ພິທີມອບ-ຮັບຫ້ອງນໍ້າສາທາລະນະ ຢູວັດສີເມືອງ ນະຄອນຫຼວງວຽງຈັນ (ນວ) ຈັດຂຶ້ນວັນທີ 23 ກັນຍາ 2024 ທີ່ວັດສີເມືອງ ມີພະເຖລະ ນຸເຖລະ ທ່ານ ແຈ ຈູນ ລີ ປະທານສະມາຄົມຫ້ອງນໍ້າໂລກ ປະເທດເກົາຫຼີ ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ ກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວ (ຖວທ) ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກ ຖວທ ນວ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ສົມໄຊ ສີປະເສີດ ຮອງຫົວໜ້າກົມພັດທະນາການທ່ອງທ່ຽວ ກະຊວງ ຖວທ ກ່າວວ່າ: ໂຄງການກໍ່ສ້າງຫ້ອງນໍ້າສາທາລະນະ ທີ່ວັດສີເມືອງ ໄດ້ອີງຕາມສັນຍາການກໍ່ສ້າງສະບັບເລກທີ 398/ກພທ ລົງວັນທີ 21 ມິຖຸນາ 2024 ລະຫວ່າງ ກົມພັດທະນາການທ່ອງທ່ຽວ ແລະ ບໍລິສັດ ວີເອັສຊີອອກແບບກໍ່ສ້າງ ແລະ ທີ່ປຶກສາຈຳກັດຜູ້ດຽວພາຍໃຕ້ງົບປະມານສະໜັບສະໜູນຈາກສະມາຄົມຫ້ອງນໍ້າໂລກໃນມູນຄ່າການກໍ່ສ້າງທັງໝົດ 35.000 ໂດລາສະຫະລັດ ປະກອບດ້ວຍ 9 ໜ້າວຽກຫຼັກຄື ວຽກຮື້ມ້າງອາຄານເກົ່າ ຫ້ອງນໍ້າເກົ່າທີ່ຊຸດໂຊມ ແລະ ບໍ່ສາມາດໃຊ້ການອອກຈາກພື້ນທີ່ ວຽກປັບສະພາບດິນ ວຽກເບຕົງວຽກກໍ່ໂບກ ວຽກຕິດຕັ້ງ ວຽກຫຼັງຄາ-ເພດານ ວຽກກາໂລ ວຽກໄຟຟ້າ ແລະ ນໍ້າປະປາ ວຽກສີ ໂຄງການກໍ່ສ້າງຫ້ອງນໍ້າສາທາລະນະແຫ່ງນີ້ ເລີ່ມກໍ່ສ້າງມາແຕ່ຕົ້ນເດືອນມິຖຸນາ 2024 ເຊິ່ງມີຂະໜາດການກໍ່ສ້າງອາຄານດັ່ງກ່າວຍາວ 9 ແມັດ ກວ້າງ 4 ແມັດ ປະກອບດ້ວຍຫ້ອງນໍ້າ 7 ຫ້ອງ (ຫ້ອງນໍ້າຊາຍ 3 ຫ້ອງ ຫ້ອງນໍ້າຍິງ 3 ຫ້ອງ ແລະ ຫ້ອງນໍ້າຄົນພິການ 1 ຫ້ອງ) ມີຫ້ອງສາງ 1 ຫ້ອງ ມີໂຖປັດສະວະ 4 ໂຖ ແລະ ອ່າງລ້າງມື 5 ອ່າງ (ຍິງ 2 ອ່າງ ຊາຍ 2 ອ່າງ ຫ້ອງຄົນພິການ 1 ອ່າງ) ມີພັດລົມລະບາຍອາກາດ 2 ໜ່ວຍ ການກໍ່ສ້າງຫ້ອງນໍ້າສາທາລະນະຄັ້ງນີ້ຖື ວ່າໄດ້ຕາມມາດຕະຖານສາກົນຂອງສະມາຄົມຫ້ອງນໍ້າໂລກ ມາເຖິງວັນທີ 16 ກັນຍາ 2024 ຄະນະຮັບຜິດຊອບໄດ້ລົງກວດກາທາງດ້ານເຕັກນິກ ແລະ ເຊັນຢັ້ງຢືນຜ່ານຖືວ່າສໍາເລັດການກໍ່ສ້າງ 100%.
