ໝວກກັນກະທົບ, ເຂັມຂັດນິລະໄພ ); ແລະທີ່ສຳຄັນແມ່ນກວດກາພາຫະນະທີ່ບໍ່ມີປ້າຍທະ ບຽນ ເພື່ອສະກັດກັ້ນບໍ່ໃຫ້ຄົນບໍ່ຫວັງກໍ່ຄວາມບໍ່ສະຫງົບ.

ສ່ວນ ພັຕ ຄຳເຄນ ສຸລິຍະວົງ ຫົວໜ້າຈຸກວດກາປະຈຳດ່ານນາດີ ກ່າວວ່າ: ເພື່ອສະກັດກັ້ນບໍ່ໃຫ້ມີອຸບັດເຫດເກີດຂຶ້ນ, ທາງຕຳຫຼວດຈະລາຈອນ ທີ່ປະຈຳຢູ່ດ່ານນາດີ ແມ່ນໄດ້ມີຄວາມເຂັ້ມງວດໃນການເຮັດໜ້າທີ່ຄວບຄຸມຄວາມໄວ, ສະກັດກັ້ນບໍ່ໃຫ້ມີການຂັບລົດຈັກເປັນພຶງເປັນແພ.

ການປະຕິບັດໜ້າທີ່ວິຊາສະເພາະຂອງຕຳຫຼວດຈະລາຈອນ ປະຈຳດ່ານນາດີ ນັບແຕ່ວັນທີ 5-14 ເມສາ 2024 ສາມາດສະ ຫຼູບສັງລວມໄດ້ດັ່ງນີ້:

-ໄດ້ອັດລົດກວດກາທັງໝົດ 516 ຄັນ, ພົບເຫັນການລະເມີດ 369 ກໍລະນີ ໃນນີ້ຫຼາຍກວ່າໝູ່ 3 ກໍລະນີແມ່ນ:

1. ຂັບຂີ່ລົດໄວເກີນປ້າຍກຳນົດ 112 ຄົນ.

2. ບໍ່ມີໃບຂັບຂີ່ 42 ຄົນ.

3. ບໍ່ຖືໃບຂັບຂີ່ 38 ຄົນ.

ສໍາລັບມາດຕະການຕໍ່ກໍລະນີຕ່າງໆທີ່ມີການລະເມີດ ແມ່ນເຈົ້າໜ້າທີ່ໄດ້ມີການສຶກສາອົບຮົມ-ກ່າວເຕືອນ, ອີກທັງມີການອອກໃບສັ່ງ-ກັກເອກະສານ.

ພາບ-ຂ່າວ: ບຸນເຫຼືອ