ວັນທີ 19 ກັນຍານີ້ ທ່ານ ແສງອາທິດ ລາວເບຼຍຢາທໍ່ ວ່າການເຈົ້າເມືອງຊຽງຮ່ອນ ແຂວງໄຊຍະບູລີ ໄດ້ນຳເອົາເຄື່ອງຊ່ອຍເຫຼືອລົງມອບໃຫ້ຄອບຄົວທີ່ໄດ້ຮັບຜົນກະທົບຈຳນວນ 8 ບ້ານ ແລະ ໂຮງຮຽນ 4 ແຫ່ງ ຂອງກຸ່ມບ້ານປາກເປັດເມືອງຊຽງຮ່ອນ ເພື່ອຟື້ນຟູໄພພິບັດນໍ້າຖ້ວມໃນຄັ້ງວັນທີ 21 ສິງຫາ ແລະ ຜົນກະທົບຈາກລະດັບນໍ້າຂອງເພີ່ມຂຶ້ນສູງໃນລະຫວ່າງວັນທີ 12-15 ກັນຍາຜ່ານມາ. ຊຶ່ງມີບ້ານໄດ້ຮັບຜົນກະທົບທັງ 2 ຄັ້ງ ມີຈຳນວນ 8 ບ້ານ, ມີ 178 ຄອບຄົວ.
ໄພພິບັດຄັ້ງນີ້, ໄດ້ເຮັດໃຫ້ເຮືອນຊານບ້ານຊ່ອງ, ເນື້ອທີ່ທຳການຜະລິດ, ເສັ້ນທາງ, ລະບົບໄຟຟ້າ ແລະ ສິ່ງອື່ນໆ ໄດ້ຮັບຜົນເສຍຫາຍ. ເຄື່ອງທີ່ນຳມາມອບໃນຄັ້ງນີ້ ປະກອບມີ ເຄື່ອງນຸ່ງຮົ່ມ, ເຂົ້າສານອາຫານແຫ້ງ ແລະ ອຸປະກອນການຮຽນ ລວມມູນຄ່າ 10 ລ້ານກີບ.
ຂ່າວ: ຖວທເມືອງຊຽງຮ່ອນ
