ພິທີມອບ-ຮັບສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນ ໄດ້ຈັດຂຶ້ນຕອນບ່າຍວັນທີ 15 ພຶດສະພາ 2023 ຢູ່ທີ່ອາຄານຜູ້ໂດຍສານ ສະໜາມບິນໜອງຄ້າງ.
ເປັນກຽດເຂົ້າຮ່ວມ ມີທ່ານ ງາມປະສົງ ເມືອງມະນີ ລັດຖະມົນຕີກະຊວງ ໂຍທາທິການ ແລະ ຂົນສົ່ງ, ທ່ານ ວັນໄຊ ແພງຊຸມມາ ເຈົ້າແຂວງ ແຂວງຫົວພັນ, ທ່ານ ເຈິນ ກັວກ ເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນຮອງປະທານຄະນະກໍາມະທິການຮ່ວມມືຫວຽດນາມ-ລາວ ມີບັນດາທ່ານຮອງລັດຖະມົນຕີ, ຮອງເລຂາພັກແຂວງ – ຮອງເຈົ້າແຂວງຫົວພັນ, ຮອງເຈົ້າແຂວງແທັງຮວາ, ທ່ານຫົວໜ້າກົງສູນຫວຽດ ນາມປະຈໍາພາກເໜືອ ສປປລາວ, ພະແນກການຂັ້ນແຂວງ, ບັນດາເຈົ້າເມືອງ, ບໍລິສັດທີ່ປຶກສາ, ບໍລິສັດຮັບເໜົາ ແລະ ພະນັກງານທີ່ກ່ຽວຂ້ອງທັງ ລາວ-ຫວຽດນາມເຂົ້າຮ່ວມ.
ທ່ານ ພູທອງ ອິນທະແສງ ຫົວໜ້າໂຄງການກໍ່ສ້າງສະໜາມບິນໜອງຄ້າງ ໄດ້ລາຍງານຫຍໍ້ກ່ຽວກັບ ຄວາມເປັນມາ ແລະ ຜົນສໍາເລັດການຈັດຕັ້ງປະຕິບັດໂຄງການໄລຍະຜ່ານມາ ໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນ ແມ່ນໂຄງການໜຶ່ງທີ່ນອນຢູ່ໃນແຜນຍຸດທະສາດ ແລະ ການພັດທະນາ ຂອງຂະແໜງໂຍທາທິການ ແລະ ຂົນສົ່ງ ດ້ານວຽກງານການບິນພົນລະເຮືອນ ຕາມນະໂຍບາຍຂອງລັດຖະບານ ໃນການຫັນເປັນປະເທດເຊື່ອມໂຍງ-ເຊື່ອມຈອດກັບພາກພື້ນ ແລະ ສາກົນ; ເຊິ່ງໂຄງການກໍ່ສ້າງດັ່່ງກ່າວນີ້ ແມ່ນເປັນໄປຕາມມາດ ຕະຖານສະ ໜາມບິນ ຂອງ ກົມການບິນພົນລະເຮືອນ ແລະ ອົງການ ການບິນພົນລະເຮືອນສາກົນ (ICAO) ທີ່ໄດ້ວາງອອກ ກໍ່ຄື: ການກໍ່ສ້າງສະໜາມບິນໜອງຄ້າງ ແມ່ນໄດ້ຈັດຢູ່ໃນປະເພດ 3C (Aerodrome Code 3C), ຊຶ່ງສາມາດຮອງຮັບເຮືອບິນປະເພດ 70-100 ບ່ອນນັ່ງ ເປັນຕົ້ນແມ່ນ: ເຮືອບິນ ATR 72, MA-60 ຫລື ທຽບເທົ່າ.
