ກະຊວງສາທາລະນະສຸກ,ອົງການປົກຄອງເມືອງທຸລະຄົມ,ພະເເນກສາທາລະນະສຸກເເຂວງວຽງຈັນ ຮ່ວມກັບ ອົງການເເຄຣີຕັສ ປະເທດລຸກຊໍາບວກ ປະຈໍາລາວ ຈັດພີມອບ-ຮັບລະບົບນໍ້າລີນສະອາດໃຫ້ປະຊາຊົນ ບ້ານພູເກົ້ານາງ ໃນຕອນເຊົ້າ 6.8.2022 ຢູ່ໂຮງຮຽນປະຖົມບ້ານພູ ເກົ້ານາງ ເມືອງທຸລະຄົມເເຂວງວຽງຈັນ ມີ ທ່ານ ຄຸດເເກ້ວ ເອືອດໄຊຍະເສນ ຮອງຫົວຫນ້າສູນນໍ້າສະອາດ ເເລະ ກະອະນາໄມສີ່ງເເວດລ້ອມ ໃນນາມຕາງຫນ້າຫນ້າໃຫ້ກະຊວງສາທາລະນະສຸກ, ທ່ານ ກິຄໍາ ວົງໄຊ ຮອງເຈົ້າເມືອງໆທຸລະຄົມ ຜູ້ຊີ້ນໍາວຽກງານ ວັດທະນະທໍາ-ສັງຄົມເມືອງ, ທ່ານ ຄໍາສີງ ນາມສະຫວັນ ຫົວຫນ້າອົງການເເຄຮີຕັສ ປະເທດລຸກຊໍາບວກປະຈໍາລາວ, ທ່ານໂຣເບີໂຄຣນ ຫົວຫນ້າເເຜນງານພາກພື້ນ ໂຄງການເເຄຣີຕັສ ຈາກປະເທດລຸກຊໍາບວກ ມີຄະນະພັກ-ຄະນະນໍາ ພ້ອມດ້ວຍປະຊາຊົນພາຍໃນບ້ານພູເກົ້ານາງເຂົ້າຮ່ວມ.
ທ່ານ,ທ່ານໂຣເບີໂຄຣນ ຫົວຫນ້າເເຜນງານພາກພື້ນ ໂຄງການເເຄຣີຕັສ ຈາກປະເທດລຸກຊໍາບວກມີຄໍາເຫັນວ່າ: ການຈັດພີທີມອບ-ຮັບໂຄງການກໍ່ສ້າງນໍ້າລີນສະອາດໃນຄັ້ງນີ້ ມີຄວາມຫມາຍຄວາມສໍາຄັນຫລາຍ ເນື່ອງຈາກວ່າປະຊາຊົນຢູ່ບ້ານພູເກົ້ານາງ ເຊີ່ງເປັນບ້ານຫນື່ງຂອງເມືອງທຸລະຄົມ ເເຂວງວຽງຈັນ ທີ່ມີທີ່ຕັ້ງຢູ່ເຂດຊົນນະບົດຫ່າງໄກສອກຫລີກ ນັບຈາກນີ້ໄປຈະພ້ອມກັນໄດ້ນໍາໃຊ້ນໍາສະອາດ ເຂົ້າໃນຊີວິດປະຈໍາວັນ ເຊີ່ງ ໂຄງການນີ້ ໄດ້ຮັບການສະເຫນີຜ່ານພາກສ່ວນກ່ຽວຂ້ອງຕ່າງໆທີ່ກ່ຽວຂ້ອງ ເພື່ອຂໍທືນສະຫນັບສະຫນູນໄປຍັງອົງການເເຄລີຕັດ ປະເທດລຸກຊໍາບວກ ເເລະ ສະຫະພາບເອີ ຣົບ ເເລະ ໄດ້ຮັບການຈັດຕັ້ງປະຕິບັດຢ່າງວ່ອງໄວ ຍ້ອນປະຊາຊົນມີສ່ວນຮ່ວມຢ່າງເປັນຂະບວນກວ້າງຂວາງ ເເລະ ສໍາເລັດໃນໄລຍະສັ້ນ ເເລະນັບຈາກນີ້ ໄປໃນນາມຕາງຫນ້າຜູ້ໃຫ້ທືນ ຂໍມອບໂຄງການນີ້ໃຫ້ປະຊາຊົນບ້ານເປົ້າຫມາຍເປັນຜູ້ຄຸ້ມຄອງນໍາໃຊ້ ເພື່ອໃຫ້ເກີດຜົນປະໂຫຍດສູງສຸດໃນການດໍາລົງຊີວິດປະຈໍາວັນ .
