ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມສ ດອນໜູນ ພ້ອມຈະໄຂສົກຮຽນໃໝ່ 2020-2021 ຄວບຄູ່ກັບ New Normal

ໂຮງຮຽນມັດທະຍົມສົມບູນ ດອນໜູນ (ມ.ສ ດອນໜູນ ) ຊຶ່ງເປັນໂຮງຮຽນພາກລັດ ຕັ້ງຢູ່ເມືອງໄຊທານີ, ນະຄອນຫລວງວຽງຈັນ ພ້ອມແລ້ວຈະໄຂສົກຮຽນໃໝ່ 2020-2021, ພ້ອມກັບໂຮງຮຽນສາມັນສຶກສາແຫ່ງອື່ນໆ ທົ່ວປະເທດຢ່າງເປັນທາງ ການໃນວັນທີ 1 ກັນຍາ 2020 ຄວບຄູ່ກັບການສືບຕໍ່ປະຕິບັດມາດຕະການປ້ອງກັນພະຍາດໂຄວິດ-19 ທີ່ຂັ້ນເທິງວາງອອກຢ່າງເຂັ້ມງວດ ເພື່ອເຮັດໃຫ້ການຮຽນ-ການສອນດໍາເນີນໄປດ້ວຍດີ ແລະ ຮັບປະກັນບໍ່ໃຫ້ມີພະຍາດໂຄວິດ-19 ເກີດຂຶ້ນ.

ທ່ານ ສຸດພະໄຊ ວໍລະບຸດ, ຜູ້ອໍານວຍການໂຮງຮຽນ ມ.ສ ດອນໜູນ ໃຫ້ສໍາພາດວ່າ: ເພື່ອກະກຽມໃຫ້ແກ່ການໄຂສົກຮຽນໃໝ່ 2020-2021 ທາງໂຮງຮຽນໄດ້ເອົາໃຈໃສ່ກວດກາຄືນອຸປະກອນທີ່ຮັບໃຊ້ໃນການຮຽນ-ການສອນ ເປັນ ຕົ້ນ: ໂຕະ, ຕັ່ງ, ກະດານ ແລະ ອື່ນໆ ໃຫ້ມີຄວາມພ້ອມ ໂດຍໄດ້ສ້ອມແປງຄືນອຸປະກອນໃດທີ່ເປ່ເພ, ພ້ອມນີ້ ໄດ້ປຶກສາຫາລືກັບຄະນະພັກເມືອງໄຊທານີ ແລະ ສະມາຄົມພໍ່ແມ່ນັກຮຽນ ເພື່ອທົບທວນຄືນການຮຽນ-ການສອນໃນສົກ 2019-2020 ຜ່ານມາ, ລວມເຖິງປັບປຸງລະບຽບການຕ່າງໆ ຂອງໂຮງຮຽນຄືນໃໝ່ ເພື່ອໃຫ້ຮັດກຸມ ແລະ ເຮັດໃຫ້ການຮຽນ-ການສອນໃນສົກຮຽນໃໝ່ມີຄຸນນະພາບດີກ່ວາເກົ່າ ແລະ ບໍ່ໃຫ້ມີປະກົດການຫຍໍ້ທໍ້ຕ່າງໆ ເກີດຂຶ້ນໃນໂຮງ ຮຽນ. ນອກຈາກນີ້ ໄດ້ເປີດລົງທະບຽນຮັບນັກຮຽນ ເຊິ່ງສົກຮຽນ 2020-2020 ມ.ສ ດອນໜູນ ສາມາດຮັບນັກຮຽນໄດ້ທັງໝົດ 1.690 ກ່ວາຄົນ. ສ່ວນຄູສອນ ມີທັງໝົດ 57 ຄົນ, ຍິງ 51 ຄົນ, ໃນນີ້ ມີຄູອາສາສະໝັກ 5 ຄົນ. ຈໍານວນຄູສອນທັງໝົດນີ້ ເຫັນວ່າຍັງບໍ່ພຽງພໍໃນບາງວິຊາ ຄື: ພາສາລາວ, ພູມສາດ, ປະຫວັດສາດ ແລະ ວິຊາສຶກສາພົນລະເມືອງ.

ຜູ້ອໍານວຍການໂຮງຮຽນ ມ.ສ ດອນໜູນ ໃຫ້ຮູ້ຕື່ມວ່າ: ການໄຂສົກຮຽນໃໝ່ຂອງ ມ.ສ ດອນໜູນ ໃນປີນີ້ ຖືເປັນການໄຂສົກຮຽນປົກກະຕິໃນຮູບແບບໃຫມ່ ຫຼື New Normal ເພາະທາງໂຮງຮຽນຍັງຈະສືບຕໍ່ຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ທີ່ຂັ້ນເທິງວາງອອກຢ່າງເຂັ້ມງວດ ເປັນຕົ້ນ: ຈະມີການກວດວັດແທກອຸນນະພູມທັງຄູ ແລະ ນັກຮຽນໃນທຸກໆ ຕອນເຊົ້າ, ແຈກຢາຍຜ້າອັດປາກ-ອັດດັງໃຫ້ນັກຮຽນໃສ່ໃນເວລາເຂົ້າຫ້ອງຮຽນ, ຫ້າມນັກຮຽນຢູ່ຊຸມນຸມກັນເປັນຈຳນວນຫລາຍ, ສ້າງບ່ອນລ້າງມືດ້ວຍສະບູໃນໂຮງຮຽນ, ລວມເຖິງການອັດປະຕູໂຮງຮຽນເພື່ອບໍ່ໃຫ້ນັກຮຽນອອກນອກໂຮງຮຽນໃນເວລາພັກທ່ຽງ.

ສໍາລັບໂຮຽຮຽນ ມ.ສ ດອນໜູນ ໄດ້ຮັບການສ້າງຕັ້ງຂຶ້ນໃນປີ 1982 ແລະ ໄດ້ຮັບການປະກາດໃຫ້ເປັນໂຮງຮຽນປອດຢາເສບຕິດ. ພ້ອມນີ້ ຍັງໄດ້ຮັບການປະກາດໃຫ້ເປັນໂຮງຮຽນຂຽວສະອາດສິ່ງແວດລ້ອມດີຈາກກະຊວງສຶກສາທິການ ແລະ ກິລາ 3 ປີຊ້ອນມາແລ້ວ.

ໂດຍ: ບຸນຕຽງ ຈັນທະວົງ