ພິທີມອບ-ຮັບໜ້າທີ່ລະຫວ່າງ ທ່ານ ພັນເອກ ຄຳພອນ ເທບພະວົງ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ ລາວ -ໄທ ແຫ່ງທີ 1 ນະຄອນຫຼວງວຽງຈັນ(ນວ) ຜູ້ເກົ່າ ແລະຜູ້ໃໝ່ ຈັດຂຶ້ນເມື່ອທ້າຍອາທິດ, ທີ່ຫ້ອງການຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ ແຫ່ງທີ 1 ນວ ໂດຍມີທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ, ທ່ານ ພັນເອກ ວິຊຽນ ຫານວິໄລ ຮອງຫົວໜ້າກົມຈັດຕັ້ງພະນັກງານ ກົມໃຫຍ່ການເມືອງ ກະຊວງປ້ອງກັນຄວາມສະຫງົບເຂົ້າຮ່ວມ.
ໃນພິທີທ່ານຮອງຫົວໜ້າຄະນະຈັດຕັ້ງ ນວ ໄດ້ຂຶ້ນຜ່ານຂໍ້ຕົກ ລົງຂອງທ່ານລັດຖະມົນຕີ ກະຊວງປ້ອງກັນຄວາມສະຫງົບ ອະນຸມັດໃຫ້ທ່ານ ພັນເອກ ຄຳພອນ ເທບພະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບ ນວ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ ແຫ່ງທີ 1 ນວ ຜູ້ເກົ່າ ພັກການຮັບອຸດໜູນບຳນານ ເລີ່ມແຕ່ເດືອນກໍລະກົດ 2024 ເປັນ ຕົ້ນໄປ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງນາຍຕຳຫຼວດທ່ານ ພັນໂທ ບຸນສົງ ລາດາແສນ ຮອງຫົວໜ້າກອງບັນຊາການປ້ອງກັນຄວາມສະຫງົບ ນວ ເປັນຫົວໜ້າຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ ແຫ່ງທີ 1 ນວ ຜູ້ໃໝ່.
ທີ່ມາ: ວຽງຈັນທຸລະກິດ-ສັງຄົມ