ໂອກາດດຽວກັນນີ້ ທ່ານກິຄໍາ ວົງໄຊ ຮອງເຈົ້າເມືອງໆທຸລະຄົມ ເເຂວງວຽງຈັນ ໄດ້ຕາງຫນ້າອົງການປົກຄອງເເຂວງ,ປົກຄອງເມືອງ ເເລະ ປະຊາຊົນພາຍໃນບ້ານພູເກົ້ານາງ ສະເເດງຄວາມຂອບໃຈຕໍ່ພາກສ່ວນຕ່າງໆ ໂດຍສະເພາະ ອົງການເເຄຣີຕັສ ທີ່ໃຫ້ທືນສະຫນັບສະຫນູນໃນການກໍ່ສ້າງລະບົບນໍ້າລີນສະອາດເພື່ອໃຫ້ປະຊາຊົນໄດ້ນໍາໃຊ້ເຂົາໃນຊີວິດປະຈໍາວັນ ຮັບກັນດ້ານໂພສະນາການ ພ້ອມທັງຮຽກຮ້ອງໃຫ້ປະຊາຊົນເເລະຄະນະນໍາຂອງບ້ານເອົາໃຈໃສ່ໃນການຄຸ້ມຄອງປົກປັກຮັກສາໂດຍສະເພາະການ ສ້າງຕັ້ງກອງທືນຄຸ້ມຄອງປົກປັກຮັກສາ ເພື່ອໃຫ້ໂຄງການມີຄວາມຍືນຍົງ ເເລະ ນໍາໃຊ້ໄດ້ຢ່າງຍາວນານ.
ໂຄງການກໍ່ສ້າງລະບົບນໍ້າລີນສະອາດ ຢູ່ບ້ານພູເກົ້ານາງ ເມືອງທຸລະຄົມ ເເຂວງວຽງຈັນ ເປັນໂຄງການເສີມສ້າງຄວາມເຂັ້ມເເຂງໃນການຈັດຕັ້ງປະຕິບັດວຽກງານໂພສະນາການຕາມເເຜນຍຸດທະສາດເເຫ່ງຊາດຂອງລັດຖະບານ ໂດຍເລີ່ມກໍ່ສ້າງນັບເເຕ່ທ້າຍເດືອນເມສາ ຜ່ານມາ ເເລະ ສໍາເລັດ ໃນຕົ້ນເດືອນມິຖຸນາ2022 ລວມມູນຄ່າທັງຫມົດ331.668.000 ກີບ ໂດຍການສະຫນັບສະຫນູນ ທືນໃນການກໍ່ສ້າງຈາກສະຫະພາບເອີຣົບ ເເລະ ອົງການເເຄຣີຕັສ ລຸກຊໍາບວກຫລາຍກວ່າ248ລ້ານກີບ ເເລະ ທືນສົມທົບຂອງປະຊາຊົນພາຍໃນບ້ານ74ລ້ານກີບ. ນອກນີ້ອົງການເເຄຣີຕັສ ລຸກຊໍາບວກຍັງໃຫ້ທືນກໍ່ສ້າງເສັ້ນທາງ,ສະຫນອງອຸປະກອນການເເພດໃຫ້ໂຮງຫມໍນ້ອຍ ເເລະ ກໍ່ສ້າງວິດຖ່າຍໃຫ້ປະຊາຊົນຈໍານວນຫນື່ງຕື່ມອີກ ໄດ້ປະກອບສ່ວນອັນສໍາຄັນ ເຮັດໃຫ້ປະຊາຊົນ62ຫລັງຄາເຮືອນ,87ຄອບຄົວ ເເລະ ເກືອບ400ຄົນ ໄດ້ຮັບການເບີ່ງເເຍງດ້ານໂພສະນາການທີ່ດີ.
ໂດຍ: ເດດອາລຸນ ແກ້ວວິໄລ
