ມຊ ເຊັນສັນຍາຂາຍດິນ ເຂດໂຮງຮຽນອະນຸບານສາທິດ ໃຫ້ນາຍ ທຶນຈີນບໍ່ມີມູນຄວາມຈິງ

ໃນຕອນບ່າຍວັນທີ 26 ເມສາ 2024 ຜ່ານມາ, ມີເຟສບຸກ ຂອງຜູ້ບໍ່ຫວັງດີ ໄດ້ໂພສຂໍ້ຄວາມປະກອບພາບວ່າ: ປົດທ່ານ ອຸດົມ ພອນຄຳເພັງ ອະທິການບໍດີ ມຊ ແລ້ວແຕ່ງຕັ້ງ ທ່ານ ເດຊານຸລາດ ແສນດວງເດດ ຮັກສາການແທນ ຍ້ອນຜູ້ກຽວເຊັນຂາຍດິນ ແຖວໂຮງຮຽນອະນຸບານ ສາທິດ ຫາອາຄານຮຽນຕຶກ C ແລະ ຕຶກ E ຄະນະເສດຖະສາດ ແລະ ບໍລິຫານທຸລະກິດ ໃຫ້ນາຍ ທຶນຈີນ. ປັດຈຸ ບັນ, ກຳລັງສ້າງກຳແພງອ້ອມເອົາທັງທີ່ນັກສຶກສາຍັງຮຽນຢູ່ 2 ອາຄານດັ່ງກ່າວ. ທາງມະຫາວີທະຍາໄລແຫ່ງຊາດ ໄດ້ຢືນຢັນວ່າ: ຂໍ້ຄວາມດັ່ງກ່າວ ແມ່ນບໍ່ມີມູນຄວາມຈິງແຕ່ປະ ການໃດ.

ມາໃນວັນທີ 30 ເມສາ 2024 ນີ້, ມະຫາວິທະຍາໄລແຫ່ງ ຊາດ(ມຊ) ໄດ້ອອກແຈ້ງການ ມາຍັງພະນັກງານ, ຄູ-ອາຈານ, ພະ ນັກງານອາວຸໂສບຳນານ ແລະ ປະຊາຊົນ ໃນຂອບເຂດທົ່ວປະເທດ ຮັບຮູ້ຄວາມເປັນຈິງ ກ່ຽວກັບເນື້ອໃນລົງຂ່າວໃນສື່ສັງຄົມອອນລາຍ(ເຟສບຸກ) ທີ່ວ່າ: “ອະທິການບໍດີ ມຊ ເຊັນຂາຍດິນແຖວໂຮງຮຽນອະນຸບານສາທິດ ຫາອາຄານຮຽນ ຕຶກ C ແລະ ຕຶກ E ຄະນະເສດຖະສາດ ແລະ ບໍລິຫານທຸລະກິດ ໃຫ້ນາຍທຶນຈີນ” ແມ່ນບໍ່ມີມູນຄວາມຈິງແຕ່ຢ່າງໃດ. ໃນຄວາມເປັນຈິງ ແມ່ນເປັນໂຄງການ ພັດທະນາໂຮງຮຽນອະນຸບານສາທິດ ຄະນະສຶກສາສາດ ມຊ ໃຫ້ນັບມື້ນັບມີຄຸນນະພາບຂຶ້ນເທື່ອລະກ້າວ ໂດຍເລີ່ມຈາກການສ້າງບົດວິພາກ ສຶກສາຄວາມເປັນໄປໄດ້ ຂອງຄະນະສຶກສາສາດ ມຊ ແລ້ວຈຶ່ງໄດ້ນຳສະເໜີຕໍ່ ຄະນະນໍາ ມຊ. ຜ່ານການພິ ຈາລະນາ ແລະ ເຫັນດີເປັນເອກະພາບ ຈາກຄະນະນໍາ ມຊ ແລ້ວ ຈຶ່ງໄດ້ສະເໜີຂໍຄຳເຫັນນຳທ່ານ ລັດຖະມົນຕີ ກະຊວງສຶກສາທິ ການ ແລະ ກິລາ ແລ້ວຈຶ່ງຕົກລົງໃຫ້ຈັດຕັ້ງປະຕິບັດໂຄງການດັ່ງກ່າວ.

ຕໍ່ກັບຂໍ້ຄວາມທີ່ວ່າ: ປົດຕຳແໜ່ງອະທິການບໍດີ ມຊ ແລ້ວແຕ່ງຕັ້ງ ທ່ານ ເດຊານຸລາດ ແສນດວງເດດ ຮັກສາການແທນ ກໍບໍ່ມີມູນເປັນຈິງ, ໃນຄວາມເປັນຈິງແລ້ວ ທ່ານ ອຸດົມ ພອນຄຳເພັງ ອະທິການບໍດີ ມຊ ອອກພັກການ-ຮັບອຸດໜູນບຳນານ ໂດຍປະຕິບັດຕາມ ດໍາລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ-ຮັບອຸດໜູນບຳນານ ສະບັບເລກທີ 122/ນຍ, ລົງວັນທີ 29 ມັງກອນ 2024 ແລະ ມະຕິຕົກລົງ ຂອງຄະນະເລຂາທິການສູນກາງພັກ, ສະ ບັບເລກທີ 38/ຄລສພ, ລົງວັນທີ 5 ກຸມພາ 2024 ເຊິ່ງເປັນໄປຕາມລະບຽບການ ແລະ ນະໂຍບາຍຕໍ່ການຮັບອຸດໜູນບຳນານຂອງພັກ-ລັດ.

ຂ່າວ: ທະນູທອງ