ໃນໂອກາດວັນຊາດ ວັນທີ່ 2 ທັນວາ ຄົບຮອບ 45 ປີ ສະຫະພັນບານເຕະແຫ່ງຊາດລາວ ໄດ້ຈັດການແຂ່ງຂັນກິລາເຕະບານຂຶ້ນ ໃນລະຫວ່າງວັນທີ 6-21 ພະຈິກນີ້. ໂດຍໄດ້ປຸກລະດົມໃຫ້ບັນດາແຂວງ ແລະນະຄອນຫຼວງວຽງຈັນ ສົ່ງນັກກິລາເຂົ້າຮ່ວມ. ສະເພາະແຂວງຫຼວງພະບາງໄດ້ຈັດຢູ່ໃນກຸ່ມ ຄໍ ປະກອບມີ 4 ທີມຄື: ຫຼວງພະບາງ, ຫຼວງນ້ຳທາ, ໄຊຍະບູລີ ແລະອັດຕະປື. ເພື່ອເປັນການສຸກຍູ້ ການສົ່ງນັກກິລາເຂົ້າຮ່ວມແຂ່ງຂັນ ຕອນບ່າຍວັນທີ່ 28 ຕຸລາ 2020 ນີ້ ກຸ່ມບໍລິສັດເທຣດເຊີລາວ ໄດ້ມອບເງີນ ຈຳນວນ 50.000.000 ກີບ ແລະສະຫະພັນບານເຕະແຫ່ງຊາດ ໄດ້ມອບເງີນ ຈຳນວນ 50.000.000 ກີບ ໃຫ້ສະຫະພັນບານເຕະຫຼວງພະບາງ, ຕາງໜ້າມອບໂດຍແມ່ນ ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິຫານງານສູນກາງພັກ ແລະຮັບໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໂດຍມີພາກສ່ວນກ່ຽວຂ້ອງເປັນສັກຂີພິຍານ. ສຳລັບການກະກຽມຄວາມພ້ອມ ຂອງນັກກິລາແຂວງຫຼວງພະບາງ ທ່ານ ພວງເພັດ ພຸດທະບັນດິດ ຜູ້ຈັດການທີມໄດ້ໃຫ້ສຳພາດວ່າ: ເບື້ອງຕົ້ນໄດ້ຂັດເລືອກນັກກິລາ ຈາກການແຂ່ງຂັນບານເຕະຟຸດຊໍຊາຍໃນຮົ່ມ ປະຈຸບັນໄດ້ນັກກິລາທີ່ຈະເຂົ້າຮ່ວມຕົວຈີງ ຈຳນວນ 20 ຄົນ, ໂດຍເປັນນັກກິລາພາຍໃນແຂວງທັງໝົດ, ສ່ວນຄູຝຶກ ແມ່ນໃຊ້ ທ່ານ ທີບພະສອນ ສິດທິພອນ ວິຊາການຈາກພະແນກສກສາທິການ ແລະ ກິລາແຂວງ, ປະຈຸບັນໄດ້ຈັດການຝຶກຊ້ອມເປັນປົກກະຕິ ເຫັນວ່ານັກກິລາແມ່ນມີຄວາມພ້ອມຫຼາຍ ຄາດວ່າການແຂ່ງຂັນຄັ້ງນີ້ ຈະໃຫ້ໄດ້ເຂົ້າເຖີງຮອບ 4 ທີມສຸດທ້າຍ.

ສຳລັບຕາຕະລາງການແຂ່ງຂັນ ໃນຮອບແບ່ງກຸ່ມ ນັດທຳອິດຂອງແຂວງຫຼວງພະບາງ ຈະພົບກັບ ແຂວງໄຊຍະບູລີ ໃນວັນທີ່ 10 ພະຈິກ ທີ່ສະໜາມກິລາຫຼັກ 16 (2), ນັດທີ່ 2 ຈະພົບກັບແຂວງຫຼວງນໍ້າທາ ໃນວັນທີ່ 12 ພະຈິກ ທີ່ສະໜາມກິລາກອງທັບ ແລະນັດທີ່ 3 ຈະພົບກັບ ແຂວງອັດຕະປື ໃນວັນທີ່ 14 ພະຈິກ ທີ່ສະໜາມກິລາຫຼັກ 16 (1), ຫາກໄດ້ເປັນທີ່ 1 ຫຼື ທີ່ 2 ຂອງສາຍ ຈະໄດ້ຜ່ານເຂົ້າໄປແຂ່ງຂັນໃນຮອບ 8 ທີມສຸດທ້າຍ.

Loading...