ພິທີມອບ-ຮັບ ພາຫະນະ-ອຸປະກອນເຕັກນິກການສໍາຫຼວດ ແລະວັດແທກແຜນທີ່ ໄດ້ຈັດຂຶ້ນໃນວັນທີ 6 ມິຖຸນາ 2024 ນີ້, ທີ່ກອງສໍາຫຼວດວັດແທກແຜນທີ່ກອງທັບ ໂດຍການເຂົ້າຮ່ວມຂອງ ສະຫາຍ ພົນຕີ ພັນແສງ ບຸນພັນ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ເສນາທິການກອງທັບ, ມີສະຫາຍ ພັນເອກ ພິເສດ ຫຼີປິງ ທີ່ປຶກສາທູດຝ່າຍທະຫານ ສປ ຈີນ ປະຈໍາ ສປປ ລາວ, ມີພະນັກງານ-ວິຊາການ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ສະຫາຍ ພັນໂທ ສົມພຸດ ພິລາ ຫົວໜ້າກົມແຜນທີ່ ກົມໃຫຍ່ເສນາທິການກອງທັບ ຕາງໜ້າຄະນະນໍາກົມໃຫຍ່ເສນາທິການກອງທັບ ກໍຄືນາຍ ແລະ ພົນທະຫານທົ່ວເຫຼົ່າຮົບແຜນທີ່ກອງທັບໄດ້ກ່າວຮັບ ພ້ອມສະແດງຄວາມຂອບໃຈເປັນຢ່າງສູງ ແລະຮູ້ບຸນຄຸນຢ່າງລົ້ນເຫຼືອຕໍ່ກອງທັບປົດປ່ອຍປະຊາຊົນຈີນ ທີ່ໃຫ້ການຊ່ວຍເຫຼືອອັນລໍ້າຄ່າແກ່ກອງທັບປະຊາຊົນລາວ, ການມອບ-ຮັບອຸປະກອນເຕັກນິກການສໍາຫຼວດ ແລະສ້າງແຜນທີ່ ເຊິ່ງແມ່ນການຊ່ວຍເຫຼືອທີ່ນອນຢູ່ໃນໂຄງການ 78106 ຈາກກອງທັບປົດປ່ອຍປະຊາຊົນຈີນ ທີ່ຢູ່ໃນທ່າມກາງບັນຍາກາດສາຍພົວພັນມິດຕະພາບ, ຄວາມສາມັກຄີແລະການຮ່ວມມືຮອບດ້ານລະຫວ່າງສອງຊາດ, ສອງກອງທັບແລະປະຊາຊົນສອງຊາດລາວ-ຈີນ, ຈີນ-ລາວ ໄດ້ມີການຂະຫຍາຍຕົວຂຶ້ນສູ່ລະດັບສູງຕາມທິດ 4 ດີ ແລະ ຖືກຕາມທິດນໍາຂອງສອງພັກສອງລັດຖະບານລາວ-ຈີນ ໃນນາມຄູ່ຮ່ວມຊາຕາກໍາທີ່ມີຄວາມໝາຍທາງດ້ານຍຸດທະສາດສັງຄົມນິຍົມ, ທັງເປັນການຍົກລະດັບໃນວຽກງານຍຸດທະສາດປ້ອງກັນຊາດ, ການຮ່ວມມືທາງດ້ານເຕັກໂນໂລຊີຂັ້ນສູງ ກ່ຽວກັບວຽກງານແຜນທີ່ການທະຫານໃນຍຸກປັດຈຸບັນ.
ພ້ອມທັງໃຫ້ຄໍາໝັ້ນສັນຍາວ່າ ຈະນໍາໃຊ້ອຸປະກອນເຕັກນິກສໍາຫຼວດ, ອຸປະກອນສູນລວມໃນສະຖານີ ໃຫ້ມີປະສິດທິພາບສູງ ນໍາເອົາການຊ່ວຍເຫຼືອໃນຄັ້ງນີ້ປະກອບສ່ວນເຂົ້າໃນການພັດທະນາສ້າງສາປະເທດຊາດ, ພັດທະນາດ້ານວຽກງານຍຸດທະສາດປ້ອງກັນຊາດໃຫ້ມີຄວາມເຂັ້ມແຂງ, ເພື່ອຍົກລະດັບຄວາມອາດສາມາດໃນວຽກງານປ້ອງກັນຊາດ, ວຽກງານນໍາພາທາງ ແລະ ວັດແທກສ້າງແຜນທີ່ໃຫ້ແກ່ກອງທັບປະຊາຊົນລາວ ທັງເປັນການປະກອບສ່ວນອັນໃຫຍ່ຫຼວງ ໃນການເພີ່ມພູນຄູນສ້າງສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ສອງຊາດສອງກອງທັບ ແລະ ປະຊາຊົນສອງຊາດລາວ-ຈີນ ໃຫ້ຈະເລີນງອກງາມຍິ່ງໆຂຶ້ນ.
ໂດຍ: ເກດຕະວັນ.
