ພິທີມອບ-ຮັບໂຄງການກໍ່ສ້າງອະນຸສອນສະຖານກອງຮ້ອຍລາດຊະວົງສະໄໝ 25 ທ່ານຢູ່ຖໍ້າແມ ເຂດລາວຮຸ່ງ-ພຽງສາ ເມືອງຊຽງຄໍ້ ແຂວງຫົວພັນ ລະຫວ່າງຜູ້ຮັບເໝົາກໍ່ສ້າງບໍລິສັດ ດວງພະສຸກກໍ່ສ້າງສ້ອມແປງຂົວ-ທາງເຄຫາສະຖານ ແລະ ຊົນລະປະທານຈຳກັດຜູ້ດຽວ ກັບເຈົ້າຂອງໂຄງການ ກອງບັນຊາການທະຫານແຂວງຫົວພັນ ໄດ້ຈັດຂຶ້ນໃນວັນທີ 21 ມິຖຸນາຜ່ານມາ ທີ່ແຂວງຫົວພັນ ກ່າວມອບໂດຍທ່ານ ຄຳຫຼ້າ ດວງພະສຸກ ປະທານບໍລິສັດ ດວງພະສຸກກໍ່ສ້າງສ້ອມແປງຂົວ-ທາງເຄຫາສະຖານ ແລະ ຊົນລະປະທານ ຈຳກັດຜູ້ດຽວ ແລະ ກ່າວຮັບໂດຍທ່ານ ພົຈວ ຄໍາເມືອງ ໂຄດລົງຄູນ ຫົວໜ້າການທະຫານ ກອງບັນຊາການທະຫານແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄໍາຫຼ້າ ດວງພະສຸກ ກ່າວວ່າ: ໂຄງການກໍ່ສ້າງອະນຸສອນສະຖານກອງຮ້ອຍລາດຊະວົງສະໄໝ 25 ທ່ານ ຢູ່ຖໍ້າແມ ເປັນໂຄງການບຸລິມະສິດຂອງລັດຖະບານເລີ່ມກໍ່ສ້າງມາແຕ່ປີ 2012 ແລະ ສຳເລັດປີ 2017 ແຕ່ເນື່ອງຈາກສະພາບແວດລ້ອມບໍ່ເອື້ອອຳນວຍຄວາມສະດວກຈຶ່ງແກ່ຍາວມາຮອດປີ 2024 ຈຶ່ງໄດ້ຈັດພິທີມອບ-ຮັບຢ່າງເປັນທາງການ ປະກອບມີໜ້າວຽກກໍ່ສ້າງຫໍໝູນເຊື້ອ, ຫ້ອງການ, ເຮືອນພັກ, ຫ້ອງນໍ້າລວມ, ປ້ອມຍາມ, ສາລາພັກຜ່ອນ, ປະຕູໂຂງດ້ານໜ້າ, ຮົ້ວເຫຼັກອ້ອມກົມມະລຽນ, ບ່ອນຈອດລົດ, ຫໍໄຫວ້, ນໍ້າພຸ, ສວນດອກໄມ້, ປັບປຸງລະບົບຖໍ້າ, ເສັ້ນທາງໄປຫາຖໍ້າ, ເສັ້ນທາງແຕ່ຂົວຂ້າມນໍ້າມ່າຫາບ້ານສົມວັ້ນ, ລະບົບນໍ້າປະປາສະໜອງໃຫ້ໂຄງການ, ລະບົບໄຟຟ້າ, ຝາຍນໍ້າລົ້ນ, ຄວັດຮູຮູບປັ້ນ 25 ທ່ານ, ສະໜາມບິນ, ເສັ້ນທາງຂຶ້ນ, ແທ່ນວາງຮູບປັ້ນ ແລະ ໜ້າວຽກອື່ນໆ ລວມມູນຄ່າ 113 ຕື້ກີບ ໂດຍແມ່ນງົບປະມານຂອງລັດ ແຕ່ບໍລິສັດຜູ້ຮັບເໝົາກໍ່ສ້າງເປັນຜູ້ລົງທຶນກ່ອນ.
ໂຄງການກໍ່ສ້າງອະນຸສອນສະຖານກອງຮ້ອຍລາດຊະວົງສະໄໝ 25 ທ່ານ ຢູ່ຖໍ້າແມ ເປັນໂຄງການທີ່ມີຄວາມໝາຍສຳຄັນທາງປະຫວັດສາດຂອງຊາດລາວເຮົາ ເປັນໂຄງການອະນຸສອນ ທີ່ຈາລຶກຜົນງານຂອງພະນັກງານນັກຮົບປະຕິວັດ 25 ທ່ານ ທີ່ເປັນຕົ້ນກຳເນີດຂອງກຳລັງປະກອບອາວຸດ ຂອງກອງທັບປົດປ່ອຍປະຊາຊົນລາວ ກໍຄືກອງທັບປະຊາຊົນລາວໃນປັດຈຸບັນ ໂດຍສະເພາະແມ່ນບ່ອນກຳເນີດກອງຮ້ອຍລາດຊະວົງ ຊຶ່ງແມ່ນປະທານ ໄກສອນ ພົມ ວິຫານ ເປັນຜູ້ປະກາດສ້າງຕັ້ງ. ນອກນີ້ຍັງເປັນບ່ອນທ່ອງທ່ຽວທາງດ້ານປະຫວັດສາດ ເປັນບ່ອນສຶກສາຮຽນຮູ້ຂອງລູກຫຼານເຍົາວະຊົນ, ນັກຮຽນ-ນັກສຶກສາປັນຍາຊົນຄົນຮຸ່ນໃໝ່ ເພື່ອໃຫ້ຮັບຮູ້ເຂົ້າໃຈແຈ້ງຕໍ່ການກຳເນີດເຕີບໃຫຍ່ ຂອງກອງຮ້ອຍລາດຊະວົງໃນສະໄໝກ່ອນ ຕໍ່ມາໄດ້ກາຍເປັນກຳລັງຫຼັກແຫຼ່ງຕໍ່ພາລະກິດຕໍ່ສູ້ກູ້ຊາດ ຕ້ານພວກຈັກກະພັດລ່າເມືອງຂຶ້ນ ພ້ອມລູກແຫຼ່ງຕີນມືຂອງພວກເຂົາ ຈົນສາມາດປົດປ່ອຍປະເທດຊາດຢ່າງສົມບູນ ແລະ ສະຖາປະນາເປັນ ສປປ ລາວໃນວັນທີ 2 ທັນວາ 1975. ຈາກນັ້ນ, ໄດ້ສືບຕໍ່ເປັນກຳລັງຫຼັກໃນພາລະກິດປ່ຽນແປງໃໝ່ຂອງຊາດ ກໍຄືປົກປັກຮັກສາ ແລະ ສ້າງສາພັດທະນາປະເທດຊາດເຖິງປັດຈຸບັນ.
ຂ່າວ: ສົມສະຫວັນ
