ພິທີ ມອບ-ຮັບໜ້າທີ່ ລະຫວ່າງ ທ່ານ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນແຂວງ ຜູ້ເກົ່າ ແລະ ທ່ານ ແດງ ປະທຸມທອງ, ຮອງເລຂາພັກແຂວງ, ປະທານສະພາປະຊາຊົນ ແຂວງໄຊສົມບູນ ຜູ້ໃໝ່ ພ້ອມທັງປະກາດສັບຊ້ອນໜ້າທີ່ພະນັກງານນໍາພາ-ຄຸ້ມຄອງ ບັນດາພະແນກການ ຂອງແຂວງ ແລະ ເມືອງ ໄດ້ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 19 ພຶດສະພາ 2021, ທີ່ສະໂມສອນເມືອງອະນຸວົງ ໂດຍການເປັນປະທານຂອງ ພົນຕີ ຄໍາລຽງ ອຸທະໄກສອນ, ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ, ຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳສະພາປະຊາຊົນ ແຂວງ ພ້ອມດ້ວຍພະແນກການ-ອົງການ ອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນພິທີ ທ່ານ ທອງວັນ ທໍາມະວົງ, ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ປະທານ ແລະ ຮອງປະທານສະພາປະຊາຊົນ ແຂວງ ເຂົ້າພັກຜ່ອນຮັບບໍານານ. ພ້ອມນີ້ ທ່ານ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນ ແຂວງ ຜູ້ເກົ່າ ໄດ້ຂຶ້ນມີຄໍາເຫັນ ແລະ ກ່າວມອບໜ້າທີ່ ໃຫ້ປະທານສະພາປະຊາຊົນ ແຂວງ ຜູ້ໃໝ່. ຈາກນັ້ນໄດ້ມີພິທີ ຮ່ວມກັນລົງນາມເຊັ່ນບົດບັນທຶກມອບ-ຮັບໜ້າທີ່ ປະທານສະພາປະຊາຊົນ ແຂວງ ລະຫວ່າງ ທ່ານ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນ ແຂວງ ຜູ້ເກົ່າ ແລະ ທ່ານ ແດງ ປະທຸມທອງ, ຮອງເລຂາພັກແຂວງ, ປະທານສະພາປະຊາຊົນ ແຂວງໄຊສົມບູນ ຜູ້ໃໝ່ ຢ່າງເປັນທາງການ ໂດຍຊ້ອງໜ້າ ພົນຕີ ຄໍາລຽງ ອຸທະໄກສອນ, ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ເປັນສັກຂີພິຍານ. ພ້ອມດຽວກັນນີ້ ທ່ານ ທອງວັນ ທໍາມະວົງ, ຄະນະປະຈໍາພັກແຂວງ, ຫົວໜ້າຄະນະຈັດຕັ້ງ ແຂວງ ໄດ້ຂຶ້ນຜ່ານມິຕິຕົກລົງ ວ່າດ້ວຍການແຕ່ງຕັ້ງພະນັກງານ ແລະ ຂໍ້ຕົກລົງ ວ່າດ້ວຍການຍົກຍ້າຍພະນັກງານ ຊຶ່ງມີລາຍຊື່ ດັ່ງນີ້: ເຫັນດີຍົກຍ້າຍ ທ່ານ ຄໍາພູທອນ ວົງພະຈັນ, ກຳມະການພັກແຂວງ, ເລຂາພັກເມືອງ, ເຈົ້າເມືອງໆ ອະນຸວົງ ໄປຮັບໜ້າທີ່ໃໝ່ ຢູ່ສະພາປະຊາຊົນ ແຂວງ, ແຕ່ງຕັ້ງທ່ານ ຮືທໍ່ ເພຍຫຼວງ, ກຳມະການພັກແຂວງ, ຫົວໜ້າໂຄສະນາອົບຮົມ ແຂວງ ໄປເປັນເຈົ້າເມືອງໆ ອະນຸວົງ, ແຕ່ງຕັ້ງທ່ານ ອຸດອນ ສິງດາລາ, ກຳມະການພັກແຂວງ, ຫົວໜ້າພະແນກຍຸຕິທໍາ ແຂວງ ໄປເປັນເຈົ້າເມືອງໆ ລ້ອງແຈ້ງ, ແຕ່ງຕັ້ງທ່ານ ອິນຕອງ ໂຄດປັນຍາ, ກຳມະການພັກແຂວງ, ເລຂາພັກເມືອງ, ເຈົ້າເມືອງໆ ລ້ອງແຈ້ງ ໄປເປັນຫົວໜ້າພະແນກ ຍຸຕິທໍາ ແຂວງ, ແຕ່ງຕັ້ງທ່ານ ພູແກ້ວ ອິນທະວົງ, ກຳມະການພັກແຂວງ, ເປັນຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ, ແຕ່ງຕັ້ງທ່ານ ດຣ ລີເຢີ ໄຊຍະຊ່າງ, ຮອງຫົວໜ້າພະແນກສາທາລະນະສຸກ ແຂວງ ຂຶ້ນເປັນຫົວໜ້າພະແນກສາທາລະນະສຸກ ແຂວງ, ແຕ່ງຕັ້ງທ່ານ ຄົວຈັ້ງ ດຣາເຊັງ, ກໍາມະການພັກແຂວງ, ເລຂາໜ່ວຍພັກ, ຫົວໜ້າໂຮງຮຽນທິດສະດີການເມືອງ-ການປົກຄອງ ແຂວງ ໄປເປັນຫົວໜ້າໂຄສະນາອົບຮົມ ແຂວງ, ແຕ່ງຕັ້ງທ່ານ ລາວຢ່າງ ຈາວາ, ຮອງຫົວໜ້າພະແນກພາຍໃນ ແຂວງ, ໄປເປັນຫົວໜ້າໂຮງຮຽນທິດສະດີການເມືອງ-ການປົກຄອງ ແຂວງ ແລະ ຍົກຍ້າຍ , ດຣ ບົວເກດ ວົງປະເສີດ, ຫົວໜ້າພະແນກສາທາລະນະສຸກ ແຂວງ ໄປຮັບໜ້າທີ່ໃໝ່ ຢູ່ຫ້ອງວ່າການ ແຂວງ.
ໃນໂອກາດທີ່ມີຄວາມໝາຍຄວາມສຳຄັນ ນີ້, ພົນຕີ ຄໍາລຽງ ອຸທະໄກສອນ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ ໄດ້ມີຄຳເຫັນໂອລົມຕໍ່ພິທີ ຊຶ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ປະທານສະພາປະຊາຊົນ ແຂວງ, ຮອງປະທານສະພາປະຊາຊົນ ແຂວງ ຜູ້ເກົ່າ ທີ່ສາມາດຍາດໄດ້ຜົນສຳເລັດຫຼາຍດ້ານ ໃນໄລຍະຜ່ານມາ. ພ້ອມນີ້ ທ່ານຍັງໄດ້ເນັ້ນໜັກໃຫ້ປະທານ-ຮອງ ປະທານສະພາປະຊາຊົນ ແຂວງ ຜູ້ໃໝ່ ແລະ ພະນັກງານທີ່ຖືກແຕ່ງຕັ້ງ ແລະ ຍົກຍ້າຍ ໃນຄັ້ງນີ້ ຈົ່ງພ້ອມກັນສືບຕໍ່ເຊື່ອມຊຶມ ແລະ ກຳແໜ້ນ ບັນດານິຕິກຳ, ກົດໝາຍຕ່າງໆ ທີ່ກ່ຽວຂ້ອງກັບວຽກງານຂອງຕົນ ໃຫ້ຫຼາຍຂຶ້ນ, ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດບັນດາໂຄງການຕ່າງໆ ຫຼື ການປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ໃຫ້ເລິກເຊິ່ງ, ສືບຕໍ່ປັບປຸງບັນດາກົງຈັກການຈັດຕັ້ງ ແລະ ແບບແຜນວິທີເຮັດວຽກ ພາຍໃນສະພາປະຊາຊົນ ແຂວງ ແລະ ພາຍໃນພະແນກການ-ເມືອງ ກໍຄືພາຍໃນແຂວໄຊສົມບູນ ໃຫ້ມີຜົນສຳເລັດອັນໃໝ່ ແລະ ໃຫຍ່ຫຼວງກວ່າເກົ່າ.
Loading...