ພິທີມອບຮັບໂຄງການປັບປຸງ ແລະຍົກລະດັບໂຮງໝໍແຂວງຫຼວງພະບາງ ຈັດຂຶ້ນໃນວັນທີ່ 16 ສີງຫາ 2024. ມີ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ ນາງ ຟ່າງຫົງ ເອກອັກຄະລັດຖະທູດ ສປ ຈີນ ປະຈໍາລາວ, ພ້ອມ ດ້ວຍການນຳຂອງແຂວງ, ບໍລິສັດຮັບເໝົາ ແລະພາກສ່ວນກ່ຽວ ຂ້ອງເຂົ້າຮ່ວມ.
ໂຄງການປັບປຸງ ແລະຍົກລະດັບໂຮງໝໍແຂວງຫຼວງພະບາງ ເປັນໂຄງການສະໜັບສະໜູນຢ່າງເຕັມທີ່ ຈາກອົງການພາກລັດທຸກຂັ້ນຂອງທັງລາວ ແລະຈີນ, ເລີ້ມເຊັນສັນຍາບໍລິຫານໂຄງການໃນເດືອນທັນວາ ປີ 2020, ຮອດເດືອນພືດສະພາປີ 2021, ຜູ້ພັດທະນາໂຄງການ ໄດ້ດຳເນີນການສຳຫຼວດທາງວິຊາການ ຮອດວັນທີ 28 ຕຸລາ, ການອອກແບບເບື້ອງຕົ້ນຂອງໂຄງການ ໄດ້ຜ່ານການຮັບຮອງ, ໃນວັນທີ 27 ມັງກອນ ປີ 2022 ແບບກໍ່ສ້າງໂຄງ ການໄດ້ຜ່ານການຮັບຮອງຢ່າງເປັນທາງການ.
ຈາກນັ້ນ ຜູ້ຮັບເໝົາໄດ້ເລີ່ມປະຕິບັດການກໍ່ສ້າງໃນວັນທີ 7 ກັນຍາ ປີ 2022, ເຊີ່ງຜູ້ພັດທະນາໂຄງການ ໄດ້ຈັດສົ່ງຄະນະບໍລິ ຫານ ທີ່ປະກອບດ້ວຍວິສະວະກອນຜູ້ຕິດຕາມໂຄງການ ແລະຜູ້ຕາງໜ້າຂອງຝ່າຍການອອກແບບ ເພື່ອຄຸ້ມຄອງການກໍ່ສ້າງໂຄງ ການໃຫ້ຖືກຫຼັກວິທະຍາສາດ, ຜ່ານການຈັດຕັ້ງຢ່າງລະອຽດຮອບຄອບ ແລະປະຕິບັດຕາມຫຼັກການ “ຖືກຕ້ອງຕາມກົດໝາຍ, ມີຄວາມຊື່ສັດຈິງໃຈ, ຍຸຕິທຳ ແລະຖືກຕາມຫຼັກວິທະຍາສາດ”, ຄະນະບໍລິຫານໂຄງການ ໄດ້ປະຕິບັດຕາມແຜນອອກແບບ ແລະບັນດາຂໍ້ກໍານົດໃນມາດຕະຖານຢ່າງເຂັ້ມງວດ, ເນັ້ນໃສ່ການກໍ່ສ້າງໂຄງການທີ່ມີຄຸນນະພາບດີເດັ່ນ, ພ້ອມທັງມີການຄວບຄຸມຄຸນ ນະພາບ, ຄວາມຄືບໜ້າການກໍ່ສ້າງ ແລະການລົງທຶນຢ່າງຮອບດ້ານ, ຮັບປະກັນໃຫ້ໂຄງການໄດ້ສຳເລັດຢ່າງສົມບູນຕາມກຳນົດເວລາ.
ຮອດວັນທີ 18 ກໍລະກົດ ປີ 2024, ໂຄງການປັບປຸງ ແລະຍົກລະດັບໂຮງໝໍແຂວງຫຼວງພະບາງ ໄດ້ຜ່ານການກວດກາຮັບ ຮອງ ຈາກທຸກພາກສ່ວນທີ່ກ່ຽວຂ້ອງ, ລວມມີການສ້າງໃໝ່ບັນດາອາຄານຮັບຮອງການປີ່ນປົວລວມ 50 ຕຽງ, ເປັນຕົ້ນ ຕຶກພະແນກພາຍນອກ ແລະພະແນກເສັ້ນເລືອດຫົວໃຈ, ພ້ອມນີ້ ໄດ້ກໍ່ສ້າງຫໍພັກຊ່ຽວຊານຈີນ, ເຂດບໍາບັດນໍ້າເປື້ອນ, ອ່າງນໍ້າສໍາລັບການດັບເພີງ ແລະຫ້ອງຈັກປ້ຳສູບນໍ້າດັບເພີງ, ນອກນັ້ນ ໄດ້ມີ ການບູລະນະສ້ອມແປງຕຶກອາຄານເກົ່າ ແລະໂຄງການກາງແຈ້ງຂອງໂຮງໝໍ, ທັງໄດ້ສະໜອງເຄື່ອງອຸປະກອນການແພດທີ່ຈຳເປັນຈຳນວນໜື່ງ,
ພ້ອມນີ້ ໂຮງໝໍປະຊາຊົນເລກໜຶ່ງແຂວງຢູນນານ ຈະໃຫ້ການຊ່ວຍເຫຼືອດ້ານເຕັກນິກການແພດເປັນເວລາ 03 ປີ ແລະຈັດສົ່ງຄະນະຊ່ຽວຊານມາປະຈຳຢູ່ໂຮງໝໍຫຼວງພະບາງ ເພື່ອໃຫ້ບໍລິ ການດ້ານການແພດ ແລະສົ່ງພະນັກງານພະຍາບານຂອງໂຮງໝໍແຂວງຫຼວງພະບາງ ໄປຮັບການຝຶກອົບຮົມຢູ່ຈີນອີກດ້ວຍ.
ໃນໂອກາດນີ້ ທ່ານ ລັດຖະມົນຕີກະຊວງສາທາລະນະສຸກ ໄດ້ສະແດງຄວາມຂອບໃຈເປັນຢ່າງສູງ ທີ່ລັດຖະບານຈີນ ໄດ້ຊ່ວຍ ເຫຼືອການປັບປຸງ ແລະຍົກລະດັບໂຮງໝໍແຂວງຫຼວງພະບາງ ເຊີ່ງຈະເຮັດໃຫ້ການບໍລິການດ້ານສາທາລະນະສຸກຂອງລາວ ໂດຍສະ ເພາະບັນດາແຂວງພາກເໜືອໄດ້ຮັບການພັດທະນາຫຼາຍຂື້ນ ແລະເປັນອີກໂຄງການ ຂີດໝາຍດ້ານການຮ່ວມມື ແບບຕິດແທດຕົວຈິງ ລະຫວ່າງ ສອງປະເທດລາວ-ຈີນ ຕື່ມອີກ.
