ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ນັບແຕ່ເດືອນສິງຫາ ຫາ ເດືອນຕຸລາ ປີ 2021 ເຈົ້າໜ້າທີ່ຕໍາຫລວດສະກັດກັ້ນ ແລະ ຕ້ານຢາເສບຕິດ, ກະຊວງປ້ອງກັນຄວາມສະຫງົບ ສາມາດມ້າງຄະດີກ່ຽວ ກັບຢາເສບຕິດໃນຂອບເເຂດທົ່ວປະເທດໄດ້ທັງໝົດ 1.106 ເລື່ອງ, ຈັບຜູ້ຕ້ອງຫາໄດ້ 1.562 ຄົນ, ຍິງ 176 ຄົນ, ໃນນັ້ນເປັນຄົນຕ່າງປະເທດ 42 ຄົນ, ຍິງ 2 ຄົນ. ຢຶດຢາບ້ານໄດ້ 101.586.361 ເມັດ ຫລື ເທົ່າກັບ 10.158 ກິໂລກຼາມ, ຢາໄອສ໌ 1.593 ກິໂລກຼາມ, ເຮໂລອິນ 10 ກິໂລກຼາມ, ກັນຊາ 3.036 ກິໂລກຼາມ ແລະ ອື່ນໆ.
ພັນເອກ ບົວພັນ ພວງມະນີ ຮອງຫົວໜ້າກົມໃຫ່ຍຕໍາຫຼວດ, ກະຊວງປ້ອງກັນຄວາມສະຫົງບ ໃຫ້ສຳພາດຕໍ່ນັກຂ່າວໂທລະພາບປ້ອງກັນຄວາມສະຫງົບເມື່ອບໍ່ດົນມານີ້ວ່າ: ພາຍຫລັງສະພາແຫ່ງຊາດ ໄດ້ຮັບຮອງເອົາ 2 ວາລະແຫ່ງຊາດຂອງລັດຖະ ບານ. ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປຶກສາຫາລືເພື່ອວາງແຜນຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍໄດ້ແຕ່ງ ຕັ້ງຄະນະຮັບຜິດຊອບຂັ້ນກະຊວງງຢ່າງລະອຽດ. ສ່ວນການຈັດຕັ້ງປະຕິບັດວຽກງານຕົວຈິງ ໄດ້ແບ່ງອອກເປັນ 3 ໄລຍະ ຄື: ໄລຍະທີ 1 ແຕ່ເດືອນກັນຍາ ຫາ ທັນວາ 2021 ເປັນໄລຍະກະກຽມດ້ວຍການເຜີຍແຜ່ເອກະສານ ແລະ ກະກຽມວຽກງານດ້ານຕ່າງໆ ທີ່ກ່ຽວຂ້ອງ, ໄລຍະທີ 2 ແຕ່ເເດືອນມັງກອນ ປີ 2022 ຫາ ເດືອນ ສິງຫາ ປີ 2023 ເປັນໄລຍະຈັດຕັ້ງປະຕິບັດວຽກງານຕົວຈິງຢ່າງຮອບດ້ານ ແລະ ເຕັມຮູບແບບ ແລະ ໄລຍະທີ 3 ແຕ່ເດືອນກັນຍາ ຫາ ເດືອນທັນວາ 2023 ແມ່ນໄລຍະສະຫລຸບຄືນໝາກຜົນໃນການຈັດຕັ້ງປະຕິບັດວາລະແຫ່ງຊາດ.
ຮອງຫົວໜ້າກົມໃຫ່ຍຕໍາຫຼວດ ໃຫ້ຮູ້ຕື່ມວ່າ: ເຖີງວ່າຍັງບໍ່ທັນເຖີງໄລຍະການຈັດ ຕັ້ງປະຕິບັດວຽກງານຢ່າງ ຮອບດ້ານ ແຕ່ໃນໄລຍະ 3 ເດືອນຜ່ານມາ ຄື: ແຕ່ເດືອນສິງຫາ ຫາ ເດືອນຕຸລາ ປີ 2021 ເຈົ້າໜ້າທີ່ຕໍາຫລວດສະກັດກັ້ນ ແລະ ຕ້ານຢາເສບ ຕິດ ສາມາດມ້າງຄະດີກ່ຽວກັບຢາເສບຕິດໃນຂອບເຂດທົ່ວປະເທດໄດ້ທັງໝົດ 1.106 ເລື່ອງ, ຈັບຜູ້ຕ້ອງຫາໄດ້ 1.562 ຄົນ, ຍິງ 176 ຄົນ, ໃນນີ້ ຫລາຍກວ່າໝູ່ແມ່ນຢາບ້າ ຈໍານວນ 101.586.361 ເມັດ ຫລື ເທົ່າກັບ 10.158 ກິໂລກຼາມ. ປັດຈຸ ບັນ ກະຊວງປ້ອງກັນຄວາມສະຫງົບ ພວມເລັ່ງໃຫ້ແຕ່ລະອົງການປົກຄອງທ້ອງຖິ່ນ ພາຍຫລັງສໍາເລັດການເຜີຍແຜ່ເອກະສານກ່ຽວກັບວາລະແຫ່ງຊາດແລ້ວ ໃຫ້ຮີບ ຮ້ອນສ້າງແຜນດໍາເນີນງານຂອງຕົນຢ່າງລະອຽດເພື່ອກ້າວເຂົ້າສູ່ການປະຕິບັດວຽກ ງານຕົວຈິງຢ່າງຮອບດ້ານໃນໄລຍະທີ 2 ໃຫ້ປະສົບຜົນສໍາລັດຕາມຄາດໝາຍທີ່ລັດ ຖະບານໄດ້ວາງໄວ້.
Cr: ມົດແດງນ້ອຍ