ໃນຕອນເຊົ້າຂອງວັນທີ 24 ກໍລະກົດ 2024 ທີ່ຫໍປະຊຸມແຫ່ງຊາດ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ທ່ານ ມາຣິດ ສະງ່ຽມພົງ, ລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ ພ້ອມດ້ວຍການນໍາພາກສ່ວນກ່ຽວຂ້ອງ ໄດ້ຮ່ວມເປັນສັກຂີພິຍານ ໃນພິທີມອບ-ຮັບ ທຶນສະໜັບສະໜູນຈາກ ລັດຖະບານ ແຫ່ງ ຣາຊະອານາຈັກໄທ ໃຫ້ແກ່ ສະຫະກອນກາເຟວັນໃໝ່ ຢູ່ ແຂວງຫົວພັນ, ຈໍານວນ 4.600.000ບາດ, ຊຶ່ງໃຫ້ກຽດມອບໂດຍ ທ່ານ ນາງ ເອກສິຣິ ປິນຖະຣຸຈິດ, ຫົວໜ້າຫ້ອງການກະຊວງການຕ່າງປະເທດ ແຫ່ງ ຣາຊະອານາຈັກໄທ ແລະ ຮັບໂດຍ ທ່ານ ສະໄຫວທອງ ຄູນສະຫວັນ, ປະທານສະຫະກອນກາເຟວັນໃໝ່ ເພື່ອປະກອບສ່ວນທຶນການກໍ່ສ້າງສູນຝຶກອົບຮົມດ້ານກະສິກຳ ແລະ ວິໄຈກາເຟ ຂອງ ສະຫະກອນກາເຟວັນໃໝ່ ທີ່ ແຂວງຫົວພັນ, ຊຶ່ງເປັນໜຶ່ງແຜນງານໃນໂຄງການປູກພຶດທົດແທນຝິ່ນ ພາຍໃຕ້ໂຄງການຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ແລະ ຫ້ອງການສະຫະປະຊາຊາດ ວ່າດ້ວຍຢາເສບຕິດ ແລະ ອາດຊະຍາກຳ (UNODC) ປະຈຳ ສປປ ລາວ.
