ມອບ-ຮັບອາຄານສອນພາສາຈີນ ສະຖາບັນຂົງຈື ມະຫາວິທະຍາໄລສຸພານຸວົງ

ພິທີມອບ-ຮັບ ອາຄານສອນພາສາຈີນ ສະຖາບັນຂົງຈື ມະຫາວິທະຍາໄລສຸພານຸວົງ ໂດຍການຊ່ວຍເຫຼືອຈາກ ແຂວງຢຸນນານ ສປ ຈີນ ໄດ້ຈັດຂຶ້ນໃນວັນທີ 10 ສິງຫານີ້, ມີ ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ວັນໄຊ ຕະວິນຍານ ຮອງຫົວໜ້າ ຄະນະໂຄສະນາອົບຮົມ ສູນກາງພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ, ທ່ານ ຈາງ ເຊີຜິງ ກົງສູນໃຫຍ່ ສປ ຈີນ ປະຈຳພາກເໜືອ ແຂວງຫຼວງພະບາງ, ທ່ານ ອີ້ຈ້ຽນຫົງ ຮອງອະທິການບໍດີ ມະຫາວິທະຍາໄລແຫ່ງຊາດ ແລະເຕັກໂນໂລຊີ ຄຸນມິງ ສປ ຈີນ, ພ້ອມດ້ວຍພະນັກ ງານຄູອາຈານ ແລະແຂກຮັບເຊີນ ເຂົ້າຮ່ວມ.

ໃນພິທີ ທ່ານ ສຸລິອຸດົງ ສູນດາລາ ໄດ້ມີຄຳເຫັນໂດຍໄດ້ຍ້ອງຍໍຊົມເຊີຍ ແລະຂອບ ໃຈຢ່າງສູງຕໍ່ມະຫາວິທະຍາໄລວິທະຍາສາດ ແລະ ເຕັກໂນໂລຊີຄຸນມິງ ກໍ່ຄືພະແນກການຄ້າ ແຂວງຢຸນນານ ສປ ຈີນ ທີ່ໄດ້ຊ່ວຍເຫຼືອໃນການກໍ່ສ້າງອາຄານຮຽນ ຢູ່ມະຫາວິທະຍາໄລສຸພານຸວົງ ເຊີ່ງເປັນການຊ່ວຍເຫຼືອທີ່ມີຄວາມສໍາຄັນຫຼາຍ ເພື່ອສ້າງໂອ ກາດໃນການຂະຫຍາຍການສຶກສາ ທາງດ້ານພາສາຈີນໃຫ້ກັບສະຖາບັນຂົງຈື ມະຫາວິທະຍາໄລສຸພານຸວົງ, ໂດຍສະເພາະ ນັກຮຽນ-ນັກສຶກສາລາວ ໄດ້ມີໂອກາດໃນການຮຽນພາສາຈີນຫຼາຍຂຶ້ນ ແລະຫວັງຢ່າງຍິ່ງວ່າ ຈະສຶບຕໍ່ໃຫ້ທຶນໃນການພັດທະນາການສຶກສາດ້ານອື່ນໆ ຂອງມະຫາວິທະຍາໄລສຸພານຸວົງ ກໍ່ຄືສະຖາບັນຂົງຈື ສືບຕໍ່ໄປ.

ສ່ວນ ທ່ານ ວິລະ ອາໂນລັກ ອະທິການບໍດີ ມະຫາວິທະຍາໄລສຸພານຸວົງ ກ່າວວ່າ: ສະຖາບັນຂົງຈື, ມະຫາວິທະຍາໄລສຸພານຸວົງ ແລະມະຫາວິທະຍາໄລວິທະຍາສາດ ແລະເຕັກໂນໂລຊີ ຄຸນມິງ ໄດ້ຮ່ວມກັນສ້າງຕັ້ງສະຖາບັນຂົງຈືໃນປີ 2018, ໂດຍໃນເບື້ອງຕົ້ນກໍ່ພົບບັນຫາຫຍຸ້ງຍາກຫຼາຍຢ່າງ. ໂດຍສະເພາະ, ດ້ານອາຄານສະຖານທີ່ ແລະອຸປະກອນຮັບໃຊ້ເຂົ້າໃນການຮຽນ-ການສອນ. ມາຮອດປີ 2019 ກົງສູນໃຫຍ່ ສປ ຈີນ ປະຈໍາພາກເໜືອແຂວງຫຼວງພະບາງ ໄດ້ໃຫ້ທຶນໃນການປັບປຸງອາຄານ ຢູ່ວິທະຍາເຂດບ້ານນາສ້າງເຫວີຍ ຊຶ່ງໄດ້ເປັນການແກ້ໄຂບັນຫາ ຫ້ອງຮຽນຂອງສະຖາ ບັນຂົງຈື ໄດ້ອີກລະດັບໜຶ່ງ. ຊຶ່ງສະຖາບັນຂົງຈື ໄດ້ແກ້ໄຂບັນຫາດ້ານການຈັດການຮຽນ-ການສອນ ພາສາຈີນ ແລະໃຫ້ບໍລິການຈັດການສອບເສັງວັດລະດັບພາສາຈີນ HSK. ມາຮອດປີ 2023 ຜູ້ອໍານວຍການສະຖາບັນຂົງຈື ແລະມະຫາວິທະຍາໄລວິທະ ຍາສາດ ແລະ ເຕັກໂນໂລຊີ ຄຸນມິງ ໄດ້ຊ່ວຍກັນໃນການຊອກຫາແຫຼ່ງທຶນຈາກ ສປ ຈີນ ເວົ້າລວມ, ເວົ້າສະເພາະ, ແມ່ນແຂວງຢູນນານ ເພື່ອມາກໍ່ສ້າງອາຄານສອນພາ ສາຈີນຫຼັງນີ້ ໄດ້ສຳເລັດ.

ສຳລັບອາຄານສອນພາສາຈີນຫຼັງໃໝ່ ຂອງສະຖາບັນຂົງຈື ມະຫາວິທະຍາໄລສຸພາ ນຸວົງ ປະກອບມີ 6 ຫ້ອງຮຽນ ພ້ອມດ້ວຍຫ້ອງເຮັດວຽກ ແລະຫ້ອງປະຊຸມ ໂດຍໄດ້ປະກອບອຸປະກອນການຮຽນຄົບຊຸດ ແລະຕິດຕັ້ງສື່ການຮຽນການສອນທີ່ທັນສະໄໝຕື່ມອີກ, ໂອກາດນີ້ໄດ້ຮ່ວມກັນຕັດແທບຜ້າ ເພື່ອມອບ-ຮັບອາຄານສອນພາສາຈີນ ສະຖາບັນຂົງຈື ຢ່າງເປັນທາງການ, ທັງໄດ້ຢ້ຽມຊົມອາຄານຮຽນ ແລະການວາງສະ ແດງຜົນງານຂອງຄູ-ອາຈານ ແລະນັກສຶກສາສະຖາບັນຂົງຈື ຕື່ມອີກ.