ພິທີມອບ-ຮັບອຸປະກອນເຄື່ອງສາຍຮູບເງົາທີ່ໄດ້ຮັບການຊ່ວຍເຫຼືອຈາກວິທະຍຸສາກົນແຫ່ງປະເທດຈີນ ຫຼື CRI ປະຈໍາລາວ ຈັດຂື້ນໃນຕອນບ່າຍ ວັນທີ 08,01,2021 ທີ່ກົມຮູບເງົາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາ, ທ່ານນາງ ແສງແກ້ວ ອໍານວຍການວິທະຍຸສາກົນແຫ່ງປະເທດຈີນປະຈໍາລາວ, ມີຫົວໜ້າກົມແຜນການ ແລະ ການຮ່ວມມືສາກົນ, ຜູ້ຕາງໜ້າຈາກຫ້ອງການກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ພ້ອມດ້ວຍແຂກຮັບເຊີນເຂົ້າຮ່ວມ.
ທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາ ມີຄໍາເຫັນວ່າ: ທ້າຍເດືອນເມສາປີ 2019 ຜ່ານມາ, ຜູ້ນໍາພັກ-ລັດທັງສອງປະເທດລາວ-ຈີນໄດ້ຮ່ວມກັນລົງນາມ ແລະ ແຜນແມ່ບົດວ່າດ້ວຍການສ້າງຄູ່ຮ່ວມມືຊະຕາກໍາລາວ-ຈີນ ເຊິ່ງເນື້ອໃນດັ່ງກ່າວໄດ້ກວມເອົາຂົງເຂດວຽກງານຮູບເງົາທີ່ເປັນປະຫວັດສາດແຫ່ງການພົວພັນຮ່ວມມືລະຫວ່າງລາວ-ຈີນທີ່ເຫັນເຖິງບົດບາດຄວາມສໍາຄັນ ແລະ ອິດທິພົນຂອງຮູບເງົາ ເຊິ່ງເປັນຂົວຕໍ່ເຊື່ອມແຫ່ງການເສີມສ້າງສາຍພົວພັນມິດຕະພາບລະຫວ່າງສອງພັກ-ສອງລັດກໍ່ຄືປະຊາຊົນສອງຊາດລາວ-ຈີນ ຈີນ-ລາວ. ໃນປີ 2017 ກົມຮູບເງົາຮ່ວມກັບວິທະຍຸສາກົນແຫ່ງປະເທດຈີນປະຈໍາລາວໂດຍໄດ້ຮັບການຊີ້ນໍາຈາກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ສະຖານທູດຈີນປະຈໍາລາວ ຈັດເທດສະການຮູບເງົາດີເດັ່ນຄັ້ງທໍາອິດ ເຊິ່ງໄດ້ສາຍຮູບເງົາດີເດັ່ນຢູ່ນະຄອນຫຼວງວຽງຈັນ ແລະ 7 ແຂວງທົ່ວປະເທດ ເພື່ອໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າຈໍານວນຫຼວງຫຼາຍໄດ້ຊົມຮູບເງົາ.
ທ່ານນາງ ແສງແກ້ວ ອໍານວຍການວິທະຍຸສາກົນແຫ່ງປະເທດຈີນປະຈໍາລາວມີຄໍາເຫັນວ່າ: ກິດຈະກໍາຮູບເງົາດີເດັ່ນລາວ-ຈີນ ເປັນກິດຈະກໍາໜື່ງໃນຜົນງານທີີ່ປະຈັກຕາໃນການຮ່ວມມືທາງດ້ານວັດທະນະທໍາທັງສອງປະເທດ ປັດຈຸບັນ ສອງປະເທດຈີນ-ລາວໄດ້ເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານກໍຄືປະຊາຄົມຮ່ວມຊາຕາກໍາບົນຈິດໃຈ 4 ດີ, ການແລກປ່ຽນດ້ານວັດທະນະທໍາລະຫວ່າງປະເທດນັບມື້ນັບເປີດກວ້າງ ແລະ ມິດຕະພາບລະຫວ່າງປະຊາຊົນສອງປະເທດນັບມື້ນັບເຂົ້າສູ່ລວງເລິກ ເຊິ່ງວິທະຍຸສາກົນແຫ່ງປະເທດຈີນປະຈໍາລາວຍິນດີພະຍາຍາມຄຽງຄູ່ກັບລາວສືບຕໍ່ສົ່ງເສີມການແລກປ່ຽນກໍຄືການໄປມາຫາສູ່ກັນ ແລະ ເຊື່ອມໂຍງທາງດ້ານຄວາມສໍາພັນໄມຕີລະຫວ່າງປະຊາຊົນສອງຊາດໃຫ້ແໜ້ນແຟ້ນຂື້ນ.
ວັນທີ 4 ທັນວາ 2020 ຜ່ານມາ, ກົມຮູບເງົາ ແລະ ວິທະຍຸສາກົນແຫ່ງປະເທດຈີນປະຈໍາລາວໄດ້ເຊັນບົດບັນທຶກຮ່ວມມືດ້ານຮູບເງົາລະຫວ່າງກັນ ເຊິ່ງວິທະຍຸສາກົນແຫ່ງປະເທດຈີນປະຈໍາລາວຈະຊ່ວຍເຫຼືອອຸປະກອນສາຍຮູບເງົາຈໍານວນ 4 ຊຸດ ເພື່ອຮັບໃຊ້ໃຫ້ແກ່ການຈັດເທດສະການຮູບເງົາດີເດັ່ນລາວ-ຈີນ ມາຮອດປັດຈຸບັນ, ອຸປະກອນສ່ວນໃຫຍ່ໄດ້ມາເຖິງລາວແລ້ວ ປະກອບມີ: ເຄື່ອງສາຍເລເຊີ້ຮູບເງົາຈໍານວນ 4 ຊຸດ, ລໍາໂພງ, ຈໍເຄື່ອນທີ່ ແລະ ເຄື່ອງອຸປະກອນອື່ນໆອີກຈໍານວນໜື່ງ ໂດຍສາມາດສາຍຮູບເງົາຢູ່ກາງແຈ້ງໄດ້ດີ ແລະ ມີມາດຕະຖານສູງ ລວມມູນຄ່າທັງໝົດປະມານ 450 ລ້ານກີບ ເຄື່ອງອຸປະກອນສາຍຮູບເງົາຈໍານວນນີ້ຈະນໍາໃຊ້ໃຫ້ເກີດຜົນປະໂຫຍດສູງທີ່ສຸດ
Loading...