ວັນທີ 19 ກັນຍາ 2024 ຢູ່ທີ່ຫ້ອງການກອງກວດກາປ່າໄມ້ແຂວງຄຳມ່ວນ ໄດ້ຈັດພິທີມອບ – ຮັບຜູ້ຖືກຫາ ແລະ ເຄື່ອງຂອງກາງສັດປ່າ ປະເພດຫວງຫ້າມ ໂດຍການເຂົ້າຮ່ວມຂອງທ່ານ ພັທ ປທ ສຸລິຈັນ ສີສະຫວັດ ຮອງຫົວໜ້າກົມສິ່ງແວດລ້ອມ, ທ່ານ ພັທ ວັນຄຳ ເດດຂຸນຟອງ ຫົວໜ້າພະແນກຕຳຫຼວດສິ່ງແວດລ້ອມ ປກສ ແຂວງຄຳມ່ວນ, ທ່ານ ພູວຽງ ມະຫາພົມ ຮອງຫົວໜ້າກອງກວດກາປ່າໄມ້ແຂວງຄຳມ່ວນ ມີບັນດາພະນັກງານທີ່ກ່ຽວຂ້ອງ ເຂົ້າຮ່ວມ.
ການມອບ-ຮັບໃນຄັ້ງນີ້ ແມ່ນມີຜູ້ຖືກຫາຈຳນວນ 02 ຄົນ ຊື່ ທ້າວ ເຈັກ ສຸລິມົນ ອາຍຸ 27 ປີ, ທ້າວ ບຸນໄມ ອາຍຸ 24 ປີ ທັ້ງສອງຄົນແມ່ນເປັນປະຊາຊົນ ຢູ່ບ້ານດຸ ເມືອງບົວລະພາ ແຂວງຄຳມ່ວນ ແລະ ຂອງກາງສັດປ່າຫວງຫ້າມ ລີ່ນຈຳນວນ 02 ໂຕ, ນ້ຳໜັກ 4,9 ກິໂລກຼາມ, ລູກໂຕຄ່າງແດງ ຈຳນວນ 01 ໂຕ, ນ້ຳໜັກ 01 ກິໂລກຼາມ, ພ້ອມດ້ວຍລົດຈັກຈຳນວນ 01 ຄັນ, ໂທລະສັບຈຳນວນ 02 ໜ່ວຍ. ທັ້ງສອງແມ່ນຖືກຂໍ້ກ່າວຫາ ການຄ້າຂາຍ ຫຼື ມີໄວ້ໃນຄອບຄອງສັດນ້ຳ ຫຼື ສັດປ່າທີ່ຫວງຫ້າມ ຕາມມາດຕາ 334 ດັ່ງນັ້ນຈຶ່ງໄດ້ມອບໃຫ້ກອງກວດກາປ້າໄມ້ ແຂວງ ຄຳມ່ວນ ເພື່ອໄປດຳເນີນການສືບສວນ – ສອບສວນ ແລະ ດຳເນີນຄະດີຕາມຂັ້ນຕອນຂອງກົດໝາຍ.
ພາບ-ຂ່າວ ຮອ ແສງອາລຸນ