ໂອກາດນີ້ທ່ານນາງ ວຽງພອນ ແກ້ວຄູນສີ ກໍໄດ້ກ່າວວ່າ ພິທີມອບ-ຮັບຫ້ອງນໍ້າສາ ທາລະນະຄັ້ງນີ້ ເປັນບາດກ້າວລິເລີ່ມທີ່ສໍາຄັນໃນການພັດທະນາສິ່ງອໍານວຍຄວາມສະດວກ ຢູ່ໃນເຂດສະຖານທີ່ທ່ອງທ່ຽວ ແນໃສ່ເຮັດໃຫ້ສະຖານທີ່ທ່ອງທ່ຽວໄດ້ມີສິ່ງອຳນວຍຄວາມສະດວກເປັນຕົ້ນແມ່ນ ຫ້ອງນໍ້າສາທາລະນະ ທີ່ໄດ້ມາດຕະຖານສາກົນແບບນີ້ ໃນນາມຕາງໜ້າພະແນກ ຖວທ ນວ ຊາວພຸດທະສາສະນິກະຊົນກໍຄືຊາວນະຄອນຫຼວງວຽງຈັນ ນັກທ່ອງທ່ຽວທັງພາຍໃນ ແລະ ຕ່າງປະເທດ ມີຄວາມຍິນດີຮັບເອົາການຊ່ວຍເຫຼືອຫ້ອງນໍ້າສາທາລະນະທີ່ໄດ້ມາດຕະຖານສາກົນແຫ່ງນີ້ ແລະ ເຊື່ອໝັ້ນວ່າຈະນໍາໃຊ້ ແລະ ຄຸ້ມຄອງຮັກສາຮ່ວມກັບຫ້ອງການ ຖວທ ເມືອງສີສັດຕະນາກ ພ້ອມດ້ວຍຄະນະພຣະສົງສຳມະເນນ ຄະນະຮັບຜິດຊອບວັດສີເມືອງໃຫ້ມີຄວາມສະອາດສວຍງາມ ເພື່ອຮອງຮັບຊາວພຸດທະສາສະໜາ ນັກທ່ອງທ່ຽວທີ່ເຂົ້າມາທ່ອງ ທ່ຽວຢູ່ພາຍໃນ ນວ ໂດຍສະເພາະແມ່ນສະຖານທີ່ທ່ອງທ່ຽວທາງດ້ານມໍລະດົກວັດທະນະທຳລະດັບຊາດ ທີ່ມີຊື່ສຽງຂອງ ສປປ ລາວ ແຫ່ງນີ້ ນອກຈາກນັ້ນກໍຖືວ່າແມ່ນການສ້າງສິ່ງອໍານວຍຄວາມສະດວກຂຶ້ນຫຼາຍເປັນຕົ້ນໃນການຈັດງານບຸນປະເພນີທາງດ້ານວັດທະນະທໍາຕ່າງໆ ເພີ່ມຄວາມສະດວກສະບາຍ ຖືກສຸຂະອະນາໄມໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ ເນື່ອງໃນໂອກາດປີທ່ອງທ່ຽວລາວ ກໍຄື ໃນໄລຍະ ສປປ ລາວ ເປັນປະທານອາຊຽນ ໃນປີ 2024 ເຊິ່ງນະຄອນຫຼວງວຽງຈັນເປັນສະຖານທີ່ຈັດກອງປະຊຸມທີ່ສໍາຄັນ ການທັດສະນະສຶກສາຂອງຄະນະຜູ້ແທນກອງປະຊຸມມາຢ້ຽມຢາມສະຖານທີ່ແຫ່ງນີ້ ແລະ ງານສໍາຄັນອື່ນໆຂອງຊາດອີກດ້ວຍ ການສະໜັບສະໜູນໃຫ້ການຊ່ວຍເຫຼືອກໍ່ສ້າງຫ້ອງນໍ້າສາທາລະນະທີ່ໄດ້ມາດຕະຖານສາກົນແຫ່ງນີ້ ຂອງສະມາຄົມຫ້ອງນໍ້າໂລກແຫ່ງ ສ ເກົາຫຼີ ເປັນການປະກອບສໍາຄັນເຂົ້າໃນກິດຈະກໍາການຈັດຕັ້ງປະຕິບັດ 6 ຕົວຊີ້ວັດພັດທະນານະຄອນຫຼວງວຽງຈັນ ແລະ ການພັດທະນາອຸດສາຫະກຳການທ່ອງທ່ຽວ ແລະ ຫວັງຢ່າງຍິ່ງວ່າໃນອານາຄົດຈະສືບຕໍ່ໄດ້ຮັບການຊ່ວຍເຫຼືອ ໃນການກໍ່ສ້າງຫ້ອງນໍ້າສາທາລະນະໄປສະຖານທີ່ທ່ອງທ່ຽວແຫ່ງອື່ນໆ ຢູ່ນະຄອນຫຼວງວຽງຈັນຕື່ມອີກ.
ທີ່ມາ: ວຽງຈັນໃໝ່