ໂຄງການກໍ່ສ້າງສະໜາມບິນໜອງຄ້າງ ເລີ່ມຕົ້ນຈັດຕັ້ງປະຕິບັດການກໍ່ສ້າງໃນວັນທີ 07 ຕຸລາ 2013, ໂດຍແມ່ນກົມການບິນພົນລະເຮືອນ, ກະຊວງໂຍທາທິການ ແລະຂົນສົ່ງ ເປັນເຈົ້າຂອງໂຄງການ, ໂດຍມີບໍລິສັດທີ່ປຶກສາ ADCC ແລະ ບໍລິສັດ ພັດທະນາກະສິກຳ ຮວ່າງແອັງ ອັດຕະປື ຈຳກັດ ຈາກປະເທດຫວຽດນາມ ເປັນຜູ້ຮັບເໝົາກໍ່ສ້າງ; ພາຍໃຕ້ທຶນກູ້ຢືມຈາກ ບໍລິສັດຮຸ້ນສ່ວນກະສິກໍາສາກົນຮວ່າງແອງຢາລາຍ ມູນຄ່າທັງໝົດເບື້ອງຕົ້ນ 74.006.320 ໂດລາສະຫະລັດ ຜ່ານການຈັດຕັ້ງປະຕິບັດຕົວຈິງໄດ້ມີວຽກເພີ່ມຈໍານວນໜຶ່ງ ເປັນມູນຄ່າ 8.035.242 ໂດລາສະຫະລັດ ລວມທັງໝົດແມ່ນ 82.041.562 ໂດລາສະຫະລັດ ປະກອບມີ 17 ກິດຈະກຳຄື: ກໍ່ສ້າງທາງແລ່ນຂຶ້ນ – ລົງ ມີຂະໜາດຄວາມຍາວ 2.400 ແມັດ ກວ້າງ 30 ແມັດ; ກໍ່ສ້າງທາງຂັບເຄື່ອນ; ກໍ່ສ້າງລານຈອດເຮືອບິນ; ກໍ່ສ້າງອາຄານຜູ້ໂດຍສານ; ກໍ່ສ້າງຫ້ອງການຄຸ້ມຄອງສະໜາມບິນ; ກໍ່ສ້າງສະຖານີຮັບໃຊ້ສະໜາມບິນ;ກໍ່ສ້າງສະຖານີດັບເພີງ; ກໍ່ສ້າງສະຖານີອຸຕຸນິຍົມ; ກໍ່ສ້າງເຮືອນຄວບຄຸມລະບົບໄຟຟ້າ; ລະ ບົບນໍ້າໃຊ້ສະໜາມບິນ; ລະບົບລະບາຍນ້ຳສະໜາມບິນ; ກໍ່ສ້າງທາງອ້ອມສະ ໜາມບິນ ແລະ ທາງບໍລິການສະໜາມ ບິນ; ກໍ່ສ້າງຮົ້ວອ້ອມສະໜາມບິນ; ວິທະຍຸຊ່ວຍການບິນ; ກໍ່ສ້າງທາງເຂົ້າສະໜາມ ບິນ; ລະບົບໄຟຟ້າສະໜາມບິນ ແລະ ວຽກຕິດຕັ້ງອຸປະກອນຕ່າງໆຮັບໃຊ້ສະໜາມບິນ.
ທ່ານ ເຈິນ ກັວກ ເຟືອງ ຮອງລັດຖະ ມົນຕີກະຊວງແຜນການ ແລະ ການລົງທຶນຮອງປະທານຄະນະກໍາມະທິການຮ່ວມມືຫວຽດນາມ-ລາວ ກ່າວວ່າ: ໂຄງການກໍ່ສ້າງສະໜາມບິນໜອງຄ້າງ ແມ່ນໂຄງການຮ່ວມມືສອງຝ່າຍ ລະຫວາງ ລາວ-ຫວຽດນາມ ໂດຍການເຫັນດີໃຫ້ມີການກໍ່ສ້າງຈາກລັດຖະບານຂອງສອງປະເທດ ແລະ ມີຄວາມສຳຄັນ ເພື່ອຍູ້ແຮງການພັດທະນາເສດຖະກິດ-ສັງຄົມຢູ່ ສປປລາວ ກໍ່ຄື ແຂວງຫົວພັນ.
ທ່ານ ງາມປະສົງ ເມືອງມະນີ ລັດຖະມົນຕີກະຊວງ ໂຍທາທິການ ແລະ ຂົນສົ່ງ ຕາງໜ້າລັດຖະບານ ສປປ ລາວ ຍັງໄດ້ກ່າວສະແດງຄວາມຂອບໃຈມາຍັງພັກ-ລັດ ແລະ ປະຊາຊົນຫວຽດນາມທີ່ໃຫ້ການຊ່ວຍຊຸກຍູ້ໃຫ້ບໍລິສັດຂອງ ສສ ຫວຽດນາມ ໂດຍສະເພາະໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນຈົນສຳເລັດ ຊຶ່ງຈະສ້າງສິ່ງອຳນວຍຄວາມສະດວກໃຫ້ແກ່ການໄປ-ມາ ຂອງປະຊາຊົນລາວ ຈາກນະຄອນຫຼວງວຽງຈັນ ຫາ ຊໍາເໜືອ; ຊໍາເໜືອ-ນຳຄອນຫຼວງວຽງຈັນສະດວກ.
ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ຕາງໜ້າໃຫ້ຄະນະພັກ, ພະນັກງານ ແລະ ປະຊາຊົນທົ່ວແຂວງຫົວພັນ ກ່າວວ່າ: ການຈັດພິທີມອບ-ຮັບສະໜາມບິນໜອງຄ້າງ ໄດ້ເປັນຂີດໝາຍໃໝ່ແຫ່ງການພັດທະນາແຂວງຫົວພັນ ເປັນການຄອງຄອຍ ແລະ ຄວາມມຸ້ງມາດປາຖະໜ້າຂອງປະຊາຊົນແຂວງຫົວພັນ ໂຄງການນີ້ມີຄວາມສຳຄັນຫຼາຍແກ່ການພັດທະນາ ເສດຖະກິດ-ສັງຄົມຂອງແຂວງໃຫ້ມີບາດກ້າວຂະຫຍາຍຕົວຍິ່ງຂຶ້ນ.
ໂອກາດດຽວກັນນີ້ ຍັງໄດ້ພ້ອມຕັດແຖບຜ້າ, ລັ່ນຄ້ອງ 9 ບາດ ແລະ ປ່ອຍປຸມເປົ້າ ເພື່ອເປັນສິລິມຸງຄຸນໃນພິທີອີກດ້ວຍ.
