ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 14 ມິຖຸນາ 2024 ທ່ານ ກາບແກ້ວ ທໍາມະວົງ ຜູ້ຮຽບຮຽງປຶ້ມປະຫວັດພຣະທາດເຈດີ ແລະ ວັດທີ່ສຳຄັນຢູ່ປະເທດລາວ ໄດ້ນຳເອົາປຶ້ມດັ່ງກ່າວ ຈຳນວນ 570 ຫົວ ລວມມູນຄ່າ 285.000.000 ກີບ ມາຖວາຍໃຫ້ວັດສີສະເກດ ແລະ ມອບໃຫ້ ຫໍສະໝຸດທົ່ວປະເທດ ເພື່ອໃຫ້ປະຊາຊົນລາວບັນດາເຜົ່າໄດ້ອ່ານ, ໄດ້ສຶກສາ ແລະ ລະນຶກເຖິງບຸນຄຸນບັນພະບຸລຸດ ທີ່ໄດ້ສ້າງມໍລະດົກອັນລໍ້າຄ່າໄວ້ໃຫ້ ເນື່ອງຈາກວັດວາອາຣາມ ແລະ ພະທາດເຈດີ ມີບົດບາດສຳຄັນຕໍ່ວີຖີຊີວິດ ຂອງປະຊາຊົນລາວ ຕັ້ງແຕ່ອະດີດມາເຖິງປັດຈຸບັນ. ເປັນກຽດເຂົ້າຮ່ວມໃນພິທີໂດຍພຣະອາຈານໃຫຍ່ ມະຫາເຫວດ ມະເສໄນ ຮອງປະທານສູນກາງອົງການພຸດທະສາສະໜາສັມພັນແຫ່ງ ສປປລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີດັ່ງກ່າວ, ທ່ານ ກາບແກ້ວ ທໍາມະວົງ ໄດ້ກ່າວວ່າ : ປະຫວັດພຣະທາດເຈດີ ແລະ ວັດທີ່ສຳຄັນຢູ່ປະເທດລາວ ໄດ້ຖືກຈັດພິມ ໂດຍສຳນັກພິມດີບຸກ ເຊິ່ງເນື້ອໃນປື້ມດັ່ງກ່າວແມ່ນໄດ້ຮິບໂຮມ ປະຫວັດພະທາດເຈດີ ແລະ ວັດທີ່ສໍາຄັນຢູ່ປະເທດລາວ 200 ພະທາດເຈດີ ແລະ ວັດ ແບບຫຍໍ້ໆ ເຊິ່ງປື້ມຫົວນີ້, ຈະເປັນຂໍ້ມູນພື້ນຖານໃຫ້ຄົນທີ່ສົນໃຈເລື່ອງປະຫວັດສາດ ແລະ ວັດທະນະທໍາ ໄດ້ຮູ້ປະຫວັດຫຍໍ້ຂອງວັດ ແລະ ພະທາດເຈດີທີ່ສຳຄັນແລ້ວ, ຍັງເປັນປຶ້ມທີ່ເປີດປະຕູໃຫ້ນັກຄົ້ນຄວ້າ ໄດ້ສຶກສາລົງເລິກຕື່ມ ກ່ຽວກັບປະຫວັດຄວາມເປັນມາຂອງວັດ ແລະ ພະເຈດີທີ່ສໍາຄັນຢູ່ໃນປະເທດລາວ. ຄາດວ່າໃນອານາຄົດ ຈະຮິບໂຮມຂໍ້ມູນກຽ່ວກັບປະຫວັດພະທາດເຈດີ ແລະ ວັດທີ່ສໍາຄັນຢູ່ປະເທດລາວ ເຫລັ້ມທີ II ຕື່ມອີກ. ສ່ວນລາຍໄດ້ທັງໝົດຈາກການຂາຍປຶ້ມຫົວນີ້ ຈະນໍາໄປສົມທົບທຶນສ້າງສິມ “ວັດພູກະດີ” (ພູເຂົາຄວາຍ ເມືອງປາກງື່ມ ນະຄອນຫລວງວຽງຈັນ) ເພື່ອຂໍອຸທິດບຸນກຸສົນຫວັງວ່າປຶ້ມດັ່ງກ່າວ ຈະກາຍເປັນຊັບສົມບັດຂອງຊາດ.
#ຂ່າວ-ພາບ : ດອກຈຳປີ