ມອບໂລ່ທີ່ລະນຶກໃຫ້ຕໍາຫຼວດລາດຕະເວນທາງນໍ້າ ປະຈໍາຢູ່ສູນປະສານງານ ລາວ-ຈີນ

ໃນວັນທີ 13 ສິງຫາ 2024 ນີ້, ທີ່ສູນປະສານງານ ລາວ-ຈີນ ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ຈັດພິທີມອບໂລ່ທີ່ລະນຶກໃຫ້ແກ່ເຈົ້າໜ້າທີ່ຝ່າຍຈີນ ແລະ ພາກສ່ວນວິຊາການ ຜູ້ທີ່ມີຜົນງານດີເດັ່ນປະຕິບັດໜ້າທີ່ຢູ່ສູນປະສານງານບ້ານມອມ. ໂດຍການເປັນປະທານ ແລະ ມອບໂລຂອງ ສະຫາຍ ພັນໂທ ເຄນ ແກ້ວດາລາ ຄະນະບໍລິຫານງານພັກກອງບັນຊາການ ຮອງຫົວໜ້າຫ້ອງການເມືອງກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນຕີ ໂຈໂກ່ມິນ ຫົວໜ້າສູນປະສານງານບ້ານມອມ ຝ່າຍຈີນ ມີຄະນະພັກ – ຄະນະບັນຊາ ຕະຫຼອດຮອດພະນັກງານ ຝ່າຍລາວ-ຈີນ ເຂົ້າຮ່ວມຢ່າງພ້ອມພຽງ.

ສະຫາຍ ພັນໂທ ສົມພອນ ພົງປະສິດ ຮອງຫົວໜ້າພະແນກນະໂຍບາຍ ຫ້ອງການເມືອງກອງບັນຊາການທະຫານແຂວງບໍ່ແກ້ວ ໄດ້ຂຶ້ນຜ່ານຂໍ້ຕົກລົງຂອງກອງບັນຊາການທະຫານແຂວງ ສະບັບເລກທີ 1377 /ກທຂ-ບກ ລົງວັນທີ 5 ສິງຫາ 2024 ວ່າດ້ວຍການມອບໂລ່ທີ່ລະນຶກໃຫ້ແກ່ເຈົ້າໜ້າທີ່ຝ່າຍຈີນ ແລະ ພາກສ່ວນວິຊາການ ຜູ້ທີ່ມີຜົນງານດີເດັ່ນໃນການປະຕິບັດໜ້າທີ່ ຢູ່ສູນປະສານງານບ້ານມອມ ເຮັດສຳເລັດໜ້າທີ່ກັບຄືນສູ່ປະເທດ ອີງຕາມຂໍ້ກຳນົດຂອງກົມນະໂຍບາຍກົມໃຫຍ່ການເມືອງກອງທັບ ປະຊາຊົນລາວ ວ່າດ້ວຍການມອບໂລ່ທີ່ລະນຶກໃຫ້ເຈົ້າໜ້າທີ່ຝ່າຍຈີນ ດັ່ງນັ້ນທາງກອງບັນຊາການທະຫານແຂວງບໍ່ແກ້ວຈຶ່ງຕົກລົງມອບໂລ່ທີ່ລະນຶກ ໃຫ້ຈໍານວນ 25 ສະຫາຍ.

ໂອກາດດັ່ງກ່າວສະຫາຍພັນໂທ ເຄນ ແກ້ວດາລາ ຍັງໄດ້ຕາງໜ້າ ຄະນະພັກ-ຄະນະບັນຊາ ການ ຕະຫຼອດຮອດປະຊາຊົນບັນດາເຜົ່າພາຍໃນແຂວງ ກ່າວສະແດງຄວາມຂອບໃຈເປັນຢ່າງສູງມາຍັງ ກອງບັນຊາການຕໍາຫຼວດໃຫຍ່ລາດຕະເວນທາງນ້ຳ ແຂວງ ຢວນນານ ສປຈີນ ເວົ້າລວມ ເວົ້າສະເພາະ ກໍຄືອ້າຍນ້ອງຕຳຫຼວດລາດຕະເວນທາງນໍ້າ ທີ່ປະຈຳຢູ່ສູນປະສານງານບ້ານມອມໃນຄັ້ງນີ້ ຍາມໃດກໍ່ໃຫ້ການຊ່ວຍເຫຼືອກອງບັນຊາການຂອງພວກເຮົາຕະຫຼອດມາ ແລະ ອວຍພອນໃຫ້ເຈົ້າໜ້າທີ່ຝ່າຍຈີນ ເດີນທາງກັບປະເທດຂອງຕົນຢ່າງສະຫວັດດີພາບອີກດ້ວຍ.

ຂ່າວ: ນາງ ນີ່ ທຳມະວົງ