ໃນວັນທີ 29 ທັນວາ 2023 ທ່ານ ນ. ສຸນັດຕາ ລິດປັນຍາ ປະທານບໍລິສັດ ລິດປັນຍາ ອອກແບບ-ກໍ່ສ້າງ ຈຳກັດຜູ້ດຽວ, ບໍລິສັດ ລິດປັນຍາ ບໍລິການທຳຄວາມສະອາດ ຈຳກັດຜູ້ດຽວ ແລະ ຜູ້ອຳນວຍການໂຮງພິມ ໂຊກພາໄຊ ຈຳກັດ ໃນນາມສ່ວນບຸກຄົນ ໄດ້ມອບເງິນຊຸກຍູ້ຊ່ວຍເຫຼືອດ້ານງົບປະມານພິມໜັງສືພິມ ແລະ ວາລະສານຄວາມສະຫງົບປະຈຳປີ 2023 ມູນຄ່າ 800 ລ້ານກ່ວາກີບ ໃຫ້ກົມສື່ມວນຊົນກົມໃຫຍ່ການເມືອງ ປກສ, ໂດຍການກ່າວຮັບຂອງທ່ານ ພັນເອກ ພອນສະຫວັນ ອຸດົມເພັດ ຮອງຫົວໜ້າກົມສື່ມວນຊົນ ພ້ອມພະນັກງານທອງສອງຝ່າຍເຂົ້າຮ່ວມ.
ຍ້ອນເຫັນໄດ້ຄວາມສຳຄັນທາງດ້ານວຽກງານ ປກສ ແລະ ດ້ານງົບປະມານມີຈຳກັດ ສະນັ້ນ, ການມອບເງິນຄັ້ງນີ້ ແມ່ນເປັນການຊຸກຍູ້ຊ່ວຍເຫຼືອວຽກງານ ປກສ ໂດຍສະເພາະແມ່ນຂະແໜງການສື່ມວນຊົນໃນປີຜ່ານມາ, ເພື່ອເປັນການເຜີຍແຜ່ຂໍ້ມູນຂ່າວສານໃນຂົງເຂດວຽກງານ ປກສ ແລະ ປົກຄອງ ໃຫ້ສັງຄົມໄດ້ຮັບຮູ້ຂໍ້ມູນຂ່າວສານທີ່ຖືກຕ້ອງ ແລະ ຊັດເຈນ,
ພັນເອກ ພອນສະຫວັນ ອຸດົມເພັດ ກໍ່ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍທ່ານ ນາງ ສຸນັດຕາ ລິດປັນຍາ ທີ່ໄດ້ເຫັນຄວາມສຳຄັນໃນວຽກງານສື່ມວນຊົນ ຂອງກຳລັງ ປກສ, ງົບປະມານດັ່ງກ່າວນີ້ໄດ້ນຳໃຊ້ເຂົ້າໃນວຽກງານຈັດພິມໜັງສືພິມ ແລະ ວາລະສານ ດັ່ງກ່າວໃນປີ 2023 ຜ່ານມາ ພ້ອມທັງອວຍພອນ ໃຫ້ທ່ານດໍາເນີນທຸລະກິດໄດ້ຮັບຜົນສໍາເລັດງອກງາມ ແລະ ຫວັງວ່າຈະໄດ້ຮັບການຊ່ວຍເຫຼືອຈາກທ່ານໃນຄັ້ງຕໍ່ໄປ.
