ພິທີມອບ-ຮັບ ໂຄງການກໍ່ສ້າງຕາຂ່າຍໄຟຟ້າແຮງກາງ 22 ກິໂລໂວນ, ແຮງຕໍ່າ 0,4 ກິໂລໂວນ ແລະ ຕິດຕັ້ງໝໍ້ແປງໄຟຟ້າ ເຂົ້າບຸລິມາສິດທີ 1 ແຕ່ບ້ານຫລັງຜາ ຫາ ສາມແຍກຜາງົວ ໄລຍະ 1 ຢູ່ເມືອງລອງ ແຂວງຫລວງນໍ້າທາ ລະຫວ່າງ ບໍລິສັດ ພີເອັດ ກໍ່ສ້າງ ແລະ ທ່ອງທ່ຽວ ຈໍາກັດຜູ້ດຽວ ກັບພະແນກພະລັງງານ ແລະ ບໍແຮ່ ແລະ ລັດວິສາຫະກິດໄຟຟ້າລາວ ສາຂາ ແຂວງຫລວງນໍ້າທາ ຈັດຂຶ້ນໃນວັນທີ 6 ສິງຫາ 2024 ທີ່ແຂວງຫລວງນໍ້າທາ.
ໂຄງການກໍ່ສ້າງຕາຂ່າຍໄຟຟ້າແຮງກາງ 22 ກິໂລໂວນ ມີຄວາມຍາວ 152,22 ກິໂລແມັດ, ແຮງຕໍ່າ 0,4 ກິໂລໂວນ ມີຄວາມຍາວ 10,2 ກິໂລແມັດ ແລະ ຕິດຕັ້ງໝໍ້ແປງໄຟຟ້າ 21 ຊຸດ ເຂົ້າບຸລິມາສິດທີ 1 ແຕ່ບ້ານຫລັງຜາ ຫາ ສາມແຍກຜາງົວ ກວມເອົາ 13 ບ້ານໃຫຍ່, 8 ບ້ານນ້ອຍ ລວມມີ 21 ບ້ານ, ມີ 858 ຄົວເຮືອນ, ມີ 4.847 ຄົນ ຊຶ່ງສະພາແຫ່ງຊາດໄດ້ຮັບຮອງ ແລະ ບັນຈຸເຂົ້າແຜນການລົງທຶນຂອງລັດ, ເຂດດັ່ງກ່າວເປັນເຂດຫ່າງໄກສອກຫລີກ ເສັ້ນທາງສາມາດສັນຈອນໄດ້ລະດູດຽວ, ມີຊາຍແດນຕິດກັບປະເທດມຽນມາ. ໂຄງການໄດ້ເລີ່ມກໍ່ສ້າງມາແຕ່ເດືອນຕຸລາ 2022 ໂດຍແມ່ນບໍລິສັດ ພີເອັດ ກໍ່ສ້າງ ແລະ ທ່ອງທ່ຽວ ຈໍາກັດຜູ້ດຽວ ເປັນຜູ້ຮັບເໝົາ ໃນມູນຄ່າ 97,23 ຕື້ກີບ, ໄລຍະເວລາກໍ່ສ້າງ 36 ເດືອນ. ຜ່ານການຈັດຕັ້ງປະຕິບັດຂອງໂຄງການມາເຖິງປັດຈຸບັນມີຄວາມຄືບໜ້າ 32,41% ຂອງໜ້າວຽກທັງໝົດ.
ຂ່າວ: ມຸນຕີ
