ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມອບສະຖານີວິທະຍຸ-ໂທລະພາບ ໃຫ້ອຳນາດການປົກຄອງເມືອງໂຂງຄຸ້ມຄອງ ແລະນຳໃຊ້

ວັນທີ 11 ມັງກອນ 2019, ພະແນກ ຖວທ ແຂວງຈຳປາສັກ ໄດ້ມອບສະຖານີວິທະຍຸ-ໂທລະພາບເມືອງໂຂງ ໃຫ້ອົງການປົກຄອງເມືອງໂຂງ ແຂວງຈຳປາສັກ ເປັນຜູ້ຄຸ້ມຄອງ ແລະ ນຳໃຊ້.
ເຂົ້າຮ່ວມພິທີມອບ-ຮັບ ໃນຄັ້ງນີ້, ທ່ານ ຄຳສຸກ ຈັນທະວົງ, ຮອງເຈົ້າເມືອງໆໂຂງ, ທ່ານ ນາງ ມາລາ ຈັນທະລາມ ແລະ ທ່ານ ຄຳມ່ວນ ພິມສີວັນໂນ ຮອງຫົວໜ້າພະແນກ ຖວທ ແຂວງພ້ອມຄະນະ ແລະ ຜູ້ຕາງຫນ້າບັນດາຂະແໜງການກ່ຽວຂ້ອງຂອງແຂວງ.
ສະຖານີວິທະຍຸ -ໂທລະພາບເມືອງໂຂງໄດ້ຮັບການສ້າງຕັ້ງຂຶ້ນໃນປີ 2000 ໂດຍຂຶ້ນກັບພະແນກ ຖວທ ແຂວງ , ແລະ ທຳການກະຈາຍສຽງອອກອາກາດ ຜ່ານຄື້ນຄວາມຖີ່ FM 97,5 ເມກາເຮີສ,  ດ້ວຍກຳລັງສົ່ງ 250 ວັດ, ສາມາດກະຈາຍສຽງກວມພື້ນທີ່ໄດ້ 40 ກິໂລຕາແມັດ, ນອກຈາກກະຈາຍສຽງໄດ້ພາຍໃນເມືອງໂຂງແລ້ວ ຍັງສາມາດກວມເອົາບາງພື້ນທີ່ຂອງເມືອງປະທຸມພອນ, ເມືອງມຸນລະປາໂມກ ແລະ ເມືອງສຸຂຸມາ ຕື່ມອີກ. ແຕ່ສຳລັບໂທລະພາບແມ່ນໄດ້ຢຸດການນຳໃຊ້ມາໄດ້ຫຼາຍປີແລ້ວ.
ການມອບສະຖານີວິທະຍຸ- ໂທລະພາບເມືອງໂຂງ ໃຫ້ມາຂຶ້ນກັບຄວາມຮັບຜິດຊອບຂອງອົງການປົກຄອງເມືອງໂຂງ ແມ່ນປະຕິບັດຕາມຂໍ້ຕົກລົງຂອງຫົວໜ້າພະແນກ ຖວທ ແຂວງຈຳປາສັກ ສະບັບເລກທີ 130 ຖວທ ຈສ, ລົງວັນທີ 12 ກັນຍາ 2018, ໂດຍມອບໃຫ້ການຈັດຕັ້ງຂັ້ນເມືອງສັບຊ້ອນອຳນວຍການວິທະຍຸ-ໂທລະພາບເມືອງໂຂງ ໃຫ້ເປັນວຽກໜື່ງທີ່ຂື້ນກັບຫ້ອງການ ຖວທ ເມືອງໂຂງ ພ້ອມທັງຂຶ້ນແຜນໃຊ້ຈ່າຍງົບປະມານຕາມລະບຽບການ. ສ່ວນພະແນກ ຖວທ ແຂວງ ທີ່ເປັນສາຍຕັ້ງນັ້ນ ຍັງສືບຕໍ່ເຮັດໜ້າທີ່ຊຸກຍູ້ທາງດ້ານວຽກງານວິຊາການຄືດັ່ງໄລຍະຜ່ານມາ.
ນອກຈາກມອບສະຖານີວິທະຍຸ – ໂທລະພາບ ໃຫ້ມາຂຶ້ນກັບຄວາມຮັບຜິດຊອບຂອງເມືອງໂຂງແລ້ວ, ພະແນກ ຖວທ ແຂວງ ຍັງໄດ້ຜ່ານຂໍ້ຕົກລົງຂອງຫົວໜ້າພະແນກ ຖວທ ແຂວງເລກທີ 2188 ຖວທ.ຈສ ລົງສັນທີ 31 ທັນວາ 2018 ວ່າດ້ວຍການແບ່ງຂັ້ນຄຸ້ມຄອງວຽກງານການທ່ອງທ່ຽວລະຫວ່າງແຂວງກັບເມືອງ ຕາມທິດນໍາ 3 ສ້າງຂອງພັກໃຫ້ມີປະສິດທິພາບ ຕື່ມອີກດ້ວຍ.

 

ໂດຍ: ເກດສະໜາ ແກ້ວສຸວັນນະແສງ