ໃນວັນທີ 1 ພຶດສະພາ 2024 ຢູ່ກອງບັນຊາການທະຫານແຂວງຫລວງນໍ້າທາ ໄດ້ຈັດພິທີມອບ-ຮັບເຮືອນຮັບແຂກ ຂອງແຂວງ ໂດຍການເຂົ້າຮ່ວມ ຂອງທ່ານ ວຽງສະຫັວດ ສີພັນດອນ ເຈົ້າແຂວງໆຫລວງນໍ້າທາ, ທ່ານ ໂຈຄຸນ ປະທານ ກຸ່ມບໍລິສັດ ຫຸ້ນສ່ວນ ຫາຍເຊີງ ພັດທະນາເສດຖະກິດບໍ່ເຕ່ນ ລາວ ຈຳກັດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໂຄງການກໍ່ສ້າງເຮືອນຮັບແຂກຂອງ ແຂວງຫລວງນໍ້າທາ ຕັ້ງຢູ່ກອງບັນຊາການທະຫານແຂວງ, ເລີ່ມລົງມືກໍ່ສ້າງໃນເດືອນ ທັນວາ 2023 ແລະ ໄດ້ສຳເລັດໃນເດືອນ ເມສາ 2024, ເປັນອາຄານ 2 ຊັ້ນ, ຊັ້ນໃຕ້ດິນ 1 ຊັ້ນ ແລະ ຊັ້ນເທິງໜ້າດິນ 1 ຊັ້ນ, ປະກອບມີ ຫ້ອງຮັບແຂກ, ເຮືອນຄົວ, ຫ້ອງນໍ້າ, ຫ້ອງປະຊຸມ, ຫ້ອງສາງ, ການຕົບແຕ່ງດ້ານໃນຮູບແບບທັນສະໄໝແບບລຽບງ່າຍ, ອາຍຸອອກແບບ 50 ປີ ໂດຍການຊ່ວຍເຫລືອລ້າ ຈາກບໍລິສັດພັດທະນາເຂດບໍ່ເຕ່ນ. ການກໍ່ສ້າງເຮືອນຮັບແຂກຄັ້ງນີ້ ເປັນການຮ່ວມມືມິດຕະພາບ ລະຫວ່າງກຸ່ມບໍລິສັດພັດທະນາເຂດບໍ່ເຕ່ນ ກັບແຂວງຫລວງນໍ້າທາ.
ທ່ານ ໂຈຄຸນ ກ່າວວ່າ: ກຸ່ມບໍລິສັດພັດທະນາເຂດບໍ່ເຕ່ນ ຍຶດຖືເອົາການພັດທະນາ ໃຫ້ປະຊາຊົນຢູ່ໃນຂົງເຂດນີ້, ແນວຄິດການພັດທະນາທີ່ວ່າ ສ້າງຊີວິດການເປັນຢູ່ທີ່ດີ ເອົາໃຈໃສ່ບັນຫາເສດຖະກິດ-ສັງຄົມຢູ່ໃນຂົງເຂດ, ຕັ້ງໜ້າເຂົ້າຮ່ວມການກໍ່ສ້າງໃນແຕ່ລະດ້ານຂອງແຂວງພາກເໜືອຂອງລາວ ກໍຄືແຂວງຫລວງນໍ້າທາ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງຫລວງນໍ້າທານັບມື້ດີຂຶ້ນ ແລະ ເພື່ອເປັນການເພີ່ມທະວີສາຍພົວພັນຮ່ວມມື ລະຫວ່າງ ສອງພັກ-ສອງລັດ ແລະ ປະຊາຊົນ ສອງຊາດລາວ-ຈີນ ຂະຫຍາຍຕົວກວ້າງຂວາງຢ່າງບໍ່ຢຸດຢັ້ງ ພ້ອມທັງໄດ້ກໍານົດການພົວພັນຮ່ວມມື ເພື່ອນບ້ານໃກ້ເຮືອນຄຽງທີ່ເປັນມິດ, ໄວ້ເນື້ອເຊື່ອໃຈກັນ, ໝັ້ນຄົງຍາວນານ ແລະ ຮ່ວມມືຮອບດ້ານ ຄູ່ຮ່ວມຍຸດທະສາດຮອບດ້ານ ຕາມທິດ 4 ດີ, ການສ້າງຄູ່ຮ່ວມຊາຕາກໍາ ສັງຄົມນິຍົມທີ່ມີຄວາມໝາຍທາງດ້ານຍຸດທະສາດດ້ວຍການກໍານົດໜຶ່ງແລວ ໜຶ່ງເສັ້ນທາງ.
ຂ່າວ: ສົມພອນ ຂຸນດາວົງ
