ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມອບເຄື່ອງຊ່ວຍເຫຼືອປະຊາຊົນ ໄດ້ຮັບຜົນກະທົບຈາກໄພທຳມະຊາດ

ເພື່ອ​ເປັນ​ການ​ບັນເທົາ​ທຸກໃຫ້​ກັບ​ປະຊາຊົນ ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ທຳ​ມະ​ຊາດ (ນ້ຳຖ້ວມ) ໃນ​ໄລຍະ​ຜ່ານ​ມາ ສະນັ້ນ ວັນ​ທີ 18 ພຶດສະພາ 2017 ກົມສະ​ສົມ​ແຫ່ງ​ລັດ ກະຊວງ​ການເງິນ​ ໄດ້​ຈັດ​ພິທີ​ມອບ​ເຂົ້າສານຈ້າວ ​ເພື່ອ​ຊ່ວຍເຫຼືອ​ປະຊາຊົນເມືອງ​ກາສີ ແຂວງ​ວຽງ​ຈັນ ລະຫວ່າງກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ເປັນ​ກຽດມອບ​ໂດຍ​ທ່ານ ບຸນ​ໂຈມ ອຸບົນປະເສີດ ຮອງ​ລັດຖະມົນຕີ​ກະຊວງ​ການ​ເງິນ ຕາງໜ້າ​ຮັບ​ໂດຍທ່ານ ບຸນ​ຄົງ ຫຼ້າ​ສຸ​ກັນ ຮອງ​ລັດຖະ​ມົນຕີ​ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ (​ຮສສ) ມີ​ພະນັກງານ​ກ່ຽວຂ້ອງ​ທັງ​ສອງຝ່າຍ​ເຂົ້າ​ຮ່ວມ.

ເຂົ້າສານ​ຈ້າວ​ທີ່​ນຳ​ມາ​ມອບໃນ​ຄັ້ງ​ນີ້ ມີ​ຈຳນວນ 70 ກວ່າໂຕນ ເຊິ່ງ​ຈະ​ມອບ​ໃຫ້​ປະຊາຊົນສອງ​ບ້ານ​ຄື: ບ້ານ​ໜອງ​ສານ ຈຳນວນ 34 ກວ່າ​ໂຕນ ແລະ ບ້ານຖ້ຳ​ເທີບ ຈຳນວນ 35 ກວ່າ​ໂຕນ ໂດຍ​ຈະ​ມອບ​ໃຫ້​ກົມ​ສັງຄົມ​ສົງເຄາະ ກະຊວງ ​ຮສສ ເປັນ​ຜູ້​ໄປມອບ​ຕໍ່ໃຫ້​ປະຊາຊົນ ທັງ​ນີ້ກໍ່​ເພື່ອຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ສຸກ​ເສີນ​ຮີບ​ດ່ວນ ຊ່ວຍເຫຼືອ​ບັນເທົາ​ທຸກ ປະກອບສ່ວນ​ຫຼຸດຜ່ອນ​ຄວາມທຸກ​ຍາກຂອງ​ປະຊາຊົນ ​ທີ່​ໄດ້​ຮັບ​ຜົນ​ກະທົບຈາກ​ໄພ​ທຳ​ມະ​ຊາດ​ຕ່າງໆ.

ໂອກາດ​ດັ່ງກ່າວ​ ທ່ານ ບຸນ​ຄົງ ຫຼ້າ​ສຸ​ກັນ ກໍ່​ໄດ້​ຕາງໜ້າ​ປະຊາຊົນ ສະແດງ​ຄວາມ​ຂອບໃຈ​ມາ​ຍັງພັກ-ລັດ ກໍ່​ຄືຂະແໜງການ​ກ່ຽວຂ້ອງ ​ທີ່​ຍາມ​ໃດ​ກໍ່​ເປັນ​ຫ່ວງ​ເປັນໃຍ​ຊີວິດ​ການ​ເປັນ​ຢູ່​ຂອງ​ພໍ່​ແມ່​ປະຊາ​ຊົນ​ໃນ​ຂອບ​ເຂດ​ທົ່ວ​ປະເທດ ແລະ ຈະ​ນຳ​ເອົາ​ເຄື່ອງ​ຈຳນວນດັ່ງກ່າວ ​ໄປ​ມອບ​ໃຫ້​ປະຊາຊົນ​ໃນບ້ານ​ເປົ້າ​ໝາຍ​ຢ່າງ​ທົ່ວ​ເຖິງ.