ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ພ້ອມແລ້ວ ສຳລັບການສະແດງ ໃນງານສະເຫຼີມສະຫຼອງປີທ່ອງທ່ຽວລາວ 2018 ຂອງແຂວງອຸດົມໄຊ

ມາຮອດປັດຈຸບັນ ກ້ອນກໍາລັງການສະແດງ ທີ່ຈະສະແດງຕົວຈິງໃນພິທີສະເຫຼີມສະ ຫຼອງ ປີທ່ອງທ່ຽວລາວ2018 ພ້ອມກັບການສະເຫຼີມສະຫຼອງບຸນປີໃຫມ່ຂອງຊົນເຜົ່າກຶມຸ ຂອງແຂວງອຸດົມໄຊ ແມ່ນມີຄວາມພ້ອມແລ້ວ 95 %.

ທ່ານ ມະຫາໄຊ ເກດບຸນພັນ ຮອງຫົວໜ້າພະແນກ ຖວທ ແຂວງ ທັງເປັນອະນຸກຳມະການຮັບຜິດຊອບການສະແດງ ແລະ ປະຊາສຳພັນ ກ່າວວ່າ: ປັດຈຸບັນນີ້ ກ້ອນກຳລັງການສະແດງແມ່ນມີຄວາມພ້ອມແລ້ວ 95% ແລະ ຈະພ້ອມສະແດງຮັບໃຊ້ໃນງານສະເຫຼີມສະຫຼອງປີທ່ອງທ່ຽວລາວ 2018 ທີ່ຈະຈັດຂຶ້ນໃນວັນທີ 13 ມັງກອນນີ້ ພາຍຫຼັງທີ່ໄດ້ມີການຝຶກຊ້ອມກັນມາຕັ້ງແຕ່ວັນທີ 28 ທັນວາ 2017 ເປັນຕົ້ນມາ ເຊິ່ງການສະແດງທັງໝົດແມ່ນປະກອບມີ 5 ລາຍການ ຄື ລາຍການທີ 1 ມີຊືວ່າ: ພູຜາປ່າໄມ້ແລະສາຍນ້ຳ,2 ມວນໃຈປີໃຫມ່ລາວ ຂອງຊົນເຜົ່າລື້,3 ດອກຄາຍແລະສຽງແຄນຂອງເຜົ່າມົ້ງ,4 ສີສັນບັນດາເຜົ່າ ທັງ 12 ເຜົ່າໃນແຂວງອຸດົມໄຊແລະ ລາຍການທີ 5 ມີຊືວ່າ ວັດທະນາທຳອັນລ້ຳຄ່າຂອງຊົນເຜົ່າກຶມມຸ ເຊິ່ງລາຍການສະແດງທັງຫມົດນັ້ນ ແມ່ນການສະແດງຊຸດໃຫຍ່ ໂດຍມີຊື່ວ່າ ອຸດົມໄຊ ເມືອງແຫ່ງສະເໜ່ ທະເລພູເຂົາຊົນເຜົ່ານ້ຳໃຈດີ ແລະ ມີເນື້ອໃນສ່ອງແສງເຖິງ ສີສັນທໍາມະຊາດ,ວັດທະນາທໍາອັນດີງາມຂອງຊົນເຜົ່າ ພາຍໃນແຂວງອຸດົມໄຊ.

  ທ່ານ ມະຫາໄຊ ເກດບຸນພັນ ອະນຸກຳມະການຮັບຜິດຊອບວຽກງານການສະແດງ ແລະ ປະຊາສຳພັນ ກ່າວຕື່ມອີກວ່າ: ການຝຶກຊ້ອມຕັ້ງແຕ່ເລີ່ມຕົ້ນຈົນມາຮອດປັດຈຸບັນ ແມ່ນມີຄວາມຫຍຸ້ງຍາກພໍສົມຄວນຍ້ອນ ນັກສະແດງທັງໝົດ ແມ່ນນັກຮຽນ ແລະ ພວມສຸມໃສ່ການສອບເສັງປະຈຳພາກຮຽນ ແຕ່ຍ້ອນຄວາມຕັດສິນໃຈສູງ ແລະ ການສະໜັບສະໜູນ ຈາກຜູ້ປົກຄອງ ຈຶ່ງເຮັດໃຫ້ການຝຶກຊ້ອມດຳເນີນໄປໄດ້ດ້ວຍດີ ແລະ ສຳເລັດ ຕາມລະດັບຄາດໝາຍ.

ໂອກາດດັ່ງກ່າວ ທ່ານໄດ້ກ່າວເຊີນຊວນມວນຊົນທັງພາຍໃນ,ຕ່າງແຂວງແລະຕ່າງ ປະເທດ ໃຫ້ເຂົ້າມາຮັບຊົມການສະແດງ ດັ່ງກ່າວ ພ້ອມທັງເຂົ້າຮ່ວມສະເຫຼີມສະຫຼອງປີທ່ອງທ່ຽວລາວ 2018 ພ້ອມກັບການສະເຫຼີມສະຫຼອງບຸນປີໃຫມ່ຂອງຊົນເຜົ່າກຶມມຸ ທີ່ຈະຈັດຂຶ້ນໃນລະຫວ່າງວັນທີ 12-15 ມັງກອນ 2018ນີ້.